មនុស្សគ្រប់រូបដែលបានកើតមកលើភពផែនដីនេះសុទ្ធតែមានបុណ្យព្រេងវាសនាខ្ពស់ជាងសត្វទាំង៤ពួកក្នុងអបាយភូមិ គួរណាស់តែខំបំពេញភារកិច្ច កាតព្វកិច្ចដែលមនុស្សគួរធ្វើភ្លាមៗ កុំទុកចាំស្អែកហើយស្អែកទៀត ព្រោះថាចំនួនអាយុជីវិតរបស់មនុស្សដែលអាចរស់មិនមានច្រើននោះទេ ដូច្នេះការងារមានប្រយោជន៍គួរធ្វើឱ្យបានលឿន ។
បើយើងរវិភាគឱ្យបានល្អិតល្អន់បន្តិចនោះ ចំនួនអាយុរបស់មនុស្សដែលអាចរស់នៅបាននាពេលបច្ចុប្បន្នគឺមានអាយុ៧៥ឆ្នាំគិតជាចំនួនមធ្យម ។ ចំពោះចំនួនអាយុជីវិតដែលគិតចាប់ពីថ្ងៃដែលបានកើតរហូតដល់ថ្ងៃរៀនចប់ចេញធ្វើការ គិតជាចំនួនមធ្យមគឺមានប្រមាណជាអាយុ២៥ឆ្នាំស្មើនឹង៣៣ភាគរយ ។
នេះអាចបញ្ជាក់បានថា គ្រាន់តែរៀនចប់ចេញធ្វើការភ្លាមយើងបានចាយភាគរយនៃជីវិតអស់រហូតដល់ទៅ៣៣ភាគរយបាត់ទៅហើយ ។ តើពីមួយថ្ងៃទៅមួយថ្ងៃយើងបានចំណាយភាគរយនៃជីវិតរបស់យើងទៅលើរឿងអ្វីខ្លះ តើរឿងនោះមានប្រយោជន៍ ឬឥតប្រយោជន៍យ៉ាងណា ? តែយើងមិនត្រូវភ្លេចថា ទោះយើងចំណាយទៅលើរឿងអ្វីក៏ដោយក៏ភាគរយនៃជីវិតបានចំណាយទៅលើរឿងនោះដែរ ។
ដូចនេះតើអ្នកគួរប្រើប្រាស់ភាគរយនៃជីវិតដោយរបៀបណា តើគួរធ្វើរឿងអ្វី គួរធ្វើសកម្មភាពបែបណា ទាំងអស់នេះគឺអ្នកជាអ្នកសម្រេចចិត្ដដោយខ្លួនឯង ។
បើនិយាយអំពីពេលវេលាក្នុងរវាង៤៥វស្សា ព្រះពុទ្ធនៃយើង ព្រះអង្គបានបែងចែកការងារយ៉ាងច្បាស់លាស់ណាស់ក្នុងរង្វង់២៤ម៉ោងសឹងតែរកពេលវេលាសម្រាកមិនបាន នេះក៏ដើម្បីប្រយោជន៍ដល់សព្វសត្វបានរួចចាកទុក្ខនៅក្នុងសង្សារវដ្តនេះ ៕ សាន សារិន
ចែករំលែកព័តមាននេះ