ប្រទេសឥណ្ឌូណេស៊ី ៖ ការធ្លាក់ចុះនៃពាណិជ្ជកម្មទ្វេភាគី គឺត្រូវបានលើកយកមកពិភាក្សានៅក្នុងកិច្ចប្រជុំកាលពីថ្ងៃព្រហស្បតិ៍ រវាងមន្ត្រីឥណ្ឌូណេស៊ី និងថៃ ដោយប្តេជ្ញាថានឹងបង្កើនទំនាក់ទំនងសេដ្ឋកិច្ចក្នុងគោលបំណង
ប្រទេសឥណ្ឌូណេស៊ី ៖ ការធ្លាក់ចុះនៃពាណិជ្ជកម្មទ្វេភាគី គឺត្រូវបានលើកយកមកពិភាក្សានៅក្នុងកិច្ចប្រជុំកាលពីថ្ងៃព្រហស្បតិ៍ រវាងមន្ត្រីឥណ្ឌូណេស៊ី និងថៃ ដោយប្តេជ្ញាថានឹងបង្កើនទំនាក់ទំនងសេដ្ឋកិច្ចក្នុងគោលបំណងលើកស្ទួយដល់សេដ្ឋកិច្ចជាតិ ។
រដ្ឋមន្ត្រីការបរទេសឥណ្ឌូណេស៊ី លោកស្រី Retno LP Marsudi បានស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់រដ្ឋមន្ត្រីការបរទេសថៃ លោក Don Pramudwinai ដោយលោកស្រីបានថ្លែងថា ៖ « ឥណ្ឌូណេស៊ី និងថៃបានយល់ព្រមលើកិច្ចសហប្រតិបត្តិការបង្កើនកំណើនសេដ្ឋកិច្ចរបស់ខ្លួនឲ្យកាន់តែមានសក្តានុពលកាន់តែខ្លាំងថែមទៀតនៅលើឆាកអន្តរជាតិ » ។
លោកស្រីមានប្រសាសន៍បន្តថា ៖ « ជំនួបនៃកិច្ចពិភាក្សារបស់យើងនឹងផ្តោតលើវិស័យពាណិជ្ជកម្ម ទេសចរណ៍ អាកាសចរណ៍ និងបញ្ហាមួយចំនួនទៀតដូចជា បញ្ហាសុវត្ថិភាពម្ហូបអាហារ និងជំនាញពលករនៅក្នុងឧស្សាហកម្មផលិតផលអាហារ ។ ជាក់ស្តែង សម្រាប់វិស័យអាកាសចរណ៍ ប្រទេសថៃធ្លាប់បានទិញយន្តហោះដែលផលិតនៅប្រទេសឥណ្ឌូណេស៊ី ដូច្នេះហើយបានជាឥណ្ឌូណេស៊ីស្នើឲ្យថៃ នៅតែបន្តអនុវត្តយុទ្ធសាស្ត្រនេះ » ។
បើយោងតាមទិន្នន័យពីក្រសួងពាណិជ្ជកម្មបង្ហាញថា ទំនាក់ទំនងពាណិជ្ជកម្មទ្វេភាគីរវាងឥណ្ឌូណេស៊ី និងថៃ មានទឹកប្រាក់ចំនួន១២,៥៥ប៊ីលានដុល្លារនៅអំឡុងខែមករា-វិច្ឆិកា កាលពីឆ្នាំមុន ។ ទោះជាយ៉ាងណា ទំនាក់ទំនងទ្វេភាគីនៃប្រទេសទាំងពីរបានធ្លាក់ចុះ១៣% កាលពីឆ្នាំ២០១៤ ។
ចំណែកលោក Don Pramudwinai លើកឡើងថា ៖ « ខ្ញុំសង្ឃឹមថា ទំនាក់ទំនងពាណិជ្ជកម្មទ្វេភាគីនេះ នឹងកើនឡើងពី១៦ ទៅ២០ប៊ីលានដុល្លារនៅឆ្នាំនេះ ។ មិនតែប៉ុណ្ណោះ ពួកយើងនឹងអាចបង្ហាញពីការសហការដ៏ជោគជ័យនេះទៅដល់បណ្តាប្រទេសក្នុងតំបន់អាស៊ានឲ្យធ្វើជាគំរូទៀតផង » ។
ក្រៅពីកិច្ចពិភាក្សាលើការបង្កើនទំនាក់ទំនងសេដ្ឋកិច្ច និងបង្កើនសេដ្ឋកិច្ចជាតិនេះ លោកស្រី Retno LP Marsudi ឱ្យដឹងទៀតថា ៖ « ការធ្វើពាណិជ្ជកម្មតាមសមុទ្រ គឺជាប្រធានបទដែលបានពិភាក្សានៅក្នុងកិច្ចប្រជុំនេះ ។ ប្រទេសទាំងពីរបានយល់ព្រមលើការធ្វើពាណិជ្ជកម្មតាមសមុទ្រម្តងរួចមកហើយ នៅក្នុងកិច្ចប្រជុំកាលពីឆ្នាំមុន ដែលបានប្រព្រឹត្តឡើងនៅទីក្រុងបាងកក ។ ដូច្នេះនៅខែកុម្ភៈ និងខែមីនាឆ្នាំនេះ លោកស្រីនឹងបន្តចរចាទៅលើបញ្ហានេះម្តងទៀត » ។
ចំពោះបញ្ហាចុងក្រោយដែលត្រូវលើកយកមកពិភាក្សានោះរួមមាន បញ្ហាភេវរកម្ម ការជួញដូរគ្រឿងញៀន ការជួញដូរមនុស្ស និងការជួញដូរសត្វព្រៃ ។
លោកស្រីបញ្ជាក់ថា ៖ « ឥណ្ឌូណេស៊ី និងថៃ ក៏បានយល់ព្រមក្នុងការគាំទ្រ និងសហការគ្នា ដើម្បីចូលរួមក្នុងក្រុមប្រឹក្សាសហប្រជាជាតិ ផងដែរ ដែលប្រទេសថៃនឹងចូលរួមនៅឆ្នាំ២០១៧-២០១៨ ចំណែកឥណ្ឌូណេស៊ីនឹងចូលរួមនៅឆ្នាំ២០១៩-២០២០ » ៕
ចែករំលែកព័តមាននេះ