ខេត្ដកណ្ដាល ៖ កម្មករ-កម្មការិនីរោង ចក្រផលិតស្បែកជើងយីហោ Tiger Wing បានដួលសន្លប់ជាបន្ដបន្ទាប់ជិត៥០នាក់ទៀត បង្កឱ្យមានការភ្ញាក់ផ្អើលយ៉ាងខ្លាំង ខណៈ ដែលពិធីប្រោះព្រំលើករាសី និងបណ្ដេញខ្មោចបិសាច កំពុងចាប់ផ្ដើម ដោយមានតាអាចារ្យ រៀបកិច្ចយ៉ាងត្រឹមត្រូវផងដែរ កាលពីវេលា ម៉ោងប្រមាណ៨ព្រឹកថ្ងៃទី៤ មិថុនា ឆ្នាំ ២០១០ នៅតំបន់សេដ្ឋកិច្ចពិសេសភ្នំពេញ ភូមិត្រញំងឈូក ឃុំកន្ទោក ស្រុកអង្គស្នួល។
រហូតមកដល់ពេលនេះមិនទាន់មានមន្ដ្រី ជំនាញណាមួយទៅពិនិត្យមើលក្នុងរោងចក្រ នោះរកពីមូលហេតុឱ្យបានច្បាស់លាស់នៅ ឡើយទេ គឺមានតែសមត្ថកិច្ច និងអាជ្ញាធរ មូលដ្ឋានប៉ុណ្ណោះដែលចុះទៅកាន់ទីនោះ ។ នេះគឺជាថ្ងៃទី៣ហើយដែលកម្មករ-កម្មការិនី រោងចក្រស្បែកជើងខាងលើដួលសន្លប់គួរឱ្យភ្ញាក់ផ្អើល ខណៈដែលពិធីប្រោះព្រំបណ្ដេញ ខ្មោចបិសាច និងលើករាសីកំពុងតែចាប់ផ្ដើម ដោយមានតាអាចារ្យប្រោះទឹកផ្កាម្លិះ និង បាញ់ទឹកអប់ដាក់កម្មករ ដើម្បីឱ្យកម្មករជ្រះ ស្រឡះពីគ្រោះចង្រៃផ្សេងៗ ។
ចំណែកព្រះ សង្ឃមិនទាន់និមន្ដមកដល់ទេ ប៉ុន្ដែពិធីប្រោះ ព្រំបានចាប់ផ្ដើមបណ្ដើរៗហើយ ។ កម្មករ-កម្មការិនីរោងចក្របាននាំគ្នាចូលធ្វើការតាមធម្មតា ស្រាប់តែមួយរំពេចនោះក៏មានអ្នក ដួលសន្លប់ជាបន្ដបន្ទាប់បង្កឱ្យមានការជ្រួល ច្របល់ពេញរោងចក្រ ។ ពិធីប្រោះព្រំត្រូវ ផ្អាកមួយភ្លែតសិន ព្រោះម្នាក់ៗរវល់ដឹក ជញ្ជូនអ្នកជំងឺទៅមន្ទីរពេទ្យ ។
សរុបរយៈពេល៣ថ្ងៃនេះ កម្មករ-កម្មកា រិនីរោងចក្រខាងលើបានដួលសន្លប់ប្រមាណ ១៥០នាក់ហើយ ប៉ុន្ដែពុំបណ្ដាលឱ្យមានអ្នក ស្លាប់បាត់បង់ជីវិតទេ ។ កម្មករ-កម្មការិនី បាននិយាយថា មុនដួលសន្លប់ពួកគេមាន អាការថប់ដង្ហើម ញ័រដៃ ជើង ងងឹតមុខ ឈឺ ក្បាល ហើយបន្ទាប់មកក៏បានដួលសន្លប់ ដោយមិនដឹងខ្លួនតែម្ដង ។ មានរឿងមួយ ទៀត គួរឱ្យព្រឺផងដែរ ទាក់ទងនឹងការដួល សន្លប់នេះ គឺមានកម្មការិនីផ្នែកអនាម័យម្នាក់ ត្រូវព្រលឹងខ្មោចូលក្នុងខ្លួន និងទាមទារឱ្យ មានការសែនព្រែននៅក្នុងរោងចក្រ ទើប បានសុខ បើមិនសែនមិនបានសុខនោះទេ ។
ក្រោយពីបានឃើញស្ដ្រីម្នាក់នោះត្រូវខ្មោច ចូល កម្មករ-កម្មការិនីទាំងអស់មានការភ័យ តក់ស្លុក ក៏បានដួលសន្លប់ជាបន្ដបន្ទាប់តែម្ដង រហូតដល់ថ្ងៃទី៤ មិថុនា នេះ ក៏នៅតែដួល សន្លប់ទៀត ។ ទាក់ទិននឹងព្រលឹងខ្មោចចូល នារីកម្មករផ្នែកអនាម័យនោះហើយ ទើបអ្នក ចាត់ការ និងថៅកែរោងចក្ររៀបចំចាត់ចែង ពិធីសែនព្រែនប្រោះព្រំជូនព្រលឹងខ្មោចនោះ… តែដឹងអី…ពេលកំពុងរៀបកិច្ចស្រាប់ តែកម្មករដួលសន្លប់ទៀត ៕
ចែករំលែកព័តមាននេះ