- ភ្នំពេញ
ភ្នំពេញ៖ ការរក្សាគម្លាតសុវត្ថិភាព ពីបុគ្គលម្នាក់ ទៅបុគ្គលម្នាក់ទៀត យ៉ាងហោចណាស់ ១ម៉ែត្រកន្លះពីគ្នា នៅពេលនេះ មិនត្រូវបានអនុវត្តឲ្យបានពេញលេញ និងដោយហ្មត់ចត់នោះទេ។ នោះគឺនៅពេលកុមារទៅចាក់វ៉ាក់សាំង…
ភ្នំពេញ៖ ការរក្សាគម្លាតសុវត្ថិភាព ពីបុគ្គលម្នាក់ ទៅបុគ្គលម្នាក់ទៀត យ៉ាងហោចណាស់ ១ម៉ែត្រកន្លះពីគ្នា នៅពេលនេះ មិនត្រូវបានអនុវត្តឲ្យបានពេញលេញ និងដោយហ្មត់ចត់នោះទេ។ នោះគឺនៅពេលកុមារទៅចាក់វ៉ាក់សាំង…
ភ្នំពេញ៖ ការរក្សាគម្លាតសុវត្ថិភាព ពីបុគ្គលម្នាក់ ទៅបុគ្គលម្នាក់ទៀត យ៉ាងហោចណាស់ ១ម៉ែត្រកន្លះពីគ្នា នៅពេលនេះ មិនត្រូវបានអនុវត្តឲ្យបានពេញលេញ និងដោយហ្មត់ចត់នោះទេ។ នោះគឺនៅពេលកុមារទៅចាក់វ៉ាក់សាំង បង្ការជំងឺកូវីដ១៩ បានតម្រង់ជួរនៅជិតៗគ្នា ខណៈនៅពេលប្រជាពុទ្ធបរិស័ទ ក្នុងរដូវកាន់បិណ្ឌនេះ ចូលប្រគេនចង្ហាន់ព្រះសង្ឃ និងរាប់បាត្រ ក៏មិនបានឃ្លាតគ្នា ទោះបីជាពាក់ម៉ាសទាំងអស់គ្នា ហើយមានម៉ាស៊ីនវាស់កម្តៅ ទូរសម្លាប់មេរោគ និងអាល់កុលលាងដៃក៏ដោយ។
ទិដ្ឋភាពនៅមណ្ឌលចាក់វ៉ាក់សាំង ក្នុងមណ្ឌលសុខភាពទឹកថ្លា នៅខណ្ឌសែនសុខ រាជធានីភ្នំពេញ ក្នុងរយៈពេលប៉ុន្មានថ្ងៃនេះ បានបង្ហាញពីឪពុកម្តាយ អាណាព្យាបាល ដែលនាំកូនចៅ ទៅចាក់វ៉ាក់សាំង ការពារកូវីដ១៩ សម្រាប់កុមារអាយុ ៦ឆ្នាំ ទៅក្រោម ១២ឆ្នាំ បានឈរតម្រង់ជួរ ដោយប្រជ្រៀតគ្នាយ៉ាងច្រើនកោះករ។
ការតម្រង់ជួររង់ចាំយូរនេះ ត្រូវបានអាជ្ញាធរខណ្ឌសែនសុខ លើកឡើងថា ដោយសារតែឪពុកម្តាយក្មេង ឬអាណាព្យាបាលមួយចំនួន ពុំមានលិខិតអញ្ជើញ និងពុំមានឯកសារត្រឹមត្រូវ និងខ្លះទៀត មានលិខិតអញ្ជើញ និងឯកសារគ្រប់គ្រាន់ តែពួកគាត់តម្រង់ជាជួរ ហើយលើសចំនួនកំណត់ ដែលត្រូវចាក់ ព្រោះ ១ថ្ងៃ អាជ្ញាធរមានផែនការ ចាក់វ៉ាក់សាំង ត្រឹមតែ ៤០០នាក់ប៉ុណ្ណោះ។
កន្លងមក អាជ្ញាធរ បានសហការជាមួយមណ្ឌលសុខភាព រៀបចំ និងណែនាំ អោយឪពុកម្តាយ ឬអាណាព្យាបាល នាំកូន មកតម្រង់ជាជួរ ដោយមានគម្លាតសុវត្តិភាពត្រឹមត្រូវ តែពួកគាត់ មិនបានស្តាប់តាមការណែនាំឡើយ ដោយតម្រង់ជាជួរនៅខាងក្រៅ មិនបានរក្សាកម្លាតអ្វីនោះទេ។ តែនៅក្នុងបរិវេណមណ្ឌលសុខភាព បានរៀបចំកៅអី និងរក្សាគម្លាតសុវត្ថិភាពត្រឹមត្រូវ។
ក្រៅពីទិដ្ឋភាពកុមារ អាណាព្យាបាល និងឪពុកម្តាយ តម្រង់ជួរមិនរក្សាគម្លាតសុវត្ថិភាព នៅពេលរង់ចាំចាក់វ៉ាក់សាំងនេះ គឺនៅថ្ងៃទី២២ ខែកញ្ញា ឆ្នាំ២០២១ ជាថ្ងៃដាក់បិណ្ឌទី១ នៅតាមបណ្តាវត្តនានា ក្នុងរាជធានីភ្នំពេញ បានគោរពទៅតាមការណែនាំរបស់រដ្ឋបាលរាជធានីភ្នំពេញ និងក្រសួងសុខាភិបាល ដើម្បីទប់ស្កាត់ការរីករាលដាលជំងឺកូវីដ-១៩។ ក្នុងនោះ ទាំងព្រះសង្ឃ ទាំងតាអាចារ្យ យាយជី និងប្រជាពុទ្ធបរិស័ទ គ្រប់គ្នា បានពាក់ម៉ាស វាស់កំដៅ បាញ់អាកុល និងមានទូរសម្លាប់មេរោគ ថែមទៀត។
ប៉ុន្តែអ្វីជាការកត់សំគាល់ ស្ទើរតែគ្រប់វត្ត គឺការរក្សាគម្លាតសុវត្ថិភាព ទៅតាមការណែនាំរបស់ក្រសួងសុខាភិបាល ហាក់នៅមានកំរិតនៅឡើយ។ ពោលគឺអ្នកចូលប្រគេនចង្ហាន់ព្រះសង្ឃ មិនបានឃ្លាតគ្នា ឲ្យបានយ៉ាងហោចណាស់ ១ម៉ែត្រកន្លះនោះទេ។ នៅពេលរាប់បាត្រក៏ដូចគ្នា។ ចំណុចនេះ ទាមទារអោយបងប្អូនប្រជាពលរដ្ឋភ្ញាក់រលឹក និងចូលរួមទាំងអស់គ្នា ពិសេសគណៈកម្មការវត្ត ត្រូវរៀបចំឡើងវិញ ឲ្យរក្សាគម្លាតសុវត្ថិភាពទាំងព្រះសង្ឃ ទាំងតាអាចារ្យ យាយជី ក្មេងវត្ត និងពុទ្ធបរិស័ទទាំងអស់ ដើម្បីការពារ និងទប់ស្កាត់ការឆ្លងរាលដាលជំងឺកូវីដ-១៩។
ការអំពាវនាវ និងការណែនាំមានជាហូរហែ តែប្រជាពលរដ្ឋយើង នៅពេលទៅចាក់វ៉ាក់សាំង និងពេលទៅវត្តធ្វើបុណ្យនេះ ចេះតែភ្លេចខ្លួន អាងតែម្នាក់ៗ ពាក់ម៉ាស និងមានអាកុលលាងដៃហើយ។ តែម្នាក់ៗ ត្រូវតែការពារខ្លួនជានិច្ច កុំឱ្យឆ្លងមេរោគកូវីដ-១៩ គ្រប់ពេលវេលា ទាំងទៅចាក់វ៉ាក់សាំង ទាំងដើរទៅណាមកណា និងទាំងពេលទៅវត្តធ្វើបុណ្យដាក់បិណ្ឌ និងភ្ជុំបិណ្ឌនេះ។
ម្នាក់ៗ ទៅចាក់វ៉ាក់សាំង ហើយក៏ដល់វេននាំទាំងកូនទៅចាក់វ៉ាក់សាំង ដោយត្រូវរង់ចាំ ឈរតម្រង់ជួររាប់ម៉ោងក៏មាន ក្នុងបំណងចាក់វ៉ាក់សាំង ការពារកុំឲ្យឆ្លងកូវីដ១៩។ តែបើតម្រង់ជួរ ប្រជ្រៀតគ្នា និងនៅជិតៗគ្នាដូច្នេះ ជាហានិភ័យនៃការឆ្លងកូវីដ១៩ ទៅវិញទេ។
ដូចគ្នាដែរ អ្នកទៅវត្តធ្វើបុណ្យកាន់បិណ្ឌ និងភ្ជុំបិណ្ឌ គឺដើម្បីធ្វើបុណ្យ សន្សំកុសល។ តែដោយសារតែការធ្វេសប្រហែស បែរជាឆ្លងកូវីដ ដោយពុំដឹងខ្លួន ដោយសារតែមិនបានរក្សាគម្លាតសុវត្ថិភាព ពិសេសវិធានការ ៣កុំ និង៣ការពារ ឱ្យបានខ្ជាប់ខ្ជួនជានិច្ចទេនោះ តើបុណ្យជួយយើង កុំឲ្យឈឺបាន ឬទេ?
សូមកុំភ្លេចថា អាជ្ញាធរខណ្ឌទួលគោក នៅរសៀលថ្ងៃទី២២ ខែកញ្ញា បានសម្រេចបិទវត្តនាគវ័ន ដែលស្ថិតនៅសង្កាត់បឹងកក់ទី២ ខណ្ឌទួលគោក រាជធានីភ្នំពេញ ជិតស្ពានអាកាសតិចណូ។ វិធានការនេះ ធ្វើឡើង ចំថ្ងៃកាន់បិណ្ឌទី១ ដែលកាលពីពេលព្រឹក ក៏មានអ្នកទៅវត្ត ប្រារព្ធពិធីបុណ្យកាន់បិណ្ឌតាមប្រពៃណី ដូចនៅវត្តផ្សេងទៀតដែរ។
ការបិទខ្ទប់វត្តនាគវ័ននេះ ក្រោយពីបានរកឃើញអ្នកវិជ្ជមានកូវីដ-១៩ ចំនួន ៣ នាក់ រួមមាន លោកតាអាចារ្យម្នាក់ និងនិស្សិតស្នាក់នៅ ក្នុងវត្តចំនួន ២នាក់។ ក្រុមគ្រូពេទ្យស្ម័គ្រចិត្តសម្តេចតេជោ ហ៊ុន សែន បានចុះយកសំណាកភ្លាមៗ នៅវត្តនាគវ័ន កាលពីថ្ងៃទី២២កញ្ញា ក្រោយការបិទខ្ទប់ជាបណ្ដោះអាសន្ននេះ។
ចំណែកនៅល្ងាចថ្ងៃទី២៣កញ្ញា រដ្ឋបាលរាជធានីភ្នំពេញ បានសម្រេចបិទខ្ទប់វត្តចំពុះក្អែក នៅខណ្ឌច្បារអំពៅ រយៈពេល ១៤ថ្ងៃ ចាប់ពីថ្ងៃទី២៣ ខែកញ្ញា រហូតដល់ថ្ងៃទី៦ ខែតុលា បន្ទាប់ពីធ្វើតេស្ត រកឃើញព្រះសង្ឃ ៤៦អង្គ និងពុទ្ធបរិស័ទ ៣នាក់ ឆ្លងកូវីដ១៩។
ដោយសារតែការឆ្លងរាលដាលជំងឺកូវីដ១៩ មិនទាន់ស្ងប់ស្ងាត់ នៅខ្ទង់ជាង ៦០០នាក់ ក្នុង១ថ្ងៃៗ និងស្លាប់ជាង ១០នាក់ នៅឡើយ គឺកាលពីថ្ងៃទី២២ ខែកញ្ញា រដ្ឋបាលរាជធានីភ្នំពេញ ក៏បានសម្រេច ដាក់ចេញវិធានការរដ្ឋបាល ដោយបន្តផ្អាកសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់ និងការជួបជុំ ឬប្រមូលផ្តុំមនុស្សជាលក្ខណៈឯកជន រយៈពេល ១៤ថ្ងៃបន្ថែមទៀត គិតចាប់ពីថ្ងៃទី២៤ ខែកញ្ញា រហូតដល់ថ្ងៃទី៧ ខែតុលា។ វិធានការនេះ ដើម្បីការពារ និងទប់ស្កាត់ការឆ្លងរាលដាលជំងឺកូវីដ១៩។ សេចក្តីណែនាំពីវិធានការនានា ដើម្បីបង្កើនការទប់ស្កាត់ការឆ្លងរាលដាលជំងឺកូវីដ១៩ ពិសេសនៅពេលបុណ្យភ្ជុំបិណ្ឌ ក៏ត្រូវបានដាក់ចេញជាបន្តបន្ទាប់។
ដូច្នេះក្រៅពីអ្នកតម្រង់ជួរចាក់វ៉ាក់សាំង រួមទាំងប្រជាពុទ្ធស័ទ ក៏ដូចជាព្រះសង្ឃ និងតាអាចារ្យយាយជី ដែលត្រូវតែភ្ញាក់រលឹកជាប់ជានិច្ច ដើម្បីការពារខ្លួន កុំឲ្យឆ្លងកូវីដ តាមរយៈការអនុវត្តវិធានការសាមញ្ញៗ ៣កុំ និង៣ការពារ ជាប់ជានិច្ចហើយនោះ អាជ្ញាធរសមត្ថកិច្ច ក៏ត្រូវសហការជាមួយមណ្ឌលសុខភាព ឬមន្ទីរពេទ្យ និងគណៈកម្មការវត្ត ត្រូវរៀបចំឡើងវិញ នូវប្រព័ន្ធសុវត្ថិភាពសុខភាព ពិសេសការរក្សាគម្លាតនេះឯង។
នៅតាមវត្តជាច្រើន រៀបចំបានល្អរួចហើយ នូវវិធានទប់ស្កាត់ការឆ្លងកូវីដ ដោយដាក់ទូរបាញ់សម្លាប់មេរោគ អាល់កុលលាងដៃ ម៉ាស៊ីនវាស់កម្តៅ និងចែកម៉ាស ជាដើម នៅមាត់ច្រក មាត់ទ្វារចូលសាលាឆាន់។ តែចាំបាច់ណាស់ ការអនុវត្តវិធានការមួយទៀត គឺការរក្សាគម្លាតសុវត្ថិភាព។
ក្នុងនោះ បើអ្នកទៅរង់ចាំច្រើនពេក អាចសម្រួល ដោយស៊ូឲ្យជួរវែងបន្តិចចុះ តែកុំឲ្យតែកៀកគ្នា រហូតដល់ថ្នាក់ប្រជ្រៀត ដណ្តើមគ្នា ចូលចាក់វ៉ាក់សាំង ដូចរូបថត ដែលបានបង្ហាញ។ អ្នកទៅតម្រង់ជួរ ក៏ដូចគ្នា ត្រូវគិតគូរពីសុវត្ថិភាពជាចម្បង ក្រែងលោ មិនទាន់បានចាក់វ៉ាក់សាំងផង បែរជាឆ្លងកូវីដ ដោយសារតែការមិនគោរពតាមការណែនាំ ក្នុងករណីរក្សាគម្លាតសុវត្ថិភាពយ៉ាងតិច ១ម៉ែត្រកន្លះពីម្នាក់ ទៅម្នាក់នេះឯង។
នៅតាមវត្តក៏ដូចគ្នា ពុទ្ធបរិស័ទ នៅទូទាំងប្រទេស ពេលទៅវត្ត ធ្វើបុណ្យភ្ជុំបិណ្ឌនេះ ត្រូវមានស្មារតីម្ចាស់ការដោយខ្លួនឯង ក្នុងការពារជំងឺកូវីដ-១៩ ដោយពាក់ម៉ាសជាប់រហូត មានអាល់កុលបាញ់លាងសម្អាតដៃញឹកញាប់ និងរក្សាគម្លាតសុវត្ថិភាពជានិច្ច បើទោះបីជាវត្តអារាម សុទ្ធតែមានវិធានការរួចហើយក្តី។ ប៉ុន្តែលុះណាតែបុគ្គលម្នាក់ៗ មានភាពម្ចាស់ការ ទើបមានប្រសិទ្ធភាពខ្ពស់ ក្នុងការការពារ កុំឲ្យឆ្លងជំងឺកូវីដ-១៩៕
ចែករំលែកព័តមាននេះ