ប្រធានាធិបតី អាមេរិក និងចិន សន្ទនាតាមទូរសព្ទជាលើកដំបូង
វ៉ាស៊ីនតោន ៖ សេចក្តីថ្លែងការណ៍របស់សេតវិមាន នៅថ្ងៃទី១០ កញ្ញា ២០២១នេះថា ប្រធានាធិបតីចិនលោក ស៊ី ជីនពីង បាននិយាយជាមួយសមភាគីអាមេរិកលោក…
វ៉ាស៊ីនតោន ៖ សេចក្តីថ្លែងការណ៍របស់សេតវិមាន នៅថ្ងៃទី១០ កញ្ញា ២០២១នេះថា ប្រធានាធិបតីចិនលោក ស៊ី ជីនពីង បាននិយាយជាមួយសមភាគីអាមេរិកលោក ចូ បៃដិន ជាលើកដំបូង ក្នុងរយៈពេល៧ខែ ចាប់តាំងពីប្រធានាធិបតី បៃដិន ឡើងកាន់តំណែង ។ មេដឹកនាំទាំងពីរ បានពិភាក្សា អំពីទំនួលខុសត្រូវរបស់ប្រជាជាតិទាំងពីរ ដើម្បីធានាថា ការប្រកួតប្រជែងមិនឈានទៅរកជម្លោះឡើយ នេះបើយោងតាម BBC ។
ទំនាក់ទំនងអាមេរិក-ចិន មានភាពតានតឹងខ្លាំងឡើង ដោយមានការប៉ះទង្គិចគ្នា លើបញ្ហាដូចជា ពាណិជ្ជកម្ម ចារកម្ម និងជំងឺរាតត្បាត ។
សេចក្តីថ្លែងការណ៍របស់សេតវិមាន បានបន្ថែមថា “មេដឹកនាំទាំងពីរ មានការពិភាក្សាជាយុទ្ធសាស្ត្រទូលំទូលាយ ដែលពួកគេបានពិភាក្សាអំពីតំបន់ដែលផលប្រយោជន៍របស់យើងរួមគ្នា និងតំបន់ដែលផលប្រយោជន៍គុណតម្លៃ និងទស្សនៈវិស័យ ខុសគ្នា” ។
សេតវិមាន «ការពិភាក្សានេះ ដូចដែលប្រធានាធិបតី បៃដិន បានបញ្ជាក់ច្បាស់ គឺជាផ្នែកមួយ នៃកិច្ចខិតខំប្រឹងប្រែងឥតឈប់ឈររបស់សហរដ្ឋអាមេរិកដើម្បីគ្រប់គ្រងការប្រកួតប្រជែងរវាងសហរដ្ឋអាមេរិក និង PRC ប្រកបដោយការទទួលខុសត្រូវ» ។
ទូរទស្សន៍រដ្ឋចិន ស៊ីស៊ីធីវី បានអត្ថាធិប្បាយផងដែរថា ការហៅទូរស័ព្ទនេះគឺ “ស្មោះត្រង់ និងស៊ីជម្រៅ” ដោយស៊ីស៊ីធីវី បន្តថា វាបានគ្របដណ្តប់លើ “ ទំនាក់ទំនងយុទ្ធសាស្ត្រទូលំទូលាយ និង… បញ្ហានៃការព្រួយបារម្ភទៅវិញទៅមក” ។
ទូរទស្សន៍រដ្ឋចិន ស៊ីស៊ីធីវី បានបន្ថែមថា “តើចិន និងអាមេរិកអាចដោះស្រាយទំនាក់ទំនងរបស់ពួកគេ បានត្រឹមត្រូវ ឬអត់ ? ទាំងនេះមានសារៈសំខាន់សម្រាប់អនាគត និងជោគវាសនារបស់ពិភពលោក” ។
ជាការកត់សម្គាល់ កាលពីដើមឆ្នាំ២០២១នេះ កិច្ចចរចាកម្រិតខ្ពស់ រវាងមន្ត្រីអាមេរិក និងមន្ត្រីចិន ពោរពេញដោយភាពតានតឹង នៃភាគីទាំងពីរ បានផ្លាស់ប្តូរការស្តីបន្ទោសគ្នាយ៉ាងខ្លាំងទៅវិញទៅមក ។
មន្ត្រីចិន បានចោទប្រកាន់សហរដ្ឋអាមេរិក ពីបទញុះញង់ឲ្យប្រទេសនានា វាយប្រហារមកលើប្រទេសចិន ខណៈដែលសហរដ្ឋអាមេរិក បាននិយាយថាប្រទេសចិន មានបំណងបញ្ចេញឬទ្ធិឲ្យគេស្ងើច និងមានបញ្ហាធំៗមួយចំនួន ដែលយក្សសេដ្ឋកិច្ចទាំងពីរ ប៉ះទង្គិចគ្នា ដោយសិទ្ធិមនុស្ស និងលទ្ធិប្រជាធិបតេយ្យ គឺជាចំណុចស្នូល ។
អាមេរិកចោទចិន ពីបទប្រល័យពូជសាសន៍ប្រឆាំង នឹងជនជាតិអ៊ុយហ្គួរ នៅក្នុងខេត្តស៊ីនជាំង ។ វាក៏និយាយផងដែរថា ទីក្រុងប៉េកាំង កំពុងជាន់ឈ្លី សិទ្ធិប្រជាធិបតេយ្យ នៅហុងកុង ជាមួយនឹងច្បាប់សន្តិសុខថ្មី ដែលទើបដាក់ចេញ ដែលក្រុមអ្នករិះគន់និយាយថា កំពុងត្រូវបានប្រើដើម្បីបង្ក្រាបការប្រឆាំងតវ៉ា ។
ជាមួយគ្នានេះ ចិនបានប្រាប់អាមេរិក ម្តងហើយ ម្តងទៀតថា ឈប់ជ្រៀតជ្រែកក្នុងអ្វីដែលទីក្រុងប៉េកាំង ចាត់ទុកថា ជាកិច្ចការផ្ទៃក្នុងរបស់ខ្លួនហើយចោទទីក្រុងវ៉ាស៊ីនតោនថា បានជេរប្រមាថគណបក្សកុម្មុយនិស្ត ដែលកំពុងកាន់អំណាច ។
ក៏មានបញ្ហាពាណិជ្ជកម្មផងដែរ ប្រទេសទាំងពីរ ត្រូវបានជាប់គាំងនៅក្នុងសង្គ្រាមពាណិជ្ជកម្ម ដែលបានចាប់ផ្តើមនៅឆ្នាំ២០១៨ ក្រោមការដឺកនាំរបស់ប្រធានាធិបតី ដូណាល់ ត្រាំ ។
សហរដ្ឋអាមេរិក បានដាក់ពន្ធលើទំនិញចិន ជាង៣៦០ពាន់លានដុល្លារ ហើយចិន បានសងសឹកលើពន្ធលើផលិតផលអាមេរិកជាង ១១០ពាន់លានដុល្លារវិញ ។
បន្ទាប់មក មានសមុទ្រចិនខាងត្បូង ក្នុងរយៈពេលប៉ុន្មានឆ្នាំចុងក្រោយនេះ វាបានក្លាយជាចំណុចប្រទាញប្រទង់ រវាងប្រទេសចិន និងប្រទេសដទៃទៀតនៅក្នុងតំបន់ ដែលទាមទារអធិបតេយ្យភាពលើប្រជុំកោះ២ ដែលគ្មានមនុស្សរស់នៅ គឺប៉ារ៉ាសែល និងស្ព្រាតលីស ។
ចិនទាមទារ សមុទ្រភាគច្រើន ប៉ុន្តែប្រទេសជិតខាងដែលមានជម្លោះ រួមនិងអាមេរិក មិនយល់ស្រប ។ ថ្វីបើ មានការប្រឆាំងក៏ដោយ ក៏ទីក្រុងប៉េកាំងបានបន្តពង្រីកវត្តមានយោធារបស់ខ្លួន នៅក្នុងតំបន់នេះ ។
យើងក៏អាចឃើញភាពតានតឹងលើអាហ្វហ្គានីស្ថានដែរ ចិនបានរិះគន់អាមេរិក ម្តងហើយម្តងទៀត ចំពោះការដកខ្លួនចេញពីអាហ្វហ្គានីស្ថាន ។
កាលពីដើមសប្តាហ៍នេះ អ្នកនាំពាក្យក្រសួងការបរទេសចិន លោក វ៉ាង វេនប៊ីន បាននិយាយវាយប្រហារអាមេរិកម្តងទៀត ដោយនិយាយថា កងទ័ពរបស់ពួកគេ បានធ្វើឲ្យអន្តរាយ ។ លោកក៏បានចោទប្រកាន់អាមេរិកថា បានធ្វើឱ្យខូចខាតយ៉ាងធ្ងន់ធ្ងរ ដល់ប្រជាជនអាហ្វហ្គានីស្ថាន ៕
ចែករំលែកព័តមាននេះ