វត្តអារាមក្នុងខណ្ឌឬស្សីកែវ កំពុងខ្វះខាតចង្ហាន់ និងបច្ច័យបង់ថ្លៃទឹកភ្លើង ខណៈកូវីដរាតត្បាត
- ភ្នំពេញ
រាជធានីភ្នំពេញ ៖ នៅក្នុងស្ថានភាពដែលកូវីដ១៩ កំពុងតែរាត្បាត វត្តអារាមនានានៅក្នុងរាជធានីភ្នំពេញក៏ដូចជានៅទូទាំងប្រទេស កំពុងតែប្រឈមមុខការលំបាកខ្វះទាំងចង្ហាន់, បច្ច័យសម្រាប់បង់ថ្លៃទឹក ភ្លើង និងបច្ច័យសម្រាប់ការកសាងសមិទ្ធផលនានាក្នុងវត្ត។ នៅក្នុងនោះក៏មានវត្តខ្លះ ទោះមានការលំបាកយ៉ាងណា ក៏នៅតែបន្តសាងសង់ ព្រោះព្រះសង្ឃមានចំណូលខ្លះៗបានមកពីការប្រោះព្រំ ស្រោចទឹក និងលើករាស្រីជាដើម។
ដោយឡែក នៅវត្តអារាមនានានៅក្នុងមូលដ្ឋានខណ្ឌឬស្សីកែវ ក៏បាននិងកំពុងតែជួបបញ្ហាខ្វះខាតទាំងចង្ហាន់ បច្ច័យបង់ថ្លៃទឹកភ្លើង ផងដែរ។ នេះបើតាមសង្ឃដីកាអោយដឹងពីព្រះមង្គលរក្ចិតវតនជោតិបណ្ឌិត ខឹម សម្បត្តិ ទីប្រឹក្សាសម្តេចអគ្គមហាសង្ឃរាជាធិបតី ទេពវង្ស, ព្រះអនុគណខណ្ឌឬស្សីកែវ ,ប្រធានសហគមន៍មូនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី ស្ថិតនៅខាងជើងអង់តែនទូរទស្សន៍ជាតិកម្ពុជា ស្ថិតក្នុងសង្កាត់ទួលសង្កែ១ ខណ្ឌឬស្សីកែវរាជធានីភ្នំពេញ។
ទោះបីជាយ៉ាងណា សម្រាប់វត្តរបស់ព្រះង្ឃបាននិងបន្តកសាងសាលាឆន្ទ ដែលជាសមិទ្ធផលមួយយ៉ាងធំស្កឹមស្កៃ ដែលមានតម្លៃប្រមាណ២លានដុល្លារ។ ព្រះតេជគុណ បណ្ឌិត ខឹម សម្បត្តិ មានសង្ឃដីកាអោយដឹងថា នៅក្នុងស្ថានភាពកូវីដ១៩ កំពុងតែរាតត្បាតនាបច្ចុប្បន្ននេះ ទីវត្តអារាមស្ងាត់ មិនសូវមានពុទ្ធបរិស័ទចេញ-ចូលធ្វើបុណ្យ និងយកចង្ហាន់មកប្រគេនព្រះសង្ឃច្រើនដូចពីមុនផ្ទុះកូវីដនោះទេ ដោយសារតែពុទ្ធបរិស័ទមានការព្រួយបារម្ភប្រុងប្រយ័ត្នពីសុវត្ថិភាព និងគោរពតាមវិធានការសុខាភិបាល ក៏ដូចជាប្រមុខរាជរដ្ឋាភិបាលកម្ពុជា ដែលបានដាក់ចេញនូវវិធានការនានា ដើម្បីទប់ស្កាត់ការរីករាលដាល់នូវជំងឺកូវីដ១៩។
ព្រះតេជគុណ បណ្ឌិត ខឹម សម្បត្តិ មានសង្ឃដីកាបន្តទៀតថា នៅក្នុងស្ថានភាពបែបនេះ វត្តអារាមនៅក្នុងមូលដ្ឋានខណ្ឌឬស្សីកែវ ទាំង៥វត្ត មានការខ្វះខាតបច្ច័យសម្រាប់បង់ថ្លៃទឹក ភ្លើង ក៏ដូចជាបច្ច័យសម្រាប់កសាងសមិទ្ធផលនានានៅក្នុងវត្តជាដើម។ មិនថា តែវត្តក្នុងខណ្ឌឬស្សីកែវនោះទេ គឺមានការខ្វះខាតស្ទើរគ្រប់វត្តនៅទូទាំងប្រទេសតែម្តង។ ណាមួយព្រះសង្ឃ ក៏ដូចជា ពុទ្ធបរិស័ទមានការភ័យខ្លាច និងព្រួយបារម្ភពីសុវត្ថិភាព ដោយពុទ្ធបរិស័ទពុំមានការជួបប្រមូលផ្តុំគ្នា ធ្វើបុណ្យទានផ្សេងៗឡើយ ហើយព្រះសង្ឃក៏ពុំដែលមានកម្មវិធីសូត្រមន្តដូចមុននោះទេ ។
ព្រះអង្គ មានសង្ឃដីកាអោយដឹងទៀតថា នៅក្នុងវត្តញាណរង្សី មានព្រះសង្ឃចំនួន១៧អង្គ និងគ្រហស្ថ ដែលជាតាយាយ និងសិស្ស និស្សិត ប្រមាណជាង១០នាក់ ដែលត្រូវបានព្រះអង្គទទួលរ៉ាប់រងទាំងអស់, ចង្ហាន់ សម័យកូវីដ មានការខ្វះខាត ក៏បានអោយចុងភៅដាំបាយ និងស្លបន្ថែម, ថ្លៃទឹក ភ្លើង ដោយទឹក២ខែ អស់ប្រមាណជាង១លានរៀល និងភ្លើង១ខែអស់ប្រមាណ១លាន២០ម៉ឺនរៀល។
ព្រះអនុគណខណ្ឌបានបញ្ជាក់ដែរថា កាលពីមុនវត្តញាណរង្សី ចង្ហាន់មិនដែលខ្វះខាតនោះទេ ក្នុង១ថ្ងៃៗមានពុទ្ធប្រមាណជិត១០០នាក់ បាននាំគ្នាទៅស្រោចទឹកប្រោះព្រំ និងទស្សន៍ទាយមើលខែឆ្នាំ តែឥឡូវនេះក្នុងមួយថ្ងៃមានពុទ្ធបរិស័ទមកស្រោចទឹក ប្រោះព្រំប្រមាណតែ៥ទៅ១០នាក់តែប៉ុណ្ណោះ ។ ទោះបីស្ថិតនៅក្នុងស្ថានភាពបែបនេះយ៉ាងណក៏ដោយ សម្រាប់វត្តញាណរង្សី ព្រះតេជគុណ បណ្ឌិតខឹម សម្បត្តិ នៅតែបន្តសាងសង់សាលាឆន្ទដ៏ធំមួយ ដែលមានទំហំ២៨,៨ម៉ែត្រគុណ៥០ម៉ែត្រមានកម្ពស់៣ជាន់ទាំងជាន់ផ្ទាល់ដី ដែលមានតម្លៃប្រមាណជិត២លានដុល្លារ ហើយពេលនេះសាងសង់បានប្រមាណ៨០ភាគរយហើយ ។
ព្រះតេជគុណ មានសង្ឃដីកាអោយដឹងទៀតថា ក្រៅពីកំពុងបន្តសាងសង់ ព្រះអង្គក៏នៅបន្តកៀរគរបច្ច័យ និងគ្រឿងឧបភោគ បរិភោគរួមជាមួយវត្តនានាក្នុងមូលដ្ឋាន ដើម្បីធ្វើជាមនុស្សធម៌ជួយដល់គណៈកម្មការអនុសាខាកាកបាទក្រហមកម្ពុជាខណ្ឌឬស្សីកែវ ក៏ដូចខណ្ឌនានាក្នុងរយៈពេល៣ខែម្តងដើម្បីយកទៅជួយដល់ជនរងគ្រោះ ជនទីទល់ក្រ គ្មានទីពឹង នានាជាដើម។ បច្ច័យទាំងបានមកពីពុទ្ធបរិស័ទមួយចំនួន ដែលមានជំនឿក្នុងពុទ្ធសាសនា ក៏ដូចជាជំនឿមកលើព្រះបារមីវត្តញាណរង្សី ក៏ដូចជាព្រះអង្គបាននាំគ្នាមកស្រោចទឹក ប្រោះព្រំ លើករាសី និងចេះតែសុខសប្បាយរកស៊ីមានបានកាកកបរហូតមកនោះ៕
ចែករំលែកព័តមាននេះ