ខេត្តបន្ទាយមានជ័យ ៖ កំណាត់ផ្លូវលេខ២៦៨Aចាប់ពីចំណុចព្រៃមាន់ ដល់អាងត្រពាំងថ្ម ត្រូវបានផ្អាកចរាចរណ៍សម្រាប់រថយន្តធុនធំដឹកជញ្ជូនទំនិញ ។ តែចំពោះរថយន្តតូចៗគឺអាចធ្វើចរាចរណ៍បានជាធម្មតា គិតចាប់ពីនៅថ្ងៃទី២៦ កញ្ញា ស្ថិតនៅស្រុកភ្នំស្រុក ។
លោក សុក ចាន់ថា ប្រធានមន្ទីសាធារណៈការនិងដឹកជញ្ជូនខេត្តបន្ទាយមានជ័យបានប្រាប់ថា មន្ទីរសាធារណៈការណ៍និងដឹកជញ្ជូនខេត្តបន្ទាយមានជ័យ បានជូនដំណឹងដល់សាធារណៈជនអោយបានដឹងថា ចាប់ពីថ្ងៃទី២៦ ខែកញ្ញា ឆ្នាំ២០២១នេះ បានផ្អាកចរាចរណ៍ជាបណ្តោះអាសន្នសម្រាប់យានយន្តដឹកជញ្ជូនធុនធំគ្រប់ប្រភេទ ដែលធ្វើដំណើរឆ្លងកាត់តាមកំណាត់ផ្លូវជាតិលេខ២៦៨A ក្រោយទឹកជំនន់ត្រូវបានជន់លិច ចាប់ពីភូមិព្រៃមាន់ ដល់អាងត្រពាំងថ្ម ស្រុកភ្នំស្រុក។
លោកបានបញ្ជាក់ថា បន្ទាប់ពីទទួលរងគ្រោះដោយឥទ្ធិពលព្យុះនិងភ្លៀងធ្លាក់ជាបន្តបន្ទាប់ ធ្វើឱ្យមានទឹកជំនន់ទឹកភ្លៀងជន់លិចនិងហូរកាត់ផ្លូវមួយចំនួននៅក្នុងខេត្តបន្ទាយមានជ័យ ជាពិសេសកំណាត់ផ្លូវលេខ២៦៨A ចាប់ពីភូមិព្រៃមាន់ ដល់អាងត្រពាំងថ្មស្រុកភ្នំស្រុក ។
លោក សុក ចាន់ថា បានបញ្ជាក់ថា ការផ្អាកចរាចរណ៍បណ្តោះអាសន្ន គឺគិតចាប់ពីថ្ងៃជូនដំណឹងនេះតទៅ រហូតដល់មានការជូនដំណឹងសារជាថ្មីដើម្បីថែរក្សាផ្លូវថ្នល់ ស្ពាន កុំអោយបាក់ស្រុត និងធានាដល់ការធ្វើចរាចរណ៍ប្រកបដោយសុវត្ថិភាព ។ ដោយឡែក ចំពោះរថយន្តលក្ខណៈគ្រួសារ (ប្រភេទទេសចរណ៍) អាចធ្វើចរាចរណ៍ឆ្លងកាត់បានជាធម្មតា ៕
ចែករំលែកព័តមាននេះ