ព្រះសម្មាសម្ពុទ្ធបរមគ្រូសម្ដែងថា ប្រសិនបើឧបាសក ឧបាសិកាណាមួយជឿលើមង្គលភ្ញាក់ផ្អើលដូចជាជឿថា អ្នកមានបុណ្យផុសឯណេះ ផុសឯណោះជាដើមក្តី ហើយមិនជឿទៅលើកម្មផលរបស់ខ្លួន បែរជាទៅជឿលើវត្ថុផ្សេងៗដូចជា ការកាប់មិនមុត ដុតមិនឆេះថាជាមង្គល ហើយជឿទៅលើការរៀបចំពិធីបួងសួងសព្វគ្រប់ប្រការ ឧបាសកឧបាសិកាទាំងនោះ ឈ្មោះថាចណ្ឌាល គឺឧបាសកឧបាសិកាអន់ មិនមែនជាបុគ្គលដែលគួរឱ្យប្រាថ្នានៃពុទ្ធសាសនាឡើយ ។
បើឧបាសកឧបាសិកាណាជឿទៅលើកម្មផល ហើយចេះបដិបត្តិអប់រំកាយវាចាចិត្តទៅតាមធម៌វិន័យ ឧបាសកឧបាសិកានោះឈ្មោះថា រតនបាសកឧបាសិកា គឺឧបាសកឧបាសិកាស្ថិតនៅក្នុងភាពនៃជីវិតថ្លៃថ្នូរ ហើយនិងបានជាឧបាសកឧបាសិកាគួរលើកតម្កើង គួរគោរពបូជា ។
ប៉ុន្តែសព្វថ្ងៃនេះចំពោះរតនឧបាសក ឧបាសិកាមិនមានចំនួនច្រើនទេ ចំណែកឯចណ្ឌាលឧបាសកឧបាសិកាវិញ គឺមានចំនួនច្រើនណាស់ ឯអ្នកមិនប្រាកដជាអ្នកកាន់ព្រះពុទ្ធសាសនាវិញនោះក៏រឹតតែច្រើនណាស់ទៅទៀត ដូច្នេះហើយបានជាសង្គមសាសនាមួយនេះចេះតែអន់ថយជាលំដាប់ ។
ម្យ៉ាងទៀត អ្នកខ្លះបានជាប្រថុយខ្លួនធ្វើជាឧបាសកឧបាសិកាព្រោះមានផ្លូវមួយ គឺចង់យកពុទ្ធសាសនា ឬអំណាចសីលរបស់ខ្លួនទៅធ្វើជាវាំងននបាំងមុខដើម្បីជាអាជីពរបស់ខ្លួនតែប៉ុណ្ណោះ បុគ្គលអលជ្ជីឥតខ្មាសអៀនដូច្នោះគឺជាបុគ្គលបាប បុគ្គលពួកនេះហើយដែលធ្វើឱ្យព្រះពុទ្ធសានាថយចុះឥទ្ធិពល ។
សព្វថ្ងៃនេះមានអ្នកមិនស្អាតស្អំច្រើនណាស់ក្នុងព្រះពុទ្ធសាសនា ហើយពួកគេតែងធ្វើនូវអ្វីៗសព្វគ្រប់បែបយ៉ាងដើម្បីបាននូវលាភសក្ការៈតែម្យ៉ាងប៉ុណ្ណោះ ដោយយកព្រះពុទ្ធសាសនាធ្វើជាខែល វាំងនន សម្រាប់បិទបាំងដោយពុំខ្លាចកម្មពៀរវេរាអ្វីទាំងអស់ ៕ សាន សារិន
ចែករំលែកព័តមាននេះ