ភ្នំពេញ៖ នៅពេលបែករឿងម្តងជាពីរដង ករណីអាជ្ញាធរសមត្ថកិច្ច យាមអ្នកជំងឺកូវីដ១៩ នៅពហុកីឡដ្ឋានជាតិអូឡាំពិក ឬស្តាតអូឡាំពិក យកលុយ នៅពេលសាច់ញាត្តិផ្ញើឥវ៉ាន់ឲ្យអ្នកជំងឺ ដោយមានអ្នកលើកឡើងថា កងរាជអាវុធហត្ថ ឬប៉េអឹម ជាអ្នកយកលុយនោះ គឺអ្នកនាំពាក្យកងរាជអាវុធហត្ថលើផ្ទៃប្រទេស បានចេញប្រកាសព័ត៌មាន បដិសេធថា មិនមានកម្លាំងកងរាជអាវុធហត្ថ ឬប៉េអឹម នៅយាមប្រចាំការទីនោះឡើយ។
ក្នុងសេចក្តីប្រកាសព័ត៌មាន ចុះថ្ងៃទី២៧ ខែកញ្ញា ឆ្នាំ២០២១ អ្នកនាំពាក្យកងរាជអាវុធហត្ថលើផ្ទៃប្រទេស បានឆ្លើយតបចំពោះពលរដ្ឋម្នាក់ ដែលបានលើកឡើងថា កងកម្លាំងអាវុធហត្ថ (ប៉េអឹម) នៅគោលដៅព្យាបាលកូវីដ-១៩ ស្តាតអូឡាំពិក គឺប៉េអឹម ពុករលួយ គាបសង្កត់ យកលុយពីបងប្អូនអ្នកជំងឺ ដែលយកឥវ៉ាន់ចូលមកក្នុងមណ្ឌល ឲ្យអ្នកជំងឺ ថែមទាំងប្រើប្រាស់សម្តីជ្រុលទៅលើអ្នកជំងឺ និងដេញអ្នកជំងឺដូចសត្វ។
ចំពោះការលើកឡើង ដែលអ្នកនាំពាក្យកងរាជអាវុធហត្ថ ចាត់ទុកថា ជាការចោទប្រកាន់ ដោយគ្មានមូលដ្ឋាននេះ គឺអ្នកនាំពាក្យកងរាជអាវុធហត្ថលើផ្ទៃប្រទេស បានឆ្លើយតបថា នៅគោលដៅស្តាតអូឡាំពិក គឺមិនមានកម្លាំងអាវុធហត្ថ ឈរជើងនៅទីនោះទេ។ កន្លងមក នៅក្នុងភូមិសាស្ត្ររាជធានីភ្នំពេញ អាវុធហត្ថទទួលខុសត្រូវ រក្សាការពារ សន្តិសុខ សណ្តាប់ធ្នាប់ ទីកន្លែងសម្រាកព្យាបាលជំងឺកូវីដ-១៩ ចំនួនតែ ៤ទីតាំងប៉ុណ្ណោះ ពោលគឺ៖ ១.សណ្ឋាគារ Great Duke ២.វិទ្យាល័យជាស៊ីមសាមគ្គី ៣.ដឹព្រីមៀរសែនសុខ និង ៤.មន្ទីរពេទ្យហ្លួងម៉ែ។
សេចក្តីប្រកាស លើកឡើងថា បច្ចុប្បន្ន អាវុធហត្ថ (ប៉េអឹម) នៅសល់គោលដៅ ទទួលខុសត្រូវតែ ២ប៉ុណ្ណោះ គឺដឹព្រីមៀរសែនសុខ និងមន្ទីរពេទ្យហ្លួងម៉ែ។ រីឯនៅទីកន្លែងមណ្ឌលព្យាបាលស្តាតអូរឡាំពិក មិនមានកម្លាំងកងរាជអាវុធហត្ថទេ។
ជាមួយគ្នានោះ អ្នកនាំពាក្យ លើកឡើងថា ក្នុងការអនុវត្តតួនាទី ភារកិច្ចរបស់ខ្លួន កងរាជអាវុធហត្ថ គោរពច្បាប់ គោរពវិន័យ ក្រមសីលធម៌វិជាជីវៈ ជាពិសេសតែងតែមានការត្រួតពិនិត្យរាល់កិច្ចប្រតិបត្តិការ ទទួលយកការផ្តល់ព័ត៌មាននានាពីសាធារណជន និងអ្នកព័ត៌មាន ទាំងវិជ្ជមាន និងទាំងអវិជ្ជមាន ដើម្បីធ្វើការកែលម្អ ដកពិសោធន៍ និងដាក់វិន័យទណ្ឌកម្ម ចំពោះយោធិននៃកងរាជអាវុធហត្ថណា ដែលប្រព្រឹត្តិខុសវិន័យ ខុសភារកិច្ច ព្រមទាំងអនុវត្តច្បាប់ចំពោះបុគ្គល ដែលប្រព្រឹត្តិបទល្មើសទៀតផង។
អ្នកនាំពាក្យ ក៏បានគូសបញ្ជាក់ថា «កងរាជអាវុធហត្ថ រង់ចាំទទួលរាល់ព័ត៌មានរិះគន់ ក្នុងន័យស្ថាបនាជានិច្ច ប្រសិនបើឃើញយោធិននៃកងរាជអាវុធហត្ថណា ប្រព្រឹត្តិមិនសមរម្យ អសីលធម៌ មិនគោរពវិន័យ ឬល្មើសច្បាប់ សូមពិនិត្យឈ្មោះ ឬអត្តលេខរបស់យោធិននៃកងរាជអាវុធហត្ថនោះ ដែលនៅខាងស្តាំលើហោប៉ាវអាវនៃឯកសណ្ឋាន ហើយផ្តល់ព័ត៌មានជាបន្ទាន់ កងរាជអាវុធហត្ថ នឹងមានវិធានការចំពោះបុគ្គលនោះ»៕
ចែករំលែកព័តមាននេះ