រាជធានីភ្នំពេញ ៖ អគ្គិភ័យបានឆាបឆេះផ្ទះប្រជាពលរដ្ឋមួយកន្លែងយ៉ាងសន្ធោសន្ធៅ បង្កភ្ញាក់ផ្អើលដល់ប្រជាពលរដ្ឋរត់ទៅរាយការណ៍ជូនសមត្ចកិច្ច ហៅរថយន្តពន្លត់អគ្គិភ័យអន្តរាគមន៍ភ្លាមៗ ដែលហេតុការណ៍នេះកើតឡើងកាលពីវេលាម៉ោង១២ និង១០នាទីរំលងអធ្រាត្រ ឈានចូលថ្ងៃទី២៥ កុម្ភៈ ២០១៦ ស្ថិតនៅចំណុចផ្ទះស្តុកអេតចាយខាងកើតរបងបឋមសិក្សាជម្ពូវ័ន្ត តាមបណ្តោយផ្លូវជាតិលេខ៤ ក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ ។
ប្រភពឱ្យដឹងថា ក្នុងហេតុការណ៍នោះ ក៏មានអ្នករងរបួស៣នាក់ផងដែរ ១-ឈ្មាះឡៅ សុខា ភេទប្រុស អាយុ៧២ឆ្នាំ ជាអ្នកទិញលក់អេតចាយ ២-ឈ្មោះយ៉ូ ជាហ្តិច ភេទស្រី និង៣-ឈ្មោះស្រីណែត អាយុ៧ឆ្នាំ ។
បើតាមសាក្សីដែលឃើញហេតុការណ៍ឱ្យដឹងថា មុនពេលកើតហេតុ គេឃើញមានផ្សែងហុយចេញពីផ្ទះលក់អេតចាយផ្នែកខាងក្រោយ បន្ទាប់មកចេញអណ្តាតភ្លើងឆេះយ៉ាងសន្ធោសន្ធៅ ទើបបង្កឱ្យមានការភ្ញាក់ផ្អើលដល់សមត្ថកិច្ច ហៅរថយន្តពន្លត់អគ្គិភ័យមកជួយអន្តរាគមន៍ភ្លាមៗ ។
សមត្ថកិច្ចឱ្យដឹងថា ជាជំហានដំបូងសមត្ថកិច្ចបានសនិដ្ឋានថា អគ្គិភ័យនេះឆេះដោយសារតែទុស្សេខ្សែភ្លើង ហើយរយៈពេលមួយម៉ោងកន្លះ ទើបភ្លើងបានរលត់ទៅវិញទាំងស្រុង ដោយប្រើប្រាស់រថយន្តពន្លត់អគ្គីភ័យអស់ចំនួន១៥គ្រឿង និងប្រើប្រាស់ទឹកអស់១៧រថយន្ត ក្នុងនោះមានរថយន្តរបស់ការិយាល័យបង្ការ និងពន្លត់អគ្គិភ័យរាជធានីភ្នំពេញ១១គ្រឿង និងរថយន្តរបស់កងពលតូចលេខ៧០ចំនួន៤គ្រឿង ។
សមត្ថកិច្ចបន្តទៀតថា ហេតុការគ្រោះអគ្គិភ័យនេះ ធ្វើឱ្យស្ត្រីចំណាស់ម្នាក់ និងក្មេងស្រីតូចម្នាក់ទៀត ជាប់នៅខាងក្នុងផ្ទះតែសំណាងល្អ ត្រូវកម្លាំងកងរាជអាវុធហត្ថចូលទៅជួយសង្គ្រោះទាន់ពេលវេលា និងធ្វើឱ្យស្ត្រីវ័យចំណាស់ រងរបួសស្រាលចំណែកក្មេងស្រី មិនមានរងរបួសនោះទេ ។
សមត្ថកិច្ចបញ្ជាក់ថា ផ្ទះដែលត្រូវអគ្គីភ័យឆាបឆេះនោះជញ្ជាំងថ្មប្រក់ស័ង្ហសី និងផ្ទុកកំទេចកំទីអេតចាយជាច្រើនផងដែរ ទើបធ្វើឱ្យងាយស្រួលឆាបឆេះបែបនេះ ។
ចែករំលែកព័តមាននេះ