ADផ្ទាំងផ្សព្វផ្សាយពាណិជ្ជកម្ម

Picture

ហេតុ​អ្វី​បានជា​ព្រះ​អង្គ​សម្ដែង​អំពី​ទាន​មុនគេ ?

2 អាទិត្យ មុន

នៅ​ក្នុង​ពោធិសម័យ​៤៥​ព្រះ​វស្សា ព្រះពុទ្ធ​ទ្រង់​បំពេញ​ពុទ្ធកិច្ច​៥​យ៉ាង​ដោយ​គ្មាន​នឿយណាយ​ព្រះ​កាយពល​សោះឡើយ ។ ក្នុង​ពុទ្ធកិច្ច​៥​យ៉ាងនោះ​បាន​ពោល​ថា ពេល​ថ្ងៃរសៀល​ព្រះសម្មាសម្ពុទ្ធ​ទ្រង់​សម្ដែង​ព្រះធម៌ ។ ក្នុង​ពេល​នោះ ព្រះ​អង្គ​ទ្រ​ង់​ចាប់ផ្ដើម​សម្ដែង​អំពី​ទាន​ទុកជា​មុន ហើយ​ទ្រង់​សម្ដែង​អំពី​សីល ឋានសួគ៌…

នៅ​ក្នុង​ពោធិសម័យ​៤៥​ព្រះ​វស្សា ព្រះពុទ្ធ​ទ្រង់​បំពេញ​ពុទ្ធកិច្ច​៥​យ៉ាង​ដោយ​គ្មាន​នឿយណាយ​ព្រះ​កាយពល​សោះឡើយ ។ ក្នុង​ពុទ្ធកិច្ច​៥​យ៉ាងនោះ​បាន​ពោល​ថា ពេល​ថ្ងៃរសៀល​ព្រះសម្មាសម្ពុទ្ធ​ទ្រង់​សម្ដែង​ព្រះធម៌ ។ ក្នុង​ពេល​នោះ ព្រះ​អង្គ​ទ្រ​ង់​ចាប់ផ្ដើម​សម្ដែង​អំពី​ទាន​ទុកជា​មុន ហើយ​ទ្រង់​សម្ដែង​អំពី​សីល ឋានសួគ៌ កាមាទីនវៈ និង​នេ​ក្ខ​មៈ តាម​លំដាប់ ។

Picture

ដូច​ម្ដេច​ទើប​ទ្រង់​សម្ដែង​អំពី​ទាន​ជា​មុន ? ព្រោះ​ទ្រង់​ទត​ឃើញ​និស្ស័យ​សន្ដាន​របស់​មនុស្ស ដែល​ចាប់អារម្មណ៍​លើ​ទ្រព្យសម្បត្តិ ដែល​សុខចិត្ត​រស់នៅ​ជាមួយ​ទ្រព្យ​ដោយ​នឹកគិត​ថា​ជីវិត​ខ្ពង់ខ្ពស់​ដោយសារ​ទ្រព្យ ហើយ​ប្រើ​កម្លាំង​ទ្រព្យ​ជិះជាន់​អ្នក​ដទៃ​ដែល​គិតតែ​ពី​រស់​យករួចខ្លួន​តែ​ម្នាក់ឯង មិន​អើពើ​ដល់​ការ​រស់នៅ​របស់​អ្នក​ដទៃ ។

ក្នុង​ធម៌​ទេសនា​នោះ ព្រះ​អង្គ​ទ្រង់​ណែនាំ​ឲ្យ​មនុស្ស​លះបង់​ទ្រព្យសម្បត្តិ ធ្វើ​អំណោយ​ដល់​មនុស្ស​ដែល​ត្រូវធ្វើ​អំណោយ​មាន អ្នក​ទីទាល់​ក្រ​កំសត់​ទុរគត និង​អ្នក​រង​គ្រោះ​ដោយ​គ្រោះថ្នាក់​ធម្មជាតិ​ជាដើម ចិញ្ចឹម​មនុស្ស​ដែល​ត្រូវ​ចិញ្ចឹម មាន​មាតាបិតា ភរិយា ស្វាមី បុត្រ​ធីតា​ជាដើម ។

Picture

ជា​ពិសេស​ជាង​នេះ​ទៅ​ទៀត​ព្រះ​អង្គ​ទ្រង់​ពន្យល់​ថា ទ្រព្យសម្បត្តិ គេ​មិន​ត្រូវ​ស្រឡាញ់​ជាប់ចិត្ត ទាល់តែ​ចាយ​មិនកើត​ទេ ។ ទ្រព្យសម្បត្តិ​គេ​មិន​ត្រូវ​សន្សំ​ទុកដាក់​ប្រើប្រាស់ ជា​កម្លាំង​ជិះជាន់​អ្នក​ដទៃ​ទេ ។ ក្នុង​នាម​ជា​មនុស្ស​មិន​ត្រូវធ្វើ​ខ្លួន​ឲ្យ​ធ្លាក់​ដុនដាប​ទៅ​ជា​អ្នក​គោរព​បូជា​ទ្រព្យសម្បត្តិ​នោះ​ឡើយ ។ ជា​មនុស្ស​ត្រូវ​តែ​ជា​ចៅហ្វាយ​របស់ទ្រព្យ​សម្បត្តិ ហើយ​ត្រូវ​បំពេញ​មុខងារ​របស់​ខ្លួន​ដោយ​ទ្រព្យសម្បត្តិ ព្រោះ​បុគ្គល​គ្រប់​រូប​មិន​អាច​ពាំនាំ​យក​ទ្រព្យសម្បត្តិ​ទៅ​ជាមួយ​ខ្លួន​បាន​ទេ​នៅ​ពេល​ដែល​រូប​កាយ​នេះ​បែកធ្លាយ​ចាក​លោក​ទៅ ។

Picture

នេះ​អាច​បញ្ជាក់​ឲ្យ​យើង​ឃើញ​យ៉ាង​ច្បាស់​ថា ព្រះពុទ្ធ​បរមគ្រូ​នៃ​យើង​ទ្រង់​បាន​គិតដល់​ជីវភាព​របស់​មនុស្ស​ជាដំបូង ទើប​ព្រះ​អង្គ​ទ្រង់​សម្ដែង​អំពី​ទាន​មុន​អនុ​ព្វី​កថា​ដទៃ​ៗ​ទៀត ៕ សាន សារិន