លោកស្នងការ ស ថេត ៖ កុំចាំប្រជាពលរដ្ឋរាយការណ៍មក ទើបមន្ត្រីចាប់ផ្តើមធ្វើសៀវភៅគ្រួសារជូន!
រាជធានីភ្នំពេញ ៖ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១៥ កញ្ញា ២០២១នេះ…
រាជធានីភ្នំពេញ ៖ ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១៥ កញ្ញា ២០២១នេះ បានលើកឡើងថា «បម្រើរាស្ត្រឲ្យបានល្អ គឺជាការទទួលខុសត្រូវខ្ពស់របស់មន្ត្រី» ។ ការលើកឡើងបែបនេះ ដោយសារមានប្រជាពលរដ្ឋ ដែលធ្វើសៀវភៅគ្រួសារ ៣ទៅ៤ខែហើយ នៅឡើយមិនទាន់បានទៀត ក៏បានរាយការណ៍ ចូលមកផេកស្នងការដ្ឋាននគរបាលរាជធានីភ្នំពេញ ភ្លាមៗឧត្តមសេនីយ៍ឯក ស ថេត បានឆ្លើយតបថា «អរគុណ ក្រុមការងារនឹងស្រាវជ្រាវករណីនេះ» ។
ក្រោយពីទទួលបានការរាយការណ៍ពីប្រជាពលរដ្ឋ និងដោយអនុវត្តតាមការណែនាំជាប្រចាំរបស់ឧត្តមសេនីយ៍ឯក ស ថេត ក្រុមការងារព័ត៌មាន និងប្រតិកម្មរហ័សរបស់ស្នងការដ្ឋាននគរបាលរាជធានីភ្នំពេញ បានទាក់ទងទៅមន្ត្រីថ្នាក់ក្រោម ដើម្បីធ្វើការស្រាវជ្រាវ ដោះស្រាយ និងរៀបចំធ្វើ ប្រគល់ជូនប្រជាពលរដ្ឋភ្លាមៗ ផងដែរ ។
លោកស្នងការនគរបាលរាជធានីភ្នំពេញ ប្រាប់ទៅមន្ត្រីថ្នាក់ក្រោមតាមបណ្តាខណ្ឌ ប៉ុស្តិ៍ ថា សូមធ្វើការដោយយកចិត្តទុកដាក់ និងទទួលខុសត្រូវខ្ពស់ កុំរង់ចាំប្រជាពលរដ្ឋរាយការណ៍មក ទើបចាប់ផ្តើមធ្វើ ។
សូមបញ្ជាក់ថា កន្លងមក ការធ្វើសៀវភៅគ្រួសារ ជាសមត្ថកិច្ចរបស់ស្នងការដ្ឋាននគរបាលរាជធានី-ខេត្ត តែពេលនេះ លែងពិបាកសាំញ៉ាំច្រើនទៀតហើយ សៀវភៅគ្រួសារ ត្រូវចុះហត្ថលេខា ត្រឹមអធិការនគរបាលស្រុក ឬខណ្ឌ តែប៉ុណ្ណោះ។ ចំណែកឯសៀវភៅស្នាក់នៅ ក៏ត្រូវផ្ទេរពីអធិការដ្ឋាននគរបាលស្រុក ឬខណ្ឌ មកឲ្យត្រឹមប៉ុស្តិ៍នគរបាលរដ្ឋបាលឃុំ ឬសង្កាត់ ចុះហត្ថលេខាជំនួសវិញ ។
ចំពោះការសម្រួលការងារនេះ ត្រូវបានលោកឧត្តមសេនីយ៍ឯក ស ថេត បានប្រកាសនៅថ្ងៃទី០៣ ខែមិថុនា ឆ្នាំ២០២១ ថា សេវាកាន់តែទៅកៀកប្រជាពលរដ្ឋ ហើយមន្ត្រីទាំងអស់ ត្រូវតែបម្រើប្រជាពលរដ្ឋឲ្យបានល្អ ជាពិសេសការធ្វើសៀវភៅគ្រួសារ និងសៀវភៅស្នាក់នៅ ត្រូវតែធ្វើឲ្យបានឆាប់រហ័សបំផុត ព្រោះចុះហត្ថលេខា ត្រឹមលោកអធិការនគរបាលខណ្ឌ និងលោកនាយប៉ុស្តិ៍ តែប៉ុណ្ណោះ ។
ក្រោយការអនុវត្តតាមបទបញ្ជា និងការណែនាំជាប្រចាំរបស់លោកឧត្តមសេនីយ៍ឯក ស ថេត មួយរយៈពេលកន្លងមកនេះ មន្ត្រីថ្នាក់ក្រោមតាមបណ្តាខណ្ឌ ប៉ុស្តិ៍ ភាគច្រើន បានអនុវត្តការងារបម្រើប្រជាពលរដ្ឋបានយ៉ាងល្អ ជាពិសេស គឺការប្រើប្រាស់ពាក្យសម្តី និងកាយវិការសមរម្យជាមួយប្រជាពលរដ្ឋ ក៏ដូចជា ការផ្តល់សេវាជូនប្រជាពលរដ្ឋបានយ៉ាងឆាប់រហ័ស ។
ទោះជាយ៉ាងណា នៅតែមាន មន្ត្រីមួយចំនួនតូច អនុវត្តមិនទាន់បានល្អ ជូនប្រជាពលរដ្ឋ ។ ដូច្នេះលោកឧត្តមសេនីយ៍ ស្នងការ បានណែនាំឲ្យមន្ត្រីទាំងនោះ ត្រូវតែកែប្រែទម្លាប់មិនល្អ ហើយបម្រើប្រជាពលរដ្ឋឲ្យបានល្អ និងទទួលបាននូវភាពទុកចិត្ត និងជឿជាក់ពីសំណាក់ប្រជាពលរដ្ឋ ។
ស្នងការនគរបាលរាជធានីភ្នំពេញ ក៏បានប្រកាសជូនសាធារណជនថា បើមានករណីយឺតយ៉ាវ និងបម្រើប្រជាពលរដ្ឋមិនបានល្អ ពិសេសលើការងារចាត់តាំងថ្មី នៃការធ្វើសៀវភៅស្នាក់នៅ និងសៀវភៅគ្រួសារ សូមទំនាក់ទំនងលេខទូរសព្ទ៖ 069 516 999 ៕
ចែករំលែកព័តមាននេះ