តើ ៦ឃុំសង្កាត់ ទើបបង្កើតថ្មី មានឈ្មោះអ្វី? ហើយនៅឯណាខ្លះ?
- ភ្នំពេញ
ភ្នំពេញ៖ ឃុំសង្កាត់ ទើបបង្កើតថ្មី ទាំង ៦ឃុំសង្កាត់ គឺនៅខេត្តបាត់ដំបង ១ឃុំ នៅខេត្តក្រចេះ ១ឃុំ នៅខេត្តកំពង់ស្ពឺ…
ភ្នំពេញ៖ ឃុំសង្កាត់ ទើបបង្កើតថ្មី ទាំង ៦ឃុំសង្កាត់ គឺនៅខេត្តបាត់ដំបង ១ឃុំ នៅខេត្តក្រចេះ ១ឃុំ នៅខេត្តកំពង់ស្ពឺ ១ឃុំ នៅខេត្តបន្ទាយមានជ័យ ១ឃុំ និងនៅក្រុងប៉ោយប៉ែត ខេត្តបន្ទាយមានជ័យ ២សង្កាត់។
អនុក្រឹត្យ ស្តីពី ការកំណត់ចំនួនសមាជិកក្រុមប្រឹក្សាឃុំសង្កាត់ អាណត្តិទី៥ ចុះហត្ថលេខាដោយសម្តេចតេជោ នាយករដ្ឋមន្ត្រី ហ៊ុន សែន នៅថ្ងៃទី២៦ ខែសីហា ឆ្នាំ២០២១ ហើយត្រូវបានផ្សព្វផ្សាយ កាលពីថ្ងៃទី១ ខែកញ្ញា ឆ្នាំ២០២១ បង្ហាញថា នៅទូទាំងប្រទេសកម្ពុជា មានឃុំសង្កាត់ សរុបចំនួន ១៦៥២ឃុំសង្កាត់។ ក្នុងនោះ ឃុំសង្កាត់ បង្កើតថ្មី មានចំនួន ៦ឃុំសង្កាត់ ( ៤ឃុំ និង ២សង្កាត់ )។ ពោលគឺនៅទូទាំងប្រទេសយើង មាន ១៤០៩ឃុំ និង ២៤៣សង្កាត់។
រាជរដ្ឋាភិបាល បានសម្រេចបង្កើតឃុំសង្កាត់ថ្មី ចំនួន ៦ថែមទៀតនេះ ត្រូវចូលជាធរមាន សម្រាប់ការបោះឆ្នោតឃុំ-សង្កាត់ អាណត្តិទី៥ នាថ្ងៃទី៥ ខែមិថុនា ឆ្នាំ២០២២ ខាងមុខ។ សព្វថ្ងៃ នៅកម្ពុជា មានឃុំសង្កាត់ ចំនួន ១៦៤៦ឃុំសង្កាត់ ( ១៤០៥ឃុំ និង ២៤១សង្កាត់ )។
កាលពីថ្ងៃទី២០ ខែសីហា ឆ្នាំ២០២១ រាជរដ្ឋាភិបាល បានចេញអនុក្រឹត្យ ដាច់ដោយឡែកពីគ្នា ចំនួន ៦ ស្តីពីការសម្រេចបង្កើតឃុំសង្កាត់ថ្មី ចំនួន ៦ឃុំសង្កាត់។ ឃុំសង្កាត់ថ្មីទាំង ៦ រួមមាន៖
១-ឃុំបួវិល ក្នុងស្រុកបវេល ខេត្តបាត់ដំបង
២-ឃុំយាយម៉ៅពេជ្រនិល ក្នុងស្រុកភ្នំស្រួច ខេត្តកំពង់ស្ពឺ
៣-ឃុំអូរកណ្តៀរសែនជ័យ ក្នុងស្រុកសំបូរ ខេត្តក្រចេះ
៤-ឃុំបុស្បូវ ក្នុងស្រុកព្រះនេត្រព្រះ ខេត្តបន្ទាយមានជ័យ
៥-សង្កាត់អូរជ្រៅ ក្នុងក្រុងប៉ោយប៉ែត ខេត្តបន្ទាយមានជ័យ
៦-សង្កាត់អូរឬស្សី ក្នុងក្រុងប៉ោយប៉ែត ខេត្តបន្ទាយមានជ័យ
ក្រៅពីសម្រេចបង្កើតឃុំសង្កាត់ថ្មី សម្ដេចប្រមុខរាជរាជរដ្ឋាភិបាលកម្ពុជា កាលពីថ្ងៃទី២០ ខែសីហា ឆ្នាំ២០២១ ក៏បានចេញអនុក្រឹត្យ ស្ដីពី ការកែសម្រួលព្រំប្រទល់រដ្ឋបាលឃុំមួយចំនួនផងដែរ។ ក្នុងនោះ រួមមាន៖ ឃុំបឹងល្វា ឃុំកំពង់ថ្ម និងឃុំប្រាសាទ ក្នុងស្រុកសន្ទុក ខេត្តកំពង់ធំ ជាដើម។
ការបំបែក ឬបង្កើតរដ្ឋបាលឃុំសង្កាត់ថ្មីៗនេះ ត្រូវបានផ្អែកលើកត្តា២ គឺកត្តាប្រជាសាស្ត្រ និងភូមិសាស្ត្រ ក្នុងន័យដើម្បីឱ្យការបំរើសេវាសាធារណៈ ជូនពលរដ្ឋបានកាន់តែល្អប្រសើរ។
នៅកម្ពុជា បានរៀបចំការបោះឆ្នោតឃុំសង្កាត់ លើកដំបូង កាលពីថ្ងៃទី៣ ខែកុម្ភៈ ឆ្នាំ២០០២។ កាលណោះ កម្ពុជា មាន ១៦២១ឃុំសង្កាត់។ ក្នុងការបោះឆ្នោតឃុំសង្កាត់ អាណត្តិទី២ នៅឆ្នាំ២០០៧ ចំនួនឃុំសង្កាត់ ត្រូវបានរក្សាទុកដដែល គឺ១៦២១ឃុំសង្កាត់។ ចំណែកការបោះឆ្នោតឃុំសង្កាត់ អាណត្តិទី៣ នៅឆ្នាំ២០១២ កើនដល់ ១៦៣៣ឃុំសង្កាត់។ នៅឆ្នាំ២០១៧ កើនឡើងដល់ ១៦៤៦ឃុំសង្កាត់។ ចំណែកនៅឆ្នាំ២០២២ ការបោះឆ្នោតឃុំសង្កាត់ អាណត្តិទី៥ ដែលនឹងធ្វើឡើង នាថ្ងៃទី៥ ខែមិថុនា ឃុំសង្កាត់ ត្រូវកើនឡើងដល់ ១៦៥២ឃុំសង្កាត់ គឺកើនឡើង ៦ឃុំសង្កាត់៕ មុត ស្រីពៅ
ចែករំលែកព័តមាននេះ