ភ្នំពេញ ៖ បុរសជាអាជីវករម្នាក់បានទុកកាបូបលុយនៅលើក្បាលដំណេក រួចដេកលង់លក់ ដោយភ្លេចខ្ទាស់គន្លឹះទ្វារផ្ទះខាងក្រោយ បន្ទាប់មកត្រូវបានចោរចូលលួចយកអស់ រួចបោះចោលកាបូបនៅក្រៅបន្ទប់ ។
ក្រោយមកបុរសនេះក៏បានប្ដឹងនគរបាលឲ្យជួយអន្តរាគមន៍ ហើយកម្លាំនគរបាលនៃអធិការដ្ឋានខណ្ឌដង្កោ និងនគរបាលប៉ុស្តិ៍ក្រាំងពង្រដឹកនាំដោយលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានធ្វើការស្រាវជ្រាវរហូតឃាត់ខ្លួនជនសង្ស័យដែលជាមុខសញ្ញាចោរកម្មចំនួន៣នាក់ ព្រមទាំងដកហូតបានវត្ថុតាងមួយចំនួនផងដែរ រួចនាំទៅសាកសួរ និងចាត់ការតាមជំនាញ ។
ហេតុការណ៍នោះបានកើតឡើងកាលពីវេលាម៉ោង៤និង៣០នាទីជិតភ្លឺ ថ្ងៃទី០៤ ខែសីហា ឆ្នាំ២០២១ នៅចំណុចផ្ទះគ្មានលេខ ស្ថិតនៅតាមផ្លូវបេតុងភូមិក្រាំងពង្រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
ជនសង្ស័យខាងលើនោះមាន ១- ឈ្មោះផាន់ ភារម្យ ភេទប្រុសអាយុ១៩ឆ្នាំ ២- ឈ្មោះ ចាន់ ថា ភេទប្រុស អាយុ២១ឆ្នាំ និង៣-ឈ្មោះ ចាន់ រិទ្ធិ ភេទប្រុស អាយុ១៨ឆ្នាំ ជនសង្ស័យទាំង០៣នាក់មានទីលំនៅក្នុងភូមិកើតហេតុខាងលើ ។
នគរបាលដកហូតបានវត្ថុតាងពីជនខាងលើមួយចំនួនរួមមាន ទូរស័ព្ទដៃចំនួន០៣គ្រឿង (ម៉ាកIphone 6 ១គ្រឿង, ម៉ាកOPPO ១គ្រឿង, និងម៉ាក Lg G6 ១គ្រឿង) ព្រមទាំងក្រាមពណ៌សថ្លាសង្ស័យជាគ្រឿងញៀន១កញ្ចប់តូច ។ ចំណែកជនរងគ្រោះឈ្មោះ សុំ នឿន ភេទប្រុស អាយុ៤២ឆ្នាំ ជនជាតិខ្មែរ មុខរបរលក់ដូរ មានទីលំនៅក្នុងកើតហេតុនោះដែរ ដែលបានបាត់បង់លុយចំនួន៣,០០០,០០០រៀល (បីលានរៀល) និង២០០ដុល្លារអាមេរិក ,ទូរស័ព្ទដៃម៉ាកIphone ចំនួន០២គ្រឿង ។
នគរបាលបានប្រាប់ឲ្យដឹងថា« នៅវេលាយប់កើតហេតុជនរងគ្រោះបានទៅលេងផ្ទះបងប្អូន ហើយក្រោយពីវិលត្រឡប់មកដល់ផ្ទះវិញ ក៏បានរៀបចំកន្លែងសម្រាក ដោយទុកកាបូបស្ពាយពណ៌ឈាមជ្រូក០១ ដែលមានលុយ និងទូរស័ព្ទដៃចំនួន០៤គ្រឿង នៅលើគ្រែក្បាលដំណេក រួចដេកលង់លក់ទៅ ដោយពុំបានចាក់គន្លឹះទ្វារផ្ទះខាងក្រោយត្រឹមត្រូវទេ ។ » រហូតដល់វេលាម៉ោង០៤និង៣០នាទីជិតភ្លឺទើបភ្ញាក់ពីដំណេកដើរចេញទៅបត់ជើងតូចក៏បានឃើញកាបូបស្ពាយដែលជនរងគ្រោះដាក់នៅលើក្បាលដំណេកនៅខាងក្រៅបន្ទប់ទៅវិញ ។
ខណៈនោះជនរងគ្រោះក៏បានឆែកមើលទ្រព្យសម្បត្តិនៅក្នុងកាបូបស្រាប់តែបាត់អស់ ដោយក្រុមជនសង្ស័យលួចយកតែលុយ និងទូរស័ព្ទរួចបោះកាបូបចោល ហើយគាត់ក៏ប្រញាប់ប្រញាល់ទៅរាយការណ៍ និងដាក់ពាក្យប្ដឹងនៅប៉ុស្តិ៍នគរបាលរដ្ឋបាលក្រាំងពង្រ ។
ប្រភពដដែលបានបន្តទៀតថា ក្រោយទទួលបានបណ្ដឹងភ្លាមលោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោក៏បានបញ្ជា និងដឹកនាំកម្លាំងចេញអន្តរាគមន៍ ស្រាវជ្រាវរកជនសង្ស័យ ។ លុះដល់វេលាម៉ោង៤និង៤០នាទីល្ងាច ថ្ងៃខែឆ្នាំដដែលទើបឈានដល់ការឃាត់ខ្លួនជនសង្ស័យឈ្មោះ ផាន់ ភារម្យ បានម្នាក់បេតុងស្ថិតនៅភូមិក្រាំងពង្រ សង្កាត់ក្រាំងពង្រ ខណ្ឌដង្កោ ។
ដោយពេលនោះកម្លាំងបានដកហូតទូរស័ព្ទដៃម៉ាកIphone6 ដែលជារបស់ជនរងគ្រោះ១គ្រឿង និងទូរស័ព្ទដៃម៉ាកLg G6 ១គ្រឿងទៀតផងដែរ ។
ប្រភពដដែលបានឲ្យដឹងបន្តទៀតថា ក្រោយពេលឃាត់ខ្លួននាំយកទៅសាកសួរជនសង្ស័យនេះបានសារភាពថា ខ្លួនពិតជាបានធ្វើសកម្មភាពលួចយកលុយរបស់ជនរងគ្រោះមែន ហើយក៏មានបក្សពួក២នាក់ទៀតចូលរួមដែរ ។ បន្ទាប់ពីបានចម្លើយសារភាពនេះហើយទើបកម្លាំងនគរបាលបន្តទៅឃាត់ខ្លួនឈ្មោះ ចាន់ រិទ្ធ និងឈ្មោះ ចាន់ ថា ដែលជាបក្សពួកទៀតដល់ផ្ទះ ហើយដកហូតទូរស័ព្ទដៃម៉ាកOPPO ១គ្រឿង និងក្រាមពណ៌សថ្លាចំនួន០១កញ្ចប់តូច ហើយនាំទៅកាន់អធិការដ្ឋានគរបាលខណ្ឌដង្កោ រង់ចាំការកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ