ខេត្តឧត្តរមានជ័យ ៖ អធិការដ្ឋាននគរបាលស្រុកអន្លង់វែង ដឹកនាំដោយលោកវរៈសេនីយ៍ត្រី ស៊ូ នូវ អធិការរងស្រុកអន្លង់វែងបានដឹកនាំកម្លាំង ឈានទៅធ្វើការឃាត់ខ្លួនជនសង្ស័យប្រុសស្រី៣នាក់ ហើយបានឆែកឆេរឃើញសារធាតុញៀនប្រភេទW.Y ហ្វេតាមីនចំនួន១៤គ្រាប់កាលពីវេលាម៉ោង១១និង០០នាទីព្រឹកថ្ងៃទី២៧ ខែកុម្ភៈ ឆ្នាំ២០១៦។ ហេតុការណ៍នេះបានកើតឡើងក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ជនជាប់ពាក់ពន្ធ័នូវសារធាតុ ញៀន៣នាក់នោះមាន ទី១ឈ្មោះហង្ស សែន ភេទស្រី អាយុ២៦ឆ្នាំ ទី២ឈ្មោះវៀង ធីថាន់ភេទស្រី អាយុ២៤ឆ្នាំ និង ទី៣ឈ្មោះសួង រតនា ភេទប្រុស អាយុ២៦ឆ្នាំទាំង៣នាក់នេះរស់នៅភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។ លោកវរៈសេនីយ៍ត្រីស៊ូ នូវ អធិការរងស្រុក បានឲ្យដឹងថាជនជាប់ពាក់ពន្ធ័ទាំង៣នាក់នេះជាមុខសញ្ញាចែកចាយ និងប្រើប្រាស់គ្រឿងញៀនដែល សមត្ថកិច្ចធ្វើការចាំឃ្លាំមើល។
លុះព្រឹកថ្ងៃទី២៧ ខែកុម្ភៈ ឆ្នាំ២០១៦ ជនសង្ស័យទាំង៣នាក់ខាងលើបានលក់ និងចែកចាយ នូវសារធាតុញៀន ហើយសមត្ថកិច្ចបានឆែកឆេររកឃើញថ្នាំចំនួន១៤គ្រាប់ ក៏ធ្វើការឃាត់ខ្លួននាំយកមកអធិការដ្ឋាននគរបាលស្រុកអន្លង់វែង ដើម្បីធ្វើការសាកសួរ។ យោងតាមចម្លើយជនសង្ស័យបានសារភាពថាខ្លួនបានប្រព្រឹត្តលក់គ្រឿងញៀនពិតប្រាកដមែន យោងតាមវត្ថុតាងសមត្ថកិច្ចបានកសាងសំណុំរឿងជនសង្ស័យទាំង៣ រួមទាំងវត្ថុតាងទៅស្នងការដ្ឋាននគរបាលខេត្តឧត្តរមានជ័យ នៅថ្ងៃទី២៨ ខែកុម្ភៈ ឆ្នាំ២០១៦ ចាត់ការតាមនិតិវិធីច្បាប់៕
ចែករំលែកព័តមាននេះ