រាជធានីភ្នំពេញ៖ នៅថ្ងៃទី២៤ ខែកញ្ញា ឆ្នាំ២០២១ ក្រុមគ្រូពេទ្យធីតា សហការជាមួយអាជ្ញាធរខណ្ឌមានជ័យ បានធ្វើតេស្ត យកសំណាកតាមវត្ត លើព្រះសង្ឃ និងអ្នកពាក់ព័ន្ធទាំងអស់ ដែលគង់ និងស្នាក់នៅ ក្នុងវត្តចំនួន ៧វត្ត។ ជាលទ្ធផល រកឃើញវិជ្ជមាន ៨អង្គ/នាក់ រួមមាន៖ ព្រះសង្ឃ ៣អង្គ លោកតាអាចារ្យ ២នាក់ កូនសិស្សលោកស្នាក់នៅក្នុងវត្ត ២នាក់ និងក្មេងវត្តម្នាក់។
ក្នុងខណ្ឌមានជ័យ មានវត្តចំនួន ៨ រួមមាន៖ វត្តចាក់ង្រែលើ វត្តចាក់អង្រែក្រោម វត្តដំបូកខ្ពស់ វត្តសន្សំកុសល វត្តអង្គពោធិ៍ញាណ វត្តនន្ទមុន្នី វត្តសាមគ្គីរង្សី និងវត្តចង្ក្រានតាព្រហ្ម ហៅវត្តស្ទឹងមានជ័យ។ ក្នុងនោះដែរ វត្ត ដែលមិនបានធ្វើសំណាក គឺវត្តនន្ទមុន្នី ព្រោះវត្តនេះ ត្រូវបានបិទខ្ទប់តាំងពីមុនពេលបុណ្យភ្ជុំបិណ្ឌម្លេះ ព្រោះ មានព្រះសង្ឃគង់ ក្នុងវត្ត មានវិជ្ជមានវីរុសបំលែងថ្មី ដែលតា។
លោក ឌី រ័ត្នខេមរុណ អភិបាលរងខណ្ឌមានជ័យ បានប្រាប់អោយដឹងថា ថ្ងៃនេះ វត្តចំនួន ៧ ក្នុងចំណោម ៨វត្ត ក្នុងមូលដ្ឋានខណ្ឌមានជ័យ គឺត្រូវធ្វើសំណាកលើព្រះសង្ឃ និងតាជីយាយជី ឧបាសក ឧបាសិកា និងអ្នករស់នៅក្នុងវត្តទាំង ៧ ដើម្បីរកវីរ៉ុសកូវីដ១៩ ដែលកំពុងរាលដាលខ្លាំង ចូលដល់តាមទីវត្តអារាម។ ការតេស្តសំណាកនេះ គឺមិនតម្រូវអោយមានការចេញចូលក្នុងវត្តពីសំណាក់ពុទ្ធបរិស័ទ ដែលយកចង្ហាន់ទៅប្រគេនព្រះសង្ឃ ក្នុងវត្តឡើយ គឺតម្រូវអោយយកត្រឹមខ្លោងទ្វារវត្ត ហើយមានការដាក់តុ នៅខ្លោងទ្វារវត្ត ចាំទទួលប៉ុណ្ណោះ។ ទន្ទឹមនឹងនោះ ក៏មានកងកម្លាំងសមត្ថកិច្ច មានកម្លាំងប្រជាការពារ កម្លាំងនគរបាល និងកម្លាំងកងរាជអាវុធហត្ថ ឈរប្រចាំការនៅមុខខ្លោងទ្វារវត្តនីមួយៗផងដែរ ដើម្បីសម្រួលដល់ដំណើរការ នៃការតេស្តសំណាកអោយប្រព្រឹត្តិទៅបានរលូនផងដែរ។
លោក ឌី រ័ត្នខេមរុណ បានបន្តអោយដឹងថា វត្តទាំង ៧ នឹងត្រូវបិទទាំងស្រុង គិតចាប់ពីវេលាថ្ងៃទី២៥ ខែកញ្ញា ឆ្នាំ២០២១ ដោយអនុវត្តតាមសេចក្តីសម្រេចរបស់រាជរដ្ឋាភិបាលកម្ពុជា ស្តីពី ការផ្អាករៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាល នៃជម្ងឺកូវីដ១៩។ ការបិទវត្តផ្អាកមិនអោយមានការប្រារព្ធពិធីបុណ្យ តាមបែបសាសនាខាងលើនេះ គឺធ្វើឡើងចំថ្ងៃទី៤ ឬបិណ្ឌ៤ នៃបុណ្យភ្ជុំបិណ្ឌប្រពៃណីជាតិខ្មែរ។
លោកបញ្ជាក់ថា ក្នុងកំឡុងការបិទវត្ត គឺអនុញ្ញាតអោយមានការយកចង្ហាន់ទៅប្រគេនព្រះសង្ឃបាន តាមវេន របស់ម្ចាស់វេន តែអនុញ្ញាតត្រឹមឃ្លោងទ្វារប៉ុណ្ណោះ ហើយមិនអោយមានការប្រមូលផ្តុំក្នុងចំនួនមនុស្សច្រើនឡើយ ដោយត្រូវរក្សាគម្លាតសុវត្ថិភាព និងមានការពាក់ម៉ាស់ និងមានអាល់កុលសម្រាប់បាញ់សម្លាប់មេរោគ ជាប់នៅនឹងខ្លួនជានិច្ចផងដែរ។
យ៉ាងណាមិញ លោកអភិបាលរងខណ្ឌ បានបញ្ជាក់ថា រហូតដល់ល្ងាចថ្ងៃទី២៤ ខែកញ្ញានេះ ក្រុមគ្រូពេទ្យ បានតេស្តសំណាកលើព្រះសង្ឃ និងអ្នកពាក់ព័ន្ធ ដែលគង់ និងស្នាក់នៅក្នុងវត្ត បានចំនួន ៧វត្តហើយ ដែលមានចំនួនសរុប ២៧៥អង្គ/នាក់។ លទ្ធផល នៃការតេស្តសំណាកទាំង ៧វត្ត បញ្ជាក់ថា មានវិជ្ជមានកូវីដ១៩ ចំនួន ៨អង្គ/នាក់ ក្នុងនោះដែរ មានព្រះសង្ឃ ៣អង្គ លោកតាអាចារ្យ ២នាក់ កូនសិស្សលោកស្នាក់នៅក្នុងវត្ត ២នាក់ និងក្មេងវត្តម្នាក់។
គួររំលឹកថា កាលពីល្ងាចថ្ងៃទី២៣ ខែកញ្ញា ឆ្នាំ២០២១ រាជរដ្ឋាភិបាលកម្ពុជា បានចេញនូវសេចក្តីសម្រេចមួយ ស្តីពី ការផ្អាកការរៀបចំពិធីបុណ្យកាន់ និងភ្ជុំបិណ្ឌ ដើម្បីទប់ស្កាត់ការឆ្លងរាលដាល នៃជំងឺកូវីដ១៩ ព្រោះក្នុងរយៈពេល ២ថ្ងៃ នៃការរៀបចំពិធីបុណ្យកាន់បិណ្ឌកន្លងទៅនេះ រាជរដ្ឋាភិបាលពិនិត្យឃើញថា មានការជួបជុំ និងប្រមូលផ្តុំមនុស្សជាច្រើន នៅតាមបណ្តាវត្តអារាម ដើម្បីប្រារព្ធពិធីបុណ្យកាន់បិណ្ឌ ដែលមិនអាចធានាបានការអនុវត្តត្រឹមត្រូវតាមវិធានការសុវត្ថិភាពផ្នែកសុខាភិបាល ក្នុងការបង្ការ និងទប់ស្កាត់ការឆ្លងរាលដាល នៃជំងឺកូវីដ១៩ ដែលអាចធ្វើឲ្យព្រះរាជាណាចក្រកម្ពុជា ត្រូវប្រឈមនឹងហានិភ័យខ្ពស់ នៃការឆ្លងរាលដាលទ្រង់ទ្រាយធំនៅទូទាំងប្រទេស នៃជំងឺកូវីដ១៩ ជាពិសេស មេរោគបំលែងថ្មីដែលតា ( Delta ) ដែលមានកម្រិត នៃការឆ្លងរាលដាលឆាប់រហ័សបំផុត។
សេចក្តីសម្រេចរបស់រាជរដ្ឋាភិបាល ផ្អាកពិធីបុណ្យកាន់បិណ្ឌ និងភ្ជុំបិណ្ឌនេះ ក្រោយពីផ្ទុះការឆ្លងរាលដាលជំងឺកូវីដ១៩ នៅតាមវត្តមួយចំនួន នៅពេលប្រារព្ធពិធីបុណ្យដាក់បិណ្ឌ និងភ្ជុំបិណ្ឌ បាន ២ថ្ងៃ គឺនៅថ្ងៃទី២២កញ្ញា និងថ្ងៃទី២៣ ខែកញ្ញា។ ក្នុងនោះ គ្រាន់តែវត្តចំពុះក្អែក នៅខណ្ឌច្បារអំពៅ រកឃើញព្រះសង្ឃឆ្លងកូវីដ ៤៦អង្គ និងអ្នកនៅវត្ត ចំនួន ៣នាក់ ហើយនៅវត្តនាគវ័ន មានតាអាចារ្យ ម្នាក់ និងអ្នកនៅវត្ត ២នាក់ ឆ្លងកូវីដ រកឃើញនៅថ្ងៃដាក់បិណ្ឌ១ កាលពីថ្ងៃទី២២ ខែកញ្ញា។
រដ្ឋបាលរាជធានីភ្នំពេញ តម្រូវឲ្យធ្វើតេស្ត រកកូវីដ នៅតាមវត្តទាំង ១៥១វត្ត នៅក្នុងខណ្ឌទាំង ១៤ ក្នុងរាជធានីភ្នំពេញ នាថ្ងៃទី២៤ និងថ្ងៃទី២៥ ខែកញ្ញានេះ។ ក្នុងនោះ នៅថ្ងៃទី១នៃការធ្វើតេស្តនេះ រកឃើញព្រះសង្ឃ និងអ្នកនៅវត្ត ឆ្លងកូវីដ ប្រមាណតែ ៣០អង្គ-នាក់។ ក្នុងមួយវត្ត ត្រឹមតែ ២-៣អង្គ-នាក់ប៉ុណ្ណោះ៕ លី ហេង
ចែករំលែកព័តមាននេះ