រាជធានីភ្នំពេញ ៖ បុរសវ័យកណ្តាលម្នាក់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារជាបណ្តោះអាសន្ន កាលពីវេលាថ្ងៃត្រង់ថ្ងៃទី១៣ ខែសីហា ឆ្នាំ២០២១ ក្រោមការចោទប្រកាន់ពីបទឆបោក ដោយមានស្ថានទម្ងន់ទោស ។
ការសម្រេចឃុំខ្លួនបុរសវ័យកណ្តាលរូបនោះ មានឈ្មោះ ហ៊ឹម សុភាព ហៅ ជា សុភាព អាយុ៥១ឆ្នាំ បន្ទាប់ពីតំណាងអយ្យការអមសាលាដំបូង បានបើកការសាកសួរជនសង្ស័យអស់រយៈពេល២ថ្ងៃ ទើបបានចោទប្រកាន់ជាផ្លូវការ ។
លោក ប្លង់ សុផល ព្រះរាជអាជ្ញារង នឹងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា តំណាងអយ្យការទទួលបន្ទុក បានបើកការស៊ើបសួររួចរាល់ហើយ និងបានចោទប្រកាន់ជនសង្ស័យពីបទឆបោក ដោយមានស្ថានទម្ងន់ទោស តាមមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ ។
ជនសង្ស័យត្រូវបានកម្លាំងសមត្តកិច្ចអង្គភាពប្រឆាំងអំពើពុក រលួយ ហៅកាត់ថា ACU ចាប់បញ្ជូនខ្លួនទៅកាន់សាលាដំបូងរាជធានីភ្នំពេញ កាលពីថ្ងៃទី១២សីហាម្សិលមិញនេះ ដែលសំណុំរឿងនេះ បានស្ថិតនៅលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងបើការស៊ើបសួរ ។
ក្រោយពីតំណាងអយ្យការបានធ្វើការចោទប្រកាន់ជាផ្លូវការហើយ សំណុំរឿងនោះត្រូវបានចាត់បញ្ជូនទៅខាងចៅក្រមស៊ើបសួរ ទើបចៅក្រមស៊ើបសួរសម្រេចឃុំខ្លួនបុរសនោះដាក់ពន្ធនាគារជាបណ្តោះអាសន្ន ។
ទាក់ទិនករណីខាងលើនេះ បើតាមប្រភពព័ត៌មានបានបង្ហើបឲ្យដឹងថា ជនសង្ស័យមានមុខរបរជាអ្នករត់ម៉ូតូឌុប តែបានដើរតួធ្វើជាមន្ត្រីបម្រើការងារនៅអង្គភាព… ដោយបានយកតួនាទីនោះទៅគំរាមយកប្រាក់ ពីមន្ត្រីរាជការសាធារណៈថ្នាក់ស្រុក.ខេត្ត រហូតបែកធ្លាយមានពាក្យបណ្តឹង ប្តឺងទៅអង្គភាពប្រឆាំងអំពើពុករលួយ ទើបឈានដល់ការចាប់ខ្លួននោះ ៕
ចែករំលែកព័តមាននេះ