ចៅក្រមជំនុំជម្រះសាលាឧទ្ធរណ៍កាលពីព្រឹកថ្ងៃទី១៤ ខែកញ្ញា ឆ្នាំ២០២១ បានសម្រេចប្រកាសសាលដីកាផ្តន្ទាទោសអតីតអនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ គឺលោកវរសេនីយ៍ទោ
រាជធានីភ្នំពេញ ៖ ចៅក្រមជំនុំជម្រះសាលាឧទ្ធរណ៍កាលពីព្រឹកថ្ងៃទី១៤ ខែកញ្ញា ឆ្នាំ២០២១ បានសម្រេចប្រកាសសាលដីកាផ្តន្ទាទោសអតីតអនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ គឺលោកវរសេនីយ៍ទោ ដួង ណាគ្រី ដាក់ពន្ធនាគារកំណត់៥ឆ្នាំ ដោយតម្រូវឲ្យអនុវត្តក្នុងពន្ធនាគារត្រឹមតែ៣ឆ្នាំ ចំណែកទោសសល់ប៉ុន្មានត្រូវព្យួរទាំងអស់ ពាក់ព័ន្ធករណីបើករថយន្តតាមបាញ់ប្រហារប៉ុនប៉ងសម្លា.ប់ជនរងគ្រោះ២នាក់ប្ដីប្រពន្ធ នៅក្បែរអធិការដ្ឋាននគរបាលខណ្ឌច្បារអំពៅ ។ សាលដីកានេះ បានបើកផ្លូវទុកសិទ្ធិឲ្យភាគីណាមួយ មិនសុខចិត្តប្តឹងសារទុកទៅតុលាការកំពូលតាមកំណត់ច្បាប់ ។
សូមបញ្ជាក់ថា កាលពីថ្ងៃទី០៣ ខែមករា ឆ្នាំ២០២០ លោក កូយ សៅ អនុប្រធាន និងជាប្រធានក្រុមប្រឹក្សាជំនុំជម្រះ សាលាដំបូងរាជធានីភ្នំពេញ បានប្រកាសសាលក្រមលើសំណុំរឿងជនជាប់ចោទ អតីតអនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ គឺលោកវរសេនីយ៍ទោ ឌួង ណាគ្រី ដាក់ពន្ធនាគារកំណត់១០ឆ្នាំ ពីបទ.ប៉ុនប៉ងឃាត.កម្ម និងប្រើប្រាស់អាវុធដោយគ្មានការអនុញ្ញាតិ តាមបញ្ញត្តិមាត្រា១៩៩ នៃក្រមព្រហ្មទណ្ឌ និងមាត្រា ២០ បញ្ញត្តិច្បាប់ស្តីពី ការគ្រប់គ្រងអាវុធ និងគ្រាប់រំសេវ ។ សាលក្រមនោះ ត្រូវបានជនជាប់ចោទប្រកាសប្តឹងឧទ្ធរណ៍ភ្លាមៗ ដោយគេយល់ឃើញថា សាលាដំបូងបានផ្តន្ទាទោសលើរូបគេធ្ងន់ធ្ងរពេក ។
ក្នុងសំណុំរឿងនេះ មានជនរងគ្រោះ២នាក់ប្តីប្រពន្ធ ដោយប្តីឈ្មោះ ភូរិស្ស ស្តូរ៉ាន់ ហៅតូ អាយុ៣៤ឆ្នាំ មុខរបរជាអគ្គនាយកសន្តិសុខឯកជន និងស្ត្រីជាប្រពន្ធឈ្មោះ តាំ សុខឡី អាយុ៣១ឆ្នាំ ជាបុគ្គលិកណាហ្គាវើល មានទីលំនៅផ្ទះលេខ១១៤ ផ្លូវបេតុង ភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ ហើយជិះរថយន្តម៉ាក RANG ROVER ពណ៌ប្រផេះ ពាក់ស្លាកលេខភ្នំពេញ 2U 4448 ។
ចំណែកឯជនសង្ស័យឈ្មោះ ដួង ណាគ្រី ភេទប្រុស អាយុ៤៧ឆ្នាំ ជាអនុប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ពាក់សក្តិ៤កន្លះ ស្នាក់នៅផ្ទះលេខ៩៤៣ ផ្លូវលេខ៣៦០ សង្កាត់បឹងកេងកង៣ ខណ្ឌចំការមន បើករថយន្តម៉ាកឡិចស៊ីស RX 350 ពណ៌ស ពាក់ស្លាកលេខ សៀមរាប 2B 5153 ។
បើតាមជនរងគ្រោះបានឲ្យសមត្ថកិច្ចដឹងថា មុនពេលកើតហេតុ រូបគាត់ពីរនាក់ប្តីប្រពន្ធបានជិះរថយន្ត RANG ROVER ចេញពីហូបអាហារនៅហាង១២៣ ម្តុំផ្សារដើមគ ក្នុងគោលបំណងត្រលប់ទៅផ្ទះវិញ ស្ថិតនៅសង្កាត់និរោធ ខណ្ឌច្បារអំពៅ ដោយធ្វើដំណើរតាមមហាវិថីព្រះមុនីវង្ស ក្នុងទិសដៅពីជើងទៅត្បូង ។ លុះទៅដល់មុខអតីតក្លិបកម្សាន្តរ៉ក់ គាត់បានឈប់រថយន្តមួយភ្លែតដោយសារតែប្រពន្ធមិនសូវស្រួលខ្លួន រួចហើយក៏៏បានបើករថយន្តបន្តទៅមុខទៀត ស្រាប់តែពេលនោះមានរថយន្តឡិចស៊ីស RX៣៥០ ពណ៌ស ១គ្រឿង ដោយមានមនុស្សជិះ៣នាក់ បានបើកតាមពីក្រោយ ហើយស៊ីផ្លេដាក់រហូត ។
ជនរងគ្រោះបន្តថា ដោយឃើញសកម្មភាពយ៉ាងដូច្នេះ គាត់ជាជនរងគ្រោះបានឈប់រថយន្ត ហើយក៏សួរនាំទៅភាគីនោះថា មានរឿងអ្វី? តែត្រូវខាងរថយន្តនោះបាននិយាយគំរា.មរកចាប់ ។ ដោយទង្វើបែបទំនងមិនស្រួល គាត់ (ជនរងគ្រោះ) បានបើករថយន្តបម្រុងចូលទៅអធិការដ្ឋានខណ្ឌចំការមន ដើម្បីឱ្យសមត្ថកិច្ចជួយអន្តរាគមន៍ តែនៅពេលបើករថយន្តជិតដល់ច្រកចូលខណ្ឌ ក៏៏ត្រូវភាគីបើករថយន្តបង្កដេញតាមកៀរ នឹងបោះពាក្យសំដីថា «បើឯងខ្លាំងទៅខណ្ឌច្បារអំពៅ» ពេលនោះដែរ រូបគាត់ជាជនរងគ្រោះក៏យល់ព្រម បើករថយន្តទៅខណ្ឌច្បារអំពៅ ព្រោះផ្ទះគាត់នៅក្បែរនោះស្រាប់ ។
ជនរងគ្រោះបន្តថា ខណៈពេលបើកទៅដល់ក្បែររបងអធិការដ្ឋានខណ្ឌច្បារអំពៅ ស្រាប់តែរថយន្តបង្កបានបើកកាក់ពីមុខ នៅពេលគាត់បើកបត់ទៅរកច្រកចូលសាលាខណ្ឌ ក៏មានបុរសម្នាក់បានចុះពីលើរថយន្តដកកាំភ្លើងមិនស្គាល់ម៉ាក បាញ់ស្រោចលើរថយន្តរបស់គាត់ចំនួន៥គ្រាប់ផ្ទួនៗ បណ្តាលឱ្យបែក និងធ្លុះកញ្ចក់ក្រោយ ព្រមទាំងធ្វើឱ្យប្រពន្ធរបស់គាត់ភ័យ រហូតដល់សន្លប់តែម្តង តែសំណាងល្អមិនមានគ្រោះថ្នាក់ដល់អាយុជីវិត ។
ជនរងគ្រោះបន្តទៀតថា នៅពេលបាញ់ហើយ ជនបង្កមិនបានរត់ទៅណាទេ គឺបើករថយន្តចុះឡើងៗ រួចត្រឡប់មកកន្លែងដើមវិញ ក៏ត្រូវសមត្ថកិច្ចឃាត់ខ្លួន ព្រមទាំងដកហូតកាំភ្លើងខ្លីមួយដើមម៉ាករូឡូ និងរកឃើញសម្បកគ្រាប់ចំនួន៥គ្រាប់ ដោយនាំជនសង្ស័យទៅសាកសួរនៅអធិការដ្ឋានខណ្ឌច្បារអំពៅ តែម្តងទៅ ។
ក្រោយកើតហេតុ នាយឧត្តមសេនីយ៍ នេត សាវឿន អគ្គស្នងការនគរបាលជាតិ ក៏បញ្ជាឲ្យចាត់ការតាមវិន័យកងកម្លាំងលើអនុប្រធាននាយកដ្ឋាននគរបាលព្រហ្មទណ្ឌ ដែលបាញ់បោះធ្វើឲ្យកើតមានបាតុភាពភ្ញាក់ផ្អើលទាំងកណ្តាលយប់ពីសំណាក់មន្ត្រីនគរបាលម្នាក់នោះ និងបន្តអនុវត្តតាមផ្លូវច្បាប់ ដោយកសាងសំណុំរឿងជនសង្ស័យបញ្ជូនទៅកាន់សាលាដំបូងរាជធានីភ្នំពេញផងដែរ ។
បន្ទាប់មក សាលាដំបូងក៏បានបើកការស៊ើបអង្កេត នឹងឈានដល់បើកសវនាការផ្តន្ទាទោសលើជនបង្ក ដាក់ពន្ធនាគារកំណត់១០ឆ្នាំ ។ យ៉ាងណាមិញ ជនជាប់ចោទក៏បានខិតខំរើបម្រះប្តឹងឧទ្ធរណ៍ រហូតសាលាឧទ្ធរណ៍បើកសវនាការ សម្រេចផ្តន្ទាទោសដាក់ពន្ធនាគារកំណត់មកនៅត្រឹម៥ឆ្នាំវិញ នឹងតម្រូវឲ្យអនុវត្តក្នុងពន្ធនាគារតែ៣ឆ្នាំប៉ុណ្ណោះ ទោសដែលនៅសល់គឺព្យួរទាំងអស់ នេះសំណុំរឿងករណីលោក ដួង ណាគ្រី អតីតអនុប្រធាននាយកដ្ឋាននគរបាលព្រហ្មទណ្ឌ បើករថយន្តប៉ុនប៉ងសម្លា.ប់ប្តីប្រពន្ធនៅក្បែរអធិការដ្ឋានខណ្ឌច្បារអំពៅ ៕
ចែករំលែកព័តមាននេះ