ខេត្តព្រៃវែង ៖ សត្វគោ ក្របី របស់ប្រជាពលរដ្ឋនៅក្នុងខេត្តព្រៃវែងសរុបជាង៣៦ម៉ឺនក្បាលហើយ ក្នុងនោះសត្វគោក្របីចំនួន៦ម៉ឺនក្បាលទទួលបានការចាក់វ៉ាក់សាំងការពារនូវជំងឺផ្សេងៗ ស្របពេលដែលសត្វគោប្រមាណជាង៣០០ក្បាល កំពុងកើតជំងឺដុំពកលើស្បែក ។ នេះបើតាមការលើកឡើងរបស់លោក…
ខេត្តព្រៃវែង ៖ សត្វគោ ក្របី របស់ប្រជាពលរដ្ឋនៅក្នុងខេត្តព្រៃវែងសរុបជាង៣៦ម៉ឺនក្បាលហើយ ក្នុងនោះសត្វគោក្របីចំនួន៦ម៉ឺនក្បាលទទួលបានការចាក់វ៉ាក់សាំងការពារនូវជំងឺផ្សេងៗ ស្របពេលដែលសត្វគោប្រមាណជាង៣០០ក្បាល កំពុងកើតជំងឺដុំពកលើស្បែក ។
នេះបើតាមការលើកឡើងរបស់លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានដឹកនាំមន្ត្រីបសុព្យាបាលសត្វខេត្តចុះចាក់វ៉ាក់សាំងការពារជំងឺដុំពកលើស្បែកគោ ក្របី ពលរដ្ឋនៅក្នុងភូមិអ្នកតាជ័យ ឃុំគោកគង់លិច ស្រុកកញ្ជ្រៀច ខេត្តព្រៃវែង កាលពីថ្ងៃទី៣១ ខែសីហា ឆ្នាំ២០២១ ម្សិលមិញនេះ ។
លោក អ៊ុក សំណាង បន្តទៀតថា ចំពោះបញ្ហាដែលសត្វគោក្របីពលរដ្ឋកើតនូវជំងឺដុំពកលើស្បែកនេះ ក្រសួងសុខាភិបាលក៏បានផ្ដល់នូវវ៉ាក់សាំង ដើម្បីអោយមកមន្ទីរធ្វើការចាក់វ៉ាក់សាំងការពារដល់សត្វគោ ក្របី របស់បងប្អូនប្រជាពលរដ្ឋ ។ ហើយជំងឺដុំពកលើស្បែកគោក្របី សម្រាប់ខេត្តព្រៃវែង គឺទើបនឹងកើតមានឡើងរយៈពេលតែជាងមួយខែនេះប៉ុណ្ណោះ។ដែលជំងឺនេះមានការឆ្លងរហ័សពីសត្វគោមួយ ទៅសត្វគោមួយទៀត តាមរយៈសត្វរុយ និងសត្វបបោង ។
ដូច្នេះសូមអោយបងប្អូនម្ចាស់គោ ត្រូវបំបែកយកសត្វគោដែលកើតជំងឺដុំពកលើស្បែកបញ្ជូលអោយស៊ីស្មៅក្នុងក្រោល រួចដាក់មុងអោយជិត ។ រីឯសត្វគោក្របីណា មិនទាន់កើតក៏ត្រូវការពារដូចគ្នា ដាក់នៅដោយឡែកពីសត្វគោដែលកើតជំងឺនេះ ។
លោក អ៊ុក សំណាង បញ្ជាក់បន្ថែមថា ការចុះចាក់ថ្នាំវ៉ាក់សាំងបង្ការជំងឺដុំពកលើសត្វគោ ក្របីនេះ គឺអនុវត្តតាមវិធានការរបស់ក្រសួងកសិកម្ម រុក្ខាប្រមាញ់ និងនេសាទ ដល់សត្វគោ ក្របី ជូនបងប្អូនប្រជាពលរដ្ឋនៅតាមមូលដ្ឋានឲ្យបានទាន់ពេលវេលាដើម្បីបង្ការទប់ស្កាត់ការឆ្លងរាលដាលនៃជំងឺដុំពកលើស្បែកគោនេះកាន់តែច្រើនឡើងនៅក្នុងខេត្តព្រៃវែងផងដែរ ៕
ចែករំលែកព័តមាននេះ