ខេត្តកំពត ៖ ពិតជាគួរឱ្យសង្វេគណាស់ដែលនារីម្នាក់ជាជនពិការគ-ថ្លង់និយាយមិនរួចឈ្មោះ គង់ ផល្លី អាយុ២៤ឆ្នាំ នៅភូមិឃ្លាំងខាងត្បូង ស្រុកកំពង់ត្រាច ខេត្តកំពត តាំងពីកើតមកដេកនៅតែលើកន្ទេលនៅសល់តែស្បែកដណ្តប់ឆ្អឹងតែប៉ុណ្ណោះ ហេតុអីអាជ្ញាធរខេត្តមើលមិនឃើញ ?
យោងតាមការរៀបរាប់ឱ្យដឹងពីស្ត្រីមេម៉ាយជាម្តាយមីងឈ្មោះ ថៃ សារុំ ហៅអុន អាយុ៥៨ឆ្នាំ បានប្រាប់កោះសន្តិភាពឱ្យដឹងកាលពីព្រឹកថ្ងៃទី៣ ខែកញ្ញាថា គាត់ជាស្ត្រីមេម៉ាយ ជាង១០ឆ្នាំមកហើយ ។ ស្ត្រីមេម៉ាយរូបនេះបានប្រាប់ទៀតថា គាត់មានកូនស្រីម្នាក់ ប៉ុន្តែកូនស្រីនោះគេមានគ្រួសារទៅនៅស្រុកឆ្ងាយ តែអ្វីដែលមានការលំបាកជាប្រចាំថ្ងៃ គឺចិញ្ចឹមចៅប្រុសអាយុ៧ឆ្នាំ ដែលកំព្រាម្ដាយឪពុក និងចិញ្ចឹមក្មួយស្រីឈ្មោះ គង់ ផល្លី អាយុ២៤ឆ្នាំដែលពិការស្វិតដៃជើងគ-ថ្លង់និយាយមិនរួច រស់ក្នុងស្ថានភាពស្បែកដណ្តប់ឆ្អឹង ។
ស្ត្រីចំណាស់បានរៀបរាប់បន្តថា នាង គង់ ផល្លី ពិការតាំងពីកំណើត ហើយម្ដាយរបស់គេឈ្មោះ សៅ យៀន មានគ្រួសារក្រោយក៏បានចេញទៅរកស៊ីបាត់ ដោយទុកឱ្យកូនស្រីជាជនពិការរស់នៅជាមួយជីដូនឈ្មោះ សៅ ធន ប៉ុន្តែលោកយាយបានស្លាប់ចោលនាងកាលពីឆ្នាំ២០២០មក ។
ស្ត្រីជាម្តាយមីងឱ្យដឹងទៀតថា លោកយាយ សៅ ធន និងនាង គង់ ផល្លី ជាជនពិការនេះត្រូវបានលោកប្រធានភូមិអាណិតមេត្តាទទួលប័ណ្ណសមធម៌ពីរាជរដ្ឋាភិបាល ដោយបើកបានសាច់ប្រាក់មួយខែ២០ម៉ឺនរៀល ។ ប៉ុន្តែពេលលោកយាយស្លា.ប់ទៅប័ណ្ណសមធម៌សម្រាប់បើកប្រាក់នោះ ត្រូវបានគេលុបឈ្មោះចេញបើកលុយលែងបានមកទល់សព្វថ្ងៃ ។
ស្ត្រីជាម្តាយមីងដែលមានមុខរបរទូលនំត្នោតលក់និយាយទៀតថា គាត់ទទួលបន្ទុកដូចជាលំបាកពេកហើយ ក្នុងការមើលថែក្មួយស្រីពិការដែលដេកតែលើកន្ទេល បត់ដៃបត់ជើងតូចធំលំបាកវេទនាពេកណាស់ ។ គាត់បានអំពាវនាវដល់អាជ្ញាធរមូលដ្ឋានឃុំភ្នំប្រាសាទ ស្រុកកំពង់ត្រាចមេត្តាជួយដាក់ឈ្មោះក្មួយស្រីក្រីក្រមួយផង ដែលមុននេះគេថាមិនដាក់ទេ ព្រោះគេមើលគាត់មានផ្ទះនៅ ។
គាត់បាននិយាយប្រាប់ថា ផ្ទះនេះសាងសង់កាលប្ដីគាត់មិនទាន់ចុះចោលជាង១០ឆ្នាំមកហើយមានតែសម្បកផ្ទះ ឯសសរពុកផុយអស់ហើយ ។ ស្ត្រីចំណាស់រៀបរាប់ទៀតថា ដោយសារតែជីវភាពខ្វះខាតគាត់បានធ្វើនំត្នោតយកទៅលក់នៅឯផ្សារថ្នល់បំបែកគ្រាន់បានកម្រៃខ្លះទិញអង្ករទុកហូប ។
ស្ត្រីមេម៉ាយរូបនេះបានអំពាវនាវដល់សប្បុរសជនមេត្តាជួយឧបត្ថម្ភដល់គ្រួសារគាត់តាមជាក់ស្ដែងផង ព្រោះកំពុងជួបប្រទះការខ្វះខាតជីវភាពប្រចាំថ្ងៃហៅមិនឮទេ ដូចរស់នៅកំដរស្លា.ប់តែប៉ុណ្ណោះ ។
លោក អ៊ាប គីម មេភូមិឃ្លាំងខាងត្បូងបានប្រាប់ឱ្យដឹងថា ស្ត្រីពិការគរថ្លង់នៅក្នុងភូមិទាំងអស់មានចំនួន១៤នាក់ ពេលនេះកំពុងធ្វើបទសម្ភាសន៍ជាមួយអាជ្ញាធរពាក់ព័ន្ធ តែត្រង់ថាបានអំណោយឬការឧបត្ថម្ភបែបណានោះលោកមិនទាន់ដឹងទេ ។
មហាជននិយាយថា ពិការភាពបែបនេះ សមណាស់ទទួលបានការឧបត្ថម្ភពីរដ្ឋហើយមិនសមធ្វើព្រងើយបែបនេះឡើយ ៕
ចែករំលែកព័តមាននេះ