រាជធានី ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាបានថ្លែងថា កម្ពុជាយល់ស្របនឹងទស្សនៈថា គ្មានប្រទេសណាអាចបញ្ឈប់វិបត្តិជំងឺកូវីដ-១៩ តែម្នាក់ឯងបាននោះទេ ត្រូវធ្វើការរួមគ្នា និងគាំទ្រគ្នាទៅវិញទៅមក ។
យោងតាមសន្ទរកថា ក្នុងកិច្ចប្រជុំកំពូលសកលស្ដីពីជំងឺកូវីដ-១៩ «ការបញ្ចប់ការរាតត្បាត និងការកសាងឡើងវិញឲ្យកាន់តែប្រសើរ» នាថ្ងៃទី២២ ខែកញ្ញា ឆ្នាំ២០២១ តាមប្រព័ន្ធវីដេអូ សម្ដេចតេជោ ហ៊ុន សែន មានប្រសាសន៍ថា «ការឆ្លងរាលដាលជាសកលនៃជំងឺកូវីដ១៩ គឺជាវិបត្តិរួម ។
ហេតុនេះ កម្ពុជាយល់ស្របនឹងទស្សនៈថា គ្មានប្រទេសណាអាចបញ្ឈប់វិបត្តិនេះតែម្នាក់ឯងបាននោះទេ ។ យើងត្រូវធ្វើការរួមគ្នា គាំទ្រគ្នាទៅវិញទៅមក ហើយត្រូវចងចាំថា មិនមាននរណារម្នាក់អាចមានសុវត្ថិភាពនោះទេ ដរាបណាទាំងអស់គ្នាមិនទាន់មានសុវត្ថិភាព»។
សម្ដេចតេជោ បានគូសបញ្ជាក់ទៀតថា «ជាមួយគ្នានេះ ខ្ញុំសូមសង្កត់ធ្ងន់ថា យើងត្រូវតែរួមគ្នាធ្វើកិច្ចការនេះ តាមសមត្ថភាព និងសមត្ថភាពរៀងខ្លួនក្នុងទឹកចិត្តស្មោះសរ ការទទួលខុសត្រូវខ្ពស់ សប្បុរសម៌ និងមិនមានបង្កប់នូវរបៀបវារៈនយោបាយ» ។
សម្ដេចតេជោ បានបន្ដថា កម្ពុជាចូលរួមជាមួយនឹងសហគមន៍អន្ដរជាតិ ក្នុងការប្ដេជ្ញាផ្សារភ្ជាប់ខ្លួនជាមួយនឹង «សេចក្តីព្រាងគោលដៅ» ដែលជាលទ្ធផលដ៏សំខាន់នៃកិច្ចប្រជុំកំពូលកូវីដ-១៩ សកលនេះ ។ ជាការពិតគិតស្ថានភាពនៃជំងឺកូវីដ-១៩ ឈានមកដល់ត្រីមាសទី៣ នៃឆ្នាំ២០២១នេះនៅបន្ដប្រឈមនឹងភាពមិនប្រាកប្រជាខ្ពស់ ដោយសារហានិភ័យពីរលកនៃការបំប្លែងខ្លួនថ្មីៗរបស់វីរុសកូរ៉ូណា ដែលមានសភាពកាន់តែកាចសាហាវ និងបន្ដរំខានដល់សកម្មភាពសង្គម-សេដ្ឋកិច្ចទូទៅ ។
ក្នុងសន្ទរកថា សម្ដេចតេជោ ក៏បានលើកឡើងថា កម្ពុជាយល់ថា ប្រទេសទាំងអស់ត្រូវប្រឹងប្រែង និងរួមសាមគ្គីគ្នាជាឆ្លុងមួយ ដើម្បីសម្រេចគោលដៅដ៏ចម្បងនេះដោយមិនប្រកាន់ពូជសាសន៍ និន្នាការនយោបាយ និងចៀសវាងឲ្យបាននូវការយកការប្រយុទ្ធនឹងជំងឺកូវីដ-១៩ ធ្វើជារបៀបវារៈនយោបាយ ឬបម្រើរបៀបវារៈនយោបាយរបស់ខ្លួន ៕
ចែករំលែកព័តមាននេះ