សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញបញ្ជាបន្ទាន់ឱ្យរាជធានី-ខេត្ត នៅជួរខាងក្រោយ រៀបចំបន្ថែមនូវមណ្ឌលចត្តាឡីស័កតាមរាជធានី-ខេត្តនីមួយៗ សម្រាប់ត្រៀមដាក់ពលករខ្មែរមកពីប្រទេសថៃ
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចេញបញ្ជាបន្ទាន់ឱ្យរាជធានី-ខេត្ត នៅជួរខាងក្រោយ រៀបចំបន្ថែមនូវមណ្ឌលចត្តាឡីស័កតាមរាជធានី-ខេត្តនីមួយៗ សម្រាប់ត្រៀមដាក់ពលករខ្មែរមកពីប្រទេសថៃ ។ ជាមួយគ្នានោះ អ្នកធ្វើចត្តាឡីស័ក និងអ្នកជំងឺកូវីដ-១៩ កម្រិតស្រាល គឺត្រូវផ្ទេរទៅធ្វើចត្តាឡីស័កនៅតាមផ្ទះ ដើម្បីត្រៀមបម្រុងទទួលអ្នកធ្វើចត្តាឡីស័កថ្មី ដែលត្រូវដឹកជញ្ជូនពីព្រំដែនថៃ។ ជាមួយគ្នានោះផងដែរ សម្តេចបានបញ្ជាឱ្យត្រៀមបើកព្រំដែនឡើងវិញផងដែរ។
ក្នុងសារជាសំឡេងពិសេស នៅល្ងាចថ្ងៃទី៦ ខែសីហា ឆ្នាំ២០២១ ដែលមានរយៈពេលជាង១៤នាទី សម្តេចតេជោ បានសម្រេចឲ្យដឹកជញ្ជូនពលករខ្មែរមកពីប្រទេសថៃ ដែលធ្វើចត្តាឡីស័កបាន៧ថ្ងៃហើយ នៅតាមមណ្ឌលចត្តាឡីស័កតាមខេត្តជាប់ព្រំដែនថៃ ចូលមកកាន់រាជធានីខេត្ត នៅជួរក្រោយ ។
សម្តេចតេជោ បានបញ្ជាក់ថា វិធានការនេះគឺត្រូវរៀបចំជាបន្ទាន់ ព្រោះត្រូវយកមណ្ឌលចត្តាឡីស័ក នៅតាមព្រំដែនទុកសម្រាប់ប្រជាពលរដ្ឋខ្មែរយើង ដែលធ្វើដំណើរមកពីប្រទេសថៃ ជារៀងរាល់ថ្ងៃ ហើយពួកគេកំពុងជាប់នៅតាមបណ្តោយព្រំដែន ដោយសារតែការបិទខ្ទប់ព្រំដែន រវាងប្រទេសទាំងពីរ ចាប់តាំងពីថ្ងៃទី២៩ ខែកក្កដាមកនះ ។
យ៉ាងណាក៏ដោយ ជាវិធានការចំពោះមុខនិងសំខាន់បំផុតនោះ គឺសម្តេចតេជោ ហ៊ុន សែន បានបញ្ជាច្បាស់ៗថា បើប្រជាពលរដ្ឋខ្មែរយើងមកពីថៃទាំងនោះ មានជំងឺកូវីដ១៩ យើងត្រូវយកទៅព្យាបាល ហើយអ្នកមិនមានជំងឺ យើងផ្តល់ជំនួយជាសម្ភារៈ និងស្បៀងអាហារ។
ជាមួយគ្នានោះផងដែរ នៅពេលដឹកជញ្ជូនអ្នកកំពុងធ្វើចត្តាឡីស័ក តាមមណ្ឌលនៅតាមព្រំដែន ដែលមានចំនួនជាង១ម៉ឺននាក់ មកកាន់រាជធានីខេត្ត នៅជួរក្រោយអស់ហើយ គឺកម្ពុជាយើង នឹងបើកព្រំដែនឡើងវិញ ដើម្បីទទួលពលករខ្មែរ ចូលមកធ្វើចត្តាឡីស័ក នៅមណ្ឌលតាមព្រំដែនទាំងនោះ។ ក្នុងករណីចំនួនអ្នកមកពីថៃ លើសចំណុះ គឺត្រូវធ្វើតេស្តរកកូវីដនៅព្រំដែន ហើយដឹកជញ្ជូនមកកាន់មណ្ឌលចត្តាឡីស័ក នៅតាមរាជធានី-ខេត្ត នៅជួរក្រោយតែម្តង។ ការដឹកជញ្ជូននោះ ត្រូវប្រើប្រាស់ឡានកងទ័ព ដែលកំពុងត្រៀមប្រមាណ២០០គ្រឿង បន្ថែមទៀត។
ចែករំលែកព័តមាននេះ