ក្មេងធំឡើងឈ្លើយ ខ្វះសីលធម៌ ឬមានសីលធម៌គឺអាស្រ័យលើរបៀបចិញ្ចឹមបីបាច់របស់ឪពុកម្តាយឬអាណាព្យាបាលជាអ្នកឃុំគ្រងរក្សាផ្ទាល់ ។ បើលោកអ្នកចង់ឱ្យកូនធំឡើងមិនក្លាយជាក្មេងឈ្លើយ ឬខ្វះសីលធម៌ទេ ចូរបញ្ឈប់ធ្វើរឿងទាំង ៥យ៉ាងនេះភ្លាម ៖
១- ឈប់កាន់ជើងកូនតទៅទៀតពេលវាប្រព្រឹត្តមិនល្អ និងឈប់រកលេសការពារកូន បើខុស ឱ្យវាចេះទទួលកំហុស ។
២- បើក្មេងទទូចចង់បានអីបាននឹង ឯអ្នកតែងតែបំពេញតាមការទាមទាររបស់ក្មេង គឺដូចកំពុងធ្វើបាបកូនអ៊ីចឹង ។ ពិតណាស់ ឪពុកម្តាយគួរតែថ្នាក់ថ្នមបីបមកូនខ្លួនឱ្យបានប្រសើរ ប៉ុន្តែមិនត្រូវថ្នមជ្រុលពេកនោះទេ។ រៀនបដិសេធវា ហើយព្យាយាមប្រាប់កូនឱ្យយល់ពី តម្រូវការ និង ការចង់បានស្រេចតែចិត្ត យូរៗកូននឹងលែងយំទារអ្វីមួយស្រេចចិត្តទៀតហើយ ។
៣- កាលសម័យមុន គ្រូៗនិងអ្នកដទៃតែងស្តីបន្ទោសក្មេងឈ្លើយស្តែងៗ តែសម័យទំនើបនេះ គ្មាននរណាហ៊ានហាស្តីឱ្យកូនគេឡើយ ព្រោះខ្លាចរងសម្តីអសុរោះពីឪពុកម្តាយគេទប់មិនឈ្នះ ។ ឪពុកម្តាយឥឡូវមានទំនោរគិតគូរតែកូនខ្លួនឯង និងមិនចង់ស្តីប្រដៅកូនអ្នកដទៃទេ ប៉ុន្តែធាតុពិត ការបើកទូលាយឱ្យអ្នកដទៃជួយស្តីប្រដៅ នឹងជួយឱ្យកូនកាន់តែចេះគិតគូរនិងស្គាល់ហេតុផលបានច្រើន ។
៤- ឈប់ផ្គាប់ចិត្តក្មេងតាមគ្រប់រូបភាព ដែលនាំឱ្យកូនធំឡើងក្លាយជាមនុស្សសម្ភារនិយម ។ ផ្ទុយមកវិញ ត្រូវបង្ហាត់បង្ហាញកូនពីតម្លៃនៃការគោរព សីលធម៌ វិន័យ ទំនួលខុសត្រូវ និងការខិតខំព្យាយាមតស៊ូទើបប្រសើរជាង ។
៥- គ្មានឪពុកម្តាយណាចង់ឃើញកូនលំបាកទេ ប៉ុន្តែជួនកាលបើកូនស្រណុកពេក វានឹងលំបាកទៅថ្ងៃមុខ ។ ឱ្យកូនធ្វើការងារអ្វីមួយ ដែលជួយឱ្យវាយល់ពីតម្លៃនៃការតស៊ូ ។ ឱ្យកូនជួយធ្វើការងារផ្ទះក៏បាន ឬដាក់កិច្ចការអ្វីមួយឱ្យកូនធ្វើក៏បាន ដើម្បីបង្ហាញកូនៗថា គ្មានមហិច្ឆតាណាមួយអាចសម្រេចបានដោយគ្មានការប្រឹងប្រែងនោះឡើយ ៕ សាន សារិន
ចែករំលែកព័តមាននេះ