រាជធានីភ្នំពេញ ៖ ការលួចចម្លង ឫលួចកែច្នៃស្នាដៃពីម្ចាស់ដើម នៅតែកើតមាន ក្នុងសង្គមខ្មែរ ខណៈដែលមនុស្សភាគច្រើនយល់ថា ការលួចចម្លង គឺជារឿង “ធម្មតា” ហើយភ្លេចគិតថា វាជាបញ្ហាដ៏គ្រោះថ្នាក់មួយដែលធ្វើឲ្យប៉ះពាល់ខ្លាំងដល់ក្រមសីលធម៌ រហូតដល់មានការប្តឹងផ្តល់ទៅតាមផ្លូវច្បាប់ថែមទៀតផង ។
ជាក់ស្តែង នៅថ្ងៃទី២៧ កញ្ញា ២០២១នេះ លោក លី មិន ដែលភាគច្រើនត្រូវបានស្គាល់ថា ឡា ម៉ូ (La Mo) ជាគ្រូជំនាញខាងថតរូបម្នាក់ ក្នុងទីក្រុងភ្នំពេញ ដែលមានជំនាញលើការថតរូបបែបល្អិត, ការថតរូបបែបធម្មជាតិ បែបដំណើរកំសាន្ត និងទេសភាពក្នុងស្រុកយ៉ាងច្រើននោះ ស្នាដៃរបស់លោក ត្រូវបាន បុរសម្នាក់ ដែលធ្វើការនៅរីស៊តមួយក្នុងខេត្តកំពត យកទៅធ្វើអាជីវកម្មយ៉ាងគឃ្លើន ដោយមិនមានការអនុញ្ញាតពីម្ចាស់ដើម ។
យោងតាមគណនីហ្វេសប៊ុករបស់លោក La Mo បានរៀបរាប់យ៉ាងដូច្នេះថា «ដំណឹកស្វែងរកជនខិលខូច នាថ្ងៃទី៨ ខែវិច្ឆិកា ឆ្នាំ២០២០ វេលាម៉ោង ៤និង៣៨នាទីល្ងាច មានបុរសម្នាក់កាន់គណនីហ្វេសប៊ុកឈ្មោះ Sivuthy Saing (បច្ចុប្បន្នប្លុកខ្ញុំហើយ) បានទាក់ទងមកសុំទិញរូបតាំង ក្នុងបន្ទប់រីស៊ត Resort (រូបថតនៅកំពត) ។ ខ្ញុំក៏ផ្ញើ ៨៣រូបថត ទាក់ទងនឹងខេត្តកំពត អោយគាត់មើល ដោយសារគាត់ចាប់អារម្មណ៍រូបថតទាំងនោះ ទើបសុំលេខទាក់ទងតាមតេឡេក្រាម ដើម្បីចរចារតម្លៃ ក្រោយពីប្រាប់ពីតម្លៃ ថែមទាំងមិនបានឯកភាពគ្នាទិញលក់ផង ក៏បាត់គាត់ឈឹង ពេលទូរសព្ទទៅគាត់ ក៏មិនលើកទូរសព្ទ ខ្ញុំក៏នឹកស្មានថា គាត់មិនចង់ទិញរូបថតទាំងនេះទេ ទើបទុករឿងហ្នឹងនៅម្តុំ ។ អស់រយៈពេល១០ខែកន្លងផុតទៅ ទើបដឹងតាមរយៈមិត្តភក្តិថាមានរូបភាពរបស់លោក La Mo ជាច្រើនសន្លឹក ខ្នាត់ធំៗ តាំងនៅរីស៊តមួយធំជាងគេ នៅខេត្តកំពត ។ លោក La Mo ទាមទារឲ្យបុគ្គលឈ្មោះ Sivuthy Saing ចេញមកបកស្រាយ» ។
គួរជម្រាបផងដែរថា ក្នុងករណីដែលសិទ្ធិម្ចាស់ដើម ត្រូវបានអ្នកដទៃបំពានដូចជាការលួចយកស្នាដៃទៅជួញដូរ ការប្រើប្រាស់ស្នាដៃមិនមានការអនុញ្ញាតពីម្ចាស់ដើមនោះ ម្ចាស់ដើមអាចធ្វើការការពារសិទ្ធិរបស់ខ្លួន ដោយហាមប៉ះពាល់ដល់សិទ្ធិខ្លួន និងបង្គាប់អោយអ្នកដែលបំពានបញ្ឈប់សកម្មភាពនោះ ក្នុងករណីនេះ ម្ចាស់សិទ្ធិអាចទាមទារសំណងជំងឺចិត្ត សងការខូចខាត និងប្រគល់មកវិញនូវវត្ថុតាង មានឧបករណ៍ ឬសម្ភារដែលជាប់រឿងហេតុព្រមទាំងប្រគល់នូវប្រាក់ចំណេញ ដែលបានមកពីអំពើខុសច្បាប់ទាំងអស់នោះ ។
ជុំវិញបញ្ហានេះដែរ អ្នកសារព័ត៌មានយើងនៅមិនទាន់សុំការបកស្រាយបំភ្លឺ ពីបុរសម្នាក់ដែលមានគណនីហ្វេសប៊ុកឈ្មោះ Sivuthy Saing បាននៅឡើយទេ ។
សូមបង្ហាញអោយដឹងដែរថា លោក ឡា ម៉ូ កើតនៅឆ្នាំ១៩៧៧ នៅឃុំកំពង់ក្ដី ស្រុកជីក្រែង ខេត្តសៀមរាប ក្នុងគ្រួសារសាមញ្ញដែលមានឪពុកជាអ្នកចូលចិត្តការថតរូបកម្សាន្ត លោកមានឱកាសកាន់កាមេរ៉ាតាំងពីកុមារភាព ។ លោក ឡា ម៉ូ ទទួលបានកាមេរ៉ាប្រើហ្វីល ដែលបន្សល់ទុកពីឪពុកលោកដែលអនិច្ចកម្ម ក្នុងឆ្នាំ១៩៩៤ ។ តាំងពីនោះមក យុវជន ឡា ម៉ូ ក្លាយជាអ្នកជំនាញថតរូបជាមួយកាមេរ៉ាទំនើបៗជាបន្តបន្ទាប់ ដោយមិនបានចូលសាលាណានោះទេ ។
អតីតសិស្សវិទ្យាល័យព្រះស៊ីសុវត្ថិនិងជាអតីតនិស្សិតនៃវិទ្យាស្ថានជាតិគ្រប់គ្រង លោក ឡា ម៉ូ ឆ្លងកាត់ការប្រឡូកក្នុងវិស័យថតរូបជាច្រើនឆ្នាំមក លោក ឡា ម៉ូ បានទទួលពានជាបន្តបន្ទាប់ ទាំងក្នុង និងក្រៅស្រុក ដោយរួមមានទាំងពានក្រុមហ៊ុនកាមេរ៉ាល្បីៗដូចជា Canon ជាដើម សមិទ្ធផលទាំងនេះ បានធ្វើឱ្យលោកអាចឈានជើងទៅប្រកួតប្រជែងជាមួយបណ្ដាប្រទេសក្នុងតំបន់អាស៊ី នៅប្រទេសជប៉ុន ក៏ដូចជាមានកិត្តិយសយកស្នាដៃរូបថតលោកទៅដាក់តាំងពិព័រណ៌ នៅចក្រភពអង់គ្លេស ផងដែរ ជាពិសេសលោកចង់បង្ហាញឱ្យពិភពលោកឃើញថា នៅប្រទេសកម្ពុជាក៏មានទេសភាពនិងតំបន់ទេសចរណ៍ស្អាតដែរ ៕
ចែករំលែកព័តមាននេះ