ខេត្តកំពត ៖ យ៉ាងហោចណាស់មនុស្សចំនួន៥នាក់បានត្រូវនគរបាលខេត្ត សហការជាមួយនគរបាលស្រុកកំពង់ត្រាច ឃាត់ខ្លួនកាលពីវេលាម៉ោងប្រមាណ១២ថ្ងៃត្រង់ ថ្ងៃទី២៦ ខែកញ្ញា ឆ្នាំ២០២១ ពាក់ព័ន្ធនឹងការលេងល្បែងស៊ីសងតាមអនឡាញ នៅក្នុងហាងកាហ្វេមួយក្នុងផ្សារកំពង់ត្រាច ស្ថិតក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ។
ការចុះទៅបង្ក្រាបនេះ គឺខណៈមានមនុស្សជាច្រើននាក់កំពុងនាំគ្នាឈរមើលកកកុញនៅក្នុងហាងកាហ្វេមួយនេះ ដែលមានលែងល្បែងភ្នាល់បញ្ជល់មាន់តាមទូរទស្សន៍ និងក្រុមហ៊ុនឆ្នោតឯកជនដាក់បង្វិលលេខតាមទូរទស្សន៍ ដោយចាក់ត្រូវភ្លាមឱ្យលុយភ្លាម និងមានអ្នកអង្គុយចាំកត់កន្ទុយលេខឆ្នោតខ្មែរផងដែរ ។
ជាការកត់សម្គាល់ នៅក្នុងការបង្ក្រាបអ្នកលេងល្បែងនៅក្នុងហាងកាហ្វេជាប់ផ្សារកំពង់ត្រាចនេះ ក៏មានការប្រវាយប្រតប់គ្នារវាងកងកម្លាំងនគរបាល និងអ្នកលេងល្បែងមួយប្រាវដែរ និងឃាត់ខ្លួនបានមនុស្ស៥នាក់ ដែលមាន ១- ឈ្មោះ ដេញ ហ៊ ភេទប្រុស ជាម្ចាស់ផ្ទះ ជាអ្នកលក់កាហ្វេ និងជាអ្នកទទួលរួមក្នុងបនល្បែងស៊ីសង, ២- ឈ្មោះ ដេញ យោង ភេទប្រុស ត្រូវជាកូនប្រុសរបស់ ៣- ឈ្មោះ ដេញ ហ៊, ៤- ឈ្មោះ ឌី ឈ្មោះ សឿន និង៥-ឈ្មោះ ទី ។ ប៉ុន្តែឈ្មោះ ឌី បានរងរបួសជើងម្ខាង និងដៃម្ខាង ដោយសារមុតនឹងអំបែងកែវ ។
ជាមួយនឹងការបង្ក្រាបខាងលើនេះ សមត្ថកិច្ចក៏បានដកហូតទូរទស្សន៍២គ្រឿង និងសម្ភារមួយចំនួនទៀតជាវត្ថុតាង ហើយរួមជាមួយមនុស្សទាំង៥នាក់ ត្រូវបានដឹកទៅកាន់អធិការដ្ឋាននគរបាលស្រុកកំពង់ត្រាច ដើម្បីសួរនាំនិងធ្វើកំណត់ហេតុ។
គេធ្លាប់បានដឹងថា ឈ្មោះ ដេញ ហ៊ នៅផ្សារកំពង់ត្រាចនេះ ធ្លាប់ត្រូវបានកងរាជអាវុធហត្ថខេត្តឃាត់ខ្លួនម្ដងដែរ ពាក់ព័ន្ធនឹងករណីជាមេឆ្នោត ។ ប៉ុន្តែពេលកងរាជអាវុធហត្ថឃាត់ខ្លួននោះបានតែមួយយប់ទេ លុះព្រឹកឡើងក៏វិលវិញ ហើយបើកលេងគគ្រឹកគគ្រេងដដែលទៀត។
លុះពេលនេះ នគរបាលជាអ្នកចាប់វិញម្ដង តែគេនៅមិនទាន់ដឹងថា អ្នកឃាត់ខ្លួនទាំងប៉ុន្មាននាក់នោះត្រូវពិន័យជាប្រាក់ប៉ុន្មានលានរៀលទេ ព្រោះពួកគេប្រព្រឹត្តផ្ទុយពីការណែនាំក្រសួងសុខាភិបាល ដែលមិនឱ្យមានការជួបជុំប្រមូលផ្ដុំគ្នា និងការអនុវត្ត«៣ការពារ និង៣កុំ» ៕
ចែករំលែកព័តមាននេះ