រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្ដ Lexus RX330 មួយគ្រឿង បានបើកលឿនទាំងមេឃកំពុងភ្លៀង រួចក៏ជ្រុលទៅបុកផ្ទប់របាំងថ្មពុះចែកទ្រូងផ្លូវ បណ្ដាលឲ្យរថយន្តបង្កជាប់លើទ្រូងផ្លូវ រងការខូចខាតទ្រូងផ្លូវមួយកង់ បន្ទាប់ពីបង្កហេតុរួច ម្ចាស់រថយន្តបានទាក់ទងអ្នកស្គាល់គ្នាមកជួយរុញរថយន្តចេញពីកន្លែងកើតហេតុ រួចយកទៅលាក់ទុកនៅក្នុងសាលាបឋមសិក្សាទួលគោក នៅក្បែរៗកន្លែងកើតហេតុ ហើយម្ចាស់រថយន្តវិញក៏គេចខ្លួនបាត់ស្រមោល ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៧យប់ ថ្ងៃទី១៤ ខែកញ្ញា ឆ្នាំ២០២១ ស្ថិតនៅតាមបណ្ដោយផ្លូវ២៨៩ ចំណុចស្តុបកងរាជអាវុធ ក្នុងសង្កាត់បឹងកក់១ ខណ្ឌទួលគោក ។
សេចក្តីរាយការណ៍បន្តថា រថយន្តបង្កខាងលើម៉ាក Lexus RX330 ពណ៌ស ពាក់ស្លាកលេខ ភ្នំពេញ2AQ-5972 រងការខូចខាតខ្ទេចមួយកំណាត់មុខ ។
ប្រភពព័ត៌មានពីប្រជាពលរដ្ឋនៅកន្លែងកើតបានប្រាប់ឲ្យដឹងថា មុនពេលកើតហេតុ គេបានឃើញរថយន្តបង្កធ្វើដំណើរតាមបណ្ដោយផ្លូវលេខ២៨៩ ទិសដៅពីជើងទៅត្បូង ក្នុងល្បឿនលឿន រួចឆ្លងផ្លូវមិនប្រយ័ត្ន ក៏ជ្រុលទៅបុកផ្ទប់នឹងរបាំងថ្មពុះចែកទ្រូងផ្លូវយ៉ាងពេញទំហឹង បណ្តាលរលំដួលអស់មួយកង់ ចំណករថយន្ដបង្ក ទើរជាប់នឹងលើទ្រូងផ្លូវនោះទៅមុខលែងរួច។
ប្រភពដដែលបន្តថា បន្ទាប់ពីបង្កហេតុរួច ម្ចាស់រថយន្តបង្កបានទាក់ទងអ្នកស្គាល់គ្នាមកជួយរុញរថយន្ដបង្កគេចចេញពីកន្លែងកើតហេតុ រួចយកទៅលាក់ទុកក្នុងសាលាបឋមសិក្សាទួលគោក ចំណែកឯម្ចាស់រថយន្តវិញបានគេចចេញពីកន្លែងកើតហេតុរត់បាត់ស្រមោល ។
ក្រោយពេលកើតហេតុ សមត្ថកិច្ចបានមកដល់កន្លែងកើតហេតុ រួចសាកសួរព័ត៌មានពីប្រជាពលរដ្ឋក៏ដឹងថា រថយន្តបង្កត្រូវបានម្ចាស់យកទៅលាក់ទុកក្នុងសាលាបឋមសិក្សាទួលគោកនៅក្បែរកន្លងកើតហេតុ រួចក៏រាយការណ៍ប្រាប់សមត្ថកិច្ចជំនាញមកវាស់វែង និងស្ទូចយករថយន្តទៅរក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោកនៃស្នងការការដ្ឋាននគរបាលរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ