ឡៅ ចិត្រា ប៉ះឡុង បេន លឿន ចុងសប្ដាហ៍នេះច្បាស់ជាកក្រើកសង្វៀន
- ភ្នំពេញ
រាជធានីភ្នំពេញ ៖ កំពូលអ្នកប្រដាល់ជើងខ្លាំង ឡៅ ចិត្រា មកពីក្លិបកីឡាប្រដាល់បញ្ជាការដ្ឋានទ័ពពិសេសត្រូវបានគេរៀបចំឱ្យ
រាជធានីភ្នំពេញ ៖ កំពូលអ្នកប្រដាល់ជើងខ្លាំង ឡៅ ចិត្រា មកពីក្លិបកីឡាប្រដាល់បញ្ជាការដ្ឋានទ័ពពិសេសត្រូវបានគេរៀបចំឱ្យជួបគ្នាជាមួយកីឡាករឡុង បេលឿន ក្លិបសាលវ័ន្តកីឡានៅលើសង្វៀនស៊ីអិនស៊ីថ្ងៃសៅរ៍ ទី២៥ កញ្ញា ក្នុងកម្មវិធីអ្នកតស៊ូគុនខ្មែរគោជល់ សង្ឃឹមថា ពិជាកក្រើកសង្វៀនមិនខានឡើយ ខណៈគូនេះកន្លងមកអត់ដែលប៉ះគ្នានោះទេ។
រវាងកីឡាករឡៅ ចិត្ រានិងកីឡាករឡុង បេនលឿន សុទ្ធតែជាអ្នកប្រដាល់ដែលមានបទពិសោធន៍ប្រកួតនៅលើសង្វៀនយូឆ្នាំមកហើយដូចគ្នា ។ ប៉ុន្តែកន្លងមកចេះតែឃ្វាងគ្នារហូត អត់ដែលបានសាកថ្វីដៃគ្នានោះទេ ។ លើកនេះគឺជាឱកាសពិសេសបំផុតដែលអ្នកនិយមតាមដានការប្រកួតភាគច្រើនកំពុងតែរង់ចាំទស្សនាយ៉ាងអន្ទះសា ដោយពួកគេចង់ដឹងថាឡុង បេនលឿន អាចទប់ទល់ជាមួយកំពូលអ្នកលេងស្នៀតកណ្ដាប់ដៃរន្ទះបានដល់ទឹកទី៥ឬអត់ ។
ឡៅ ចិត្រា ទោះបីជាគេមិនសូវមានឱកាសឡើងសង្វៀនប្រកួតញឹកញាប់ដូច ឡុង បេនលឿនក៏ពិតមែន តែសម្រាប់ការប្រកួតកន្លងមកអត់ដែលមានអ្នកណាឆ្លងផុតពីទឹកទី៣នោះទេ គឺតែងសន្លប់ក្រោមកណ្ដាប់ដៃចិត្តារហូត ។ ឡុង បេនលឿន ស្នៀតប្រយុទ្ធរបស់គេក៏មិនជាអន់នោះដែរ ជាពិសេសស្នៀតជើងរន្ទះរបស់គេអាចធ្វើឱ្យគូប្រកួតសន្លប់បានយ៉ាងងាយបំផុត ។ ប៉ុន្តែលើកនេះគេមកប៉ះចំអ្នកលេងកណ្ដាប់ដៃរន្ទះឡៅ ចិត្រា ប្រហែលជាពិបាកបន្តិចហើយ។ស្នៀតកណ្ដាប់ដៃចិត្រា វាយចេញបានលឿនហើយត្រង់ចំគោលដៅល្អទៀតផង។
នៅមានគូប្រកួតជើងខ្លាំងមួយគូទៀតដែលធ្វើឱ្យអ្នកតាមដានការប្រកួតចង់តាមដានទស្សនាគឺការប៉ះគ្នារវាងកីឡាករឡុង ជិនមកពីក្លិបខ្លារខិនមានរិទ្ធ និងកីឡាករឌុម កែវដា មកពីក្លិបមកុដរាជសីហ៍ ។ ការប៉ះគ្នារវាងគូនេះក៏ធ្វើឱ្យគេមានការចាប់អារម្មណ៍ខ្លាំងណាស់ដែរ ព្រោះថាគូនេះសុទ្ធសឹងតែជាអ្នកប្រដាល់ជើងខ្លាំង ទម្ងន់ធ្ងន់ថែមទាំងមានបទពិសោធន៍នៅលើសង្វៀនយូឆ្នាំមកហើយដូចគ្នាទៀត។ម្យ៉ាងវិញទៀតគូនេះបើតាមតែគេធ្លាប់ដឹង គូនេះគឺមានចរិតដូចគ្នា វាយមិនបន្ធូដៃឡើយ។ទាំងស្នៀតប្រយុទ្ធនិងកម្លាំង ប្រហាក់ប្រហែលគ្នា អាចស៊ីសងជាមួយគ្នាបានយ៉ាងល្អមើលមិនខាន។
ដោយឡែកសម្រាប់គូប្រកួតដណ្ដើមប្រាក់លានខារ៉ាបាវ នៅថ្ងៃសៅរ៍នេះដែរ ប្រមូលផ្ដុំទៅដោយកំពូលអ្នកប្រដាល់ជើងខ្លាំងទាំងអស់។កីឡាករ ចក់ ស៊ីវិនមកពីក្លិបនាយកដ្ឋានអង្គរក្សប៉ះជាមួយកីឡាករវ៉ាន់ វឿនមកពីក្លិបឃ្លាំងមឿងកីឡាខណៈកីឡាកររិន ដេវីតមកពីក្លិបនាគរាជចតុមុខប៉ះជាមួយអេ ណារ័ត្នសមាគមកីឡាប្រដាល់ក្រសួងកសិកម្ម។
រវាងចក់ ស៊ីវិន និងវ៉ាន់ វឿន អត់ដែលប៉ះគ្នាបីមុនមកនោះទេ ហើយគេទាំងពីក៏មានបទពិសោធន៍ប្រកួតនៅលើសង្វៀនខុសគ្នាដែរ។ចក់ ស៊ីវិនគ្រាន់តែជាអ្នកប្រដាល់ស្រកក្រោយម្នាក់ប៉ុណ្ណោះ ហើយថែមទាំងមិនសូវបានបង្ហាញខ្លួននៅលើសង្វៀនញឹកញាប់ទៀតផង ខណៈវ៉ាន់ វឿជាអ្នកប្រដាល់ចាស់វស្សាមួយរូបធ្លាប់ឆ្លងកាត់ការប្រកួតនៅលើសង្វៀនរាប់មិនអស់។ប៉ុន្តែវ៉ាន់ វឿនមានវ័យរាងជ្រេបន្តិចទៅហើយដែរ មួយរយៈមកនេះការប្រកួតរបស់គេចាញ់ច្រើនជាងឈ្នះ។ដូច្នេះបើនិយាយពីកម្លាំងស៊ុហ្វវិញមិនអាចប្រៀបជាមួយចក់ សាវិនបានឡើយ។ទោះជាយ៉ាងណាវាគឺជាការប្រកួតដណ្ដើមប្រាក់លាន ទាំងសងខាងសុទ្ធតែបានត្រៀមខ្លួនទុកជាមុនដូចគ្នា មិនអាចមើលស្រាលលើខាងណាម្នាក់បានឡើយ។
ចំណែកការប៉ះគ្នារវាងកីឡាកររិន ដេវិតនិងកីឡាករអេ ណារ័ត្ន ក្នុងការដណ្ដើមប្រាក់លានលើកនេះដែរនោះ ក៏គេមិនអាចទាយទុកមុនបានដែរ ដោយសាតែគូនេះ ជាអ្នកប្រដាល់ជើងចាស់និងមានថ្វីដៃប្រកួតល្អម្យ៉ាងម្នាក់។ដូច្នេះមិនដឹងថា តំណែងជាម្ចាស់ប្រាក់លានលើកនេះបានទៅលើខាងណានោះទេ ៕
ចែករំលែកព័តមាននេះ