រដ្ឋមន្ត្រីកសិកម្ម ៖ រដូវវស្សាឆ្នាំ២០២១ ការប្រមូលផលស្រូវស្រាលទទួលផលជាង១លានតោនលើផ្ទៃដីជាង៣០ហិកតា
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ថា ល្បឿនការងារប្រមូលផលស្រូវស្រាលដើមរដូវវស្សាឆ្នាំ២០២១ ចំនួន៣០២៣៣៧ហិកតា ដោយទទួលបានបរិមាណផលចំនួន១២៦៧ ៧៩១ តោន ។
លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសរសេរលើបណ្តាញសង្គមហ្វេសប៊ុកនាថ្ងៃទី២០ ខែសីហា ឆ្នាំ២០២១ បានឲ្យដឹងថា ការងារប្រមូលផលស្រូវស្រាលដើមរដូវសម្រេចបានចំនួន៣០២ ៣៣៧ហិកតា លើផ្ទៃដីអនុវត្តស្រូវស្រាលសរុប៨៩០ ៦៤៥ហិកតា ដោយទទួលបានបរិមាណផលសរុបចំនួន ១ ២៦៧ ៧៩១តោនលើសឆ្នាំមុន៧៨៩ ១៥១តោន ។ ទិន្នផលគិតជាមធ្យម ៤,១៩៣តោន ក្នុង១ហិកតា» ។
ដោយឡែក លទ្ធផលការងារបង្កបង្កើនផលដំណាំរដូវវស្សាឆ្នាំ២០២១ គិតត្រឹមថ្ងៃទី១៩ សីហា ក្នុងនោះរួមមាន ៖ លទ្ធផលភ្ជួររាស់រៀបចំដីសម្រេចបានចំនួន ២៧០១១៨៩ហិកតា ។ លទ្ធផលស្ទូង និងព្រោះសម្រេចបានចំនួន ២៦៥៨ ៧៥៦ហិកតា ស្មើនឹង១០១,៩០% នៃផែនការ២៦០៩ ០៦៥ហិកតាលើសឆ្នាំមុន២០៦ ៨៧០ហិកតា ។
ជាងនេះទៅទៀត ល្បឿនការងារបង្កបង្កើនផលដំណាំសាកវប្បកម្ម និងដំណាំឧស្សាហកម្មរដូវវស្សា ឆ្នាំ២០២១ អនុវត្ដបានចំនួន ៥១ ៥៣៧ហិកតា ស្មើនឹង ៩៥,៦៦% នៃផែនការ ៥៣ ៦៨៦ហិកតា តិចជាងឆ្នាំមុន ១៦៥ហិកតា ។ ចំពោះស្ថានភាពប៉ះពាល់ និងខូចខាត ដោយគ្រោះធម្មជាតិលោក វេង សាខុន លើកទៀតថា គិតត្រឹមថ្ងៃទី១៨ សីហា ដំណាំស្រូវនៅខេត្តចំនួន៤ រួមមាន ៖ ខេត្តបន្ទាយមានជ័យ កណ្តាល ពោធិ៍សាត់ និងសៀមរាប បានបន្តរងផលប៉ះពាល់ និងខូចខាតដោយគ្រោះរាំងស្ងួត ។
ដំណាំស្រូវដែលទទួលរងផលប៉ះពាល់សរុបចំនួន ៦៧ ៩៤២ហិកតា ស្មើនឹង ២,៥៦% នៃផ្ទៃដីដំណាំស្រូវអនុវត្តបានទូទាំងប្រទេស ។ លោកបានលើកឡើងទៀតថា តាមការវាយតម្លៃ ខេត្តបន្ទាយមានជ័យ កណ្តាល ពោធិ៍សាត់ និងសៀមរាប ផ្ទៃដីដំណាំស្រូវខូចខាតសរុបចំនួន១០ ៥៥៣ហិកតា និងស្តារ បានចំនួន២៣៧៦ហិកតា ៕
ចែករំលែកព័តមាននេះ