ខេត្តកំពង់ធំ ៖ ឈ្មួញរកស៊ីឈើក្បាលឡើងដុះស្លែប្រចាំនៅក្នុងទឹកដីស្រុកសន្ទុក ខេត្តកំពង់ធំ ត្រូវបានគេស្គាល់ឈ្មោះហៅថា «លោក ធួក ៗ» គឺជាឈ្មួញម្នាក់ដ៏មានជំនាញខាងដឹកជញ្ជូនផលអនុផលព្រៃឈើខុសច្បាប់ ចេញពីតំបន់ព្រៃអង់តែន តែត្រូវបានជាប់អន្ទាក់សមត្ថកិច្ចអធិការដ្ឋានរដ្ឋបាលព្រៃឈើខាងជើងបឹងទន្លេសាប កាលពីវេលាម៉ោង២ និង១៥នាទីរសៀលថ្ងៃទី១៨ កញ្ញា ឆ្នាំ២០២១ ស្ថិតនៅត្រង់ចំណុចភូមិខ្វែក ឃុំកំពង់ថ្ម ស្រុកសន្ទុក ខេត្តកំពង់ធំ។
សមត្ថកិច្ចបានឲ្យដឹងថា ករណីបង្ក្រាបរថយន្តដឹកឈើខុសច្បាប់ខាងលើនេះ ក្រោមការបញ្ជារបស់ លោកតិប ញាតា នាយអធិការដ្ឋានរដ្ឋបាលព្រៃឈើខាងជើងបឹងទន្លេសាប លោកហោ ភាជ នាយរងអធិការដ្ឋាន សហការជាមួយផ្នែករដ្ឋបាលព្រៃឈើកំពង់ថ្ម ក្រោមការសម្របសម្រួលដោយលោក សាយ វាសនាព្រះរាជអាជ្ញារងអយ្យការអមសាលាដំបូងខេត្តកំពង់ធំ បានធ្វើការឃាត់រថយន្តកូរ៉េចំណុះ៣,៥តោន ក្បាលពណ៌.ស ទ្រង់ពណ៌បៃតង ដែលបានដឹកឈើចម្រុះចេញពីតំបន់ព្រៃអង់តែន ជាឈើមិនគ្រប់អាយុដែលច្បាប់ត្រូវហាមឃាត់ ។
នៅពេលដែលកម្លាំងចម្រុះឃាត់រថយន្តល្មើសទុកមួយកន្លែង ត្រូវបានមេឈ្មួញឈើ ឈ្មោះ ធួក និង បក្សពួកនាំគ្នារើឈើទំលាក់ចោលពីលើឡានចេញខ្លះ រួចហើយយកសាំងមកចាក់ពីលើ ហើយកេះដែកកេះដុតឈើដែលនៅសេសសល់លើរថយន្ត រួចបើករថយន្តចេញយ៉ាងគគ្លើនរត់គេចបាត់ពីកន្លែងកើតហេតុ ធ្វើឲ្យសមត្ថកិច្ចស្រឡាំងកាំង ហើយក៏គេសង្កេតឃើញថា គ្មានសមត្ថកិច្ចណាបើករថយន្តដេញតាមជនសង្ស័យនោះឡើង ដែលជាហេតុទុកឱកាសមេឈ្មួញបើករថយន្តល្មើសគេចបាង់ស្រមោលដោយសុវត្ថិភាព ។
បច្ចុប្បន្ន វត្ថុតាងប្រភេទឈើចម្រុះត្រូវបានដឹកយកមករក្សាទុកនៅផ្នែករដ្ឋបាលព្រៃឈើកំពង់ថ្ម ដោយឡែករថយន្តត្រូវបានជនល្មើសនឹងម្ចាស់ឈ្មោះ ធួក និងបក្សពួកយកសាំងដុតដើម្បីបំភ័យសមត្ថកិច្ច រួចបើករត់គេចបាត់នេះ សមត្ថកិច្ចកំពុងតែកសាងសំណុំរឿងនិងចំណាត់ការបន្តតាមនីតិវិធីច្បាប់ នឹងស្វែងរករថយន្តដែលជាមធ្យោបាយដឹកជញ្ជូនផលអនុផលព្រៃឈើយកមកចំណាត់ការឲ្យបាន ។
ជុំវិញករណីនៃការបង្ក្រាបបទល្មើសខាងលើ មហាជនលោកមានចម្ងល់យ៉ាងខ្លាំងថា! តើបុគ្គលឈ្មោះ ធួក ជាអ្នកណា? ឬមួយក៏ជាអ្នករកស៊ីល្មើសច្បាប់ម្នាក់ដែលមានការឃុបឃិតគ្នាជាមួយសមត្ថកិច្ចជំនាញនៅតាមដងផ្លូវ ត្រូវដងត្រូវផ្លែគ្នាអស់ហើយ បានជាហ៊ានដឹកជញ្ជូនបទល្មើសផលអនុផលយ៉ាងគគ្លើនបែបនេះ កន្លងមកគេសង្កេតឃើញសមត្ថកិច្ចបង្ក្រាបបានជាច្រើនដងមកហើយដែរ ប៉ុន្តែជននេះ គេឃើញជនខាងលើ នៅតែបន្តរកស៊ីដឹកបទល្មើសព្រៃឆ្លងកាត់ទីស្នាក់ការសង្កាត់ព្រៃឈើជាច្រើនកន្លែងបានដដែល ។
ពលរដ្ឋសូមសំណូមពរដល់លោក វេង សាខុន រដ្ឋមន្ត្រីក្រសួងកសិក្មរុក្ខាប្រមាញ់ និងនេសាទ មេត្តាមានវិធានការឲ្យបានតឹងរឹងផង ចំពោះមន្ត្រីថ្នាក់ក្រោមរបស់លោកមួយចំនួនដែលជាមន្ត្រីផ្លែល្វា បានឃុបឃិតគ្នាជាមួយនិងក្រុមឈ្មួញរកស៊ីបំផ្លិចបំផ្លាញព្រៃឈើឲ្យស័ក្កសមនឹង ទោសកំហុសដែលពួកគេបានប្រព្រឹត្តឧក្រិដ្ឋកម្មព្រៃឈើ ដោយសារតែការស្វែងរកលាភសក្ការៈដាក់ហោប៉ាវរៀងៗខ្លួននេះ បើមិនដូច្នោះទេព្រៃអង់តែនដែលជាជម្រកសត្វព្រៃដ៏សារៈសំខាន់របស់រដ្ឋ ដែលនៅសេសសល់បន្តិចបន្តួចនេះ នឹងត្រូវបំផ្លិចបំផ្លាញអស់នាពេលឆាប់ៗនេះជាក់ជាមិនខាន។
ចែករំលែកព័តមាននេះ