នៅពេលចេញវស្សាទី១របស់ព្រះមានព្រះភាគ ក្នុងកាលណោះព្រះអង្គទ្រង់ត្រាស់ទៅកាន់ព្រះអរហន្ត៦០អង្គយ៉ាងដូច្នេះថា ម្នាលភិក្ខុទាំងឡាយ តថាគតបានរួចហើយអំពីអន្ទាក់ទាំងអស់ ទោះបីជាអន្ទាក់ទេវតាក្តី ទោះបីជារបស់មនុស្សក្តី តថាគតមិនបានជាប់ជំពាក់ទៀតឡើយ ។
ម្នាលភិក្ខុទាំងឡាយ អ្នកទាំងឡាយសោតក៏បានរួចហើយអំពីអន្ទាក់ទាំងអស់ដែរ ទោះបីរបស់ទេវតាក្តី ទោះបីរបស់មនុស្សក្តី ម្នាលភិក្ខុទាំងឡាយ អ្នកទាំងឡាយចូរត្រាច់ទៅកាន់ចារិក គឺស្រុក និគម និងរាជធានី ហើយសម្ដែងធម៌ ដើម្បីជាប្រយោជន៍ និងសេចក្តីសុខដល់ជនជាច្រើន ដើម្បីអនុគ្រោះសត្វលោក ដើម្បីជាប្រយោជន៍ ដើម្បីជាគុណ ដើម្បីសេចក្តីសុខដល់ទេវតានិងមនុស្សទាំងឡាយ ។
អ្នកទាំងឡាយកុំទៅពីរនាក់តាមផ្លូវមួយជាមួយគ្នាឡើយ ម្នាលភិក្ខុទាំងឡាយ អ្នកទាំងឡាយចូរសម្តែងធម៌ឲ្យពីរោះបទដើម បទកណ្តាល និងបទចុង អ្នកទាំងឡាយចូរប្រកាសនូវព្រហ្មចរិយធម៌ ដ៏បរិសុទ្ធប្រកបដោយអត្ថ និងព្យញ្ជនៈដ៏ពេញបរិបូណ៌ទាំងអស់ សត្វទាំងឡាយដែលមានធូលី គឺរាគាទិក្កិលេសតិច ក្នុងភ្នែកក៏មាន សត្វទាំងនោះនឹងសាបសូន្យចាកមគ្គផល ព្រោះមិនបានស្តាប់ធម៌ សត្វទាំងឡាយអ្នកបម្រុង ត្រាស់ដឹងធម៌ គង់នឹងមាន ។
ម្នាលភិក្ខុទាំងឡាយ ចំណែកតថាគតក៏នឹងចូលទៅកាន់សេនានិគម ក្នុងឧរុវេលប្រទេស ដើម្បីសម្តែងធម៌ដូចជាអ្នករាល់គ្នាដែរ ជាប្រយោជន៍សុខចម្រើនដល់សត្វទាំងឡាយ ៕ សាន សារិន
ចែករំលែកព័តមាននេះ