ខេត្តស្វាយរៀង ៖ ផ្ទះ១ខ្នង នៅភូមិព្រៃឈើទាល ឃុំប្រសូត ស្រុកស្វាយទាប បានត្រូវអគ្គិភ័យលេបត្របាក់អស់នៅសល់តែផេះផង់ បង្កឱ្យមានការភ្ញាក់ផ្អើលកាលពីវេលាម៉ោងប្រមាណ១០និង៣០នាទី ថ្ងៃទី១៤ ខែកញ្ញា ឆ្នាំ២០២១ ដែលសមត្ថកិច្ចសន្និដ្ឋានថា មកពីទុស្សេខ្សែភ្លើង ។
បើតាមមន្ត្រីសមត្ថកិច្ចបានឱ្យដឹងថា ម្ចាស់ផ្ទះខាងលើនេះឈ្មោះ ហែម ប៊ុនថេត ភេទប្រុស អាយុ៥៤ឆ្នាំ មុខរបរធ្វើសំណង់ មានប្រពន្ធឈ្មោះ ម៉ៅ សំអុល អាយុ៥២ឆ្នាំ ជាកសិករ ។
ក្រោយពីទទួលបានព័ត៌មានខាងលើ សមត្ថកិច្ចបានចេញរថយន្តពន្លត់អគ្គិភ័យរបស់អធិការដ្ឋាននគរបាលស្រុកស្វាយទាប ទៅធ្វើអន្តរាគមន៍ភ្លាមដែរ ប៉ុន្តែជាអកុសលដោយសារនៅឆ្ងាយ និងផ្លូវតូចពិបាកចូលទៅសង្គ្រោះ ទើបមិនអាចជួយបានទាន់ពេលនោះទេ ទើបធ្វើឱ្យផ្ទះខាងលើត្រូវអណ្តាតភ្លើងឆាបឆេះខ្ទេចអស់តែម្តង។ ផ្ទះដែលត្រូវអគ្គិភ័យឆាបឆេះនេះ មានទំហំ៦មែត្រគុណនឹង៧មែត្រ ប្រក់ហ្វ៊ីប្រូស៊ីម៉ង់ត៍ ជញ្ជាំងសង្ក័សី និងរៀបបន្ទប់ខាងក្រោម ក៏ត្រូវភ្លើងឆេះអស់ទាំងស្រុងផងដែរ ។
ចំពោះរបស់ទ្រព្យផ្សេងទៀត ដែលបាត់បង់ជាមួយផ្ទះនោះ រួមមានស្រូវ៣៥បាវ ទូរទស្សន៍១គ្រឿង ទូទឹកកក១គ្រឿង បាស់៤ អំព្លី១ សាឡុងមួយឈុត លុយចំនួន២លានរៀល និង៣៤៧ដុល្លារ៕
ចែករំលែកព័តមាននេះ