រាជធានីភ្នំពេញ ៖ អនុវត្តទៅតាមបទបញ្ជារបស់លោក ឃួង ស្រេង អភិបាលរាជធានីភ្នំពេញ យ៉ាងហោចណាស់មនុស្សប្រុសស្រីចំនួន១៣នាក់ ត្រូវបានគណៈបញ្ជាការឯកភាពខណ្ឌពោធិ៍សែនជ័យធ្វើការឃាត់ខ្លួន ជាមួយនឹងការពិនិត្យយកសំណាក(តេស្តរហ័ស )ភ្លាមៗ…
រាជធានីភ្នំពេញ ៖ អនុវត្តទៅតាមបទបញ្ជារបស់លោក ឃួង ស្រេង អភិបាលរាជធានីភ្នំពេញ យ៉ាងហោចណាស់មនុស្សប្រុសស្រីចំនួន១៣នាក់ ត្រូវបានគណៈបញ្ជាការឯកភាពខណ្ឌពោធិ៍សែនជ័យធ្វើការឃាត់ខ្លួន ជាមួយនឹងការពិនិត្យយកសំណាក(តេស្តរហ័ស )ភ្លាមៗ ខណៈដែលពួកគេប្រមូលផ្តុំគ្នាពពាក់ពពូនផឹកស៊ីរាំច្រៀង ក្នុងហាងហូបចុកមួយកន្លែងផ្គើនបម្រាម ។
រដ្ឋបាលរាជធានីភ្នំពេញដែលត្រូវបិទបម្រាមគោចរ ចាប់ម៉ោង៩យប់ដល់ម៉ោង៣ភ្លឺ នៅក្នុងភូមិសាស្ត្ររាជធានីភ្នំពេញ សម្រាប់រយៈពេល ១៤ (ដប់បួន) ថ្ងៃគិតចាប់ពីម៉ោង២៣និង៥៩ នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ។
ប្រតិបត្តិការនេះ បានធ្វើឡើងកាលពីវេលាម៉ោង១០និង១០ នាទីយប់ថ្ងៃទី៤ ខែសីហានេះ នៅចំណុចទីតាំងហាង នីសាកែវព្រិល តាមបណ្តោយមហាវិមានឈ្នះឈ្នះ ហៅផ្លូវទំនប់កប់ស្រូវក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ ។
មន្ត្រីរដ្ឋបាលខណ្ឌពោធិសែនជ័យ បានអោយដឹងថា មុនពេលកើតហេតុទីតាំងខាងលើបានបង្កើតអោយ មានកម្មវិធីខួបកំណើតមួយ ដោយបានជួបជុំផឹកស៊ីជាមួយ និងការដាក់ធុងបាស់តាំងពីក្បាលព្រលប់រហូតដល់ម៉ោងបម្រាមគោចរនៅតែបន្តមិនឈប់ទៀត ។
លុះដល់វេលាកើតហេតុ កម្លាំងសមត្ថកិច្ចដែលចុះល្បាតក្នុងមូលដ្ឋានប្រទះឃើញក៏បានចុះធ្វើការបង្ក្រាបតែម្តង ដោយឃាត់ខ្លួនមនុស្សប្រុស ស្រីចំនួន១៣នាក់ ក្នុងនោះមានប្រុសម្នាក់ ។ ក្រោយពីការបង្ក្រាបអាជ្ញាធរបានទាក់ទងទៅក្រុមគ្រូពេទ្យ មកពិនិត្យយកសំណាក(តេស្តរហ័ស )ភ្លាមៗដែរ ប៉ុន្តែជាលទ្ធផលពួកគេទាំង១៣នាក់នោះ អវិជ្ជមានទាំងអស់គ្នា ។
ក្រោយមក អាជ្ញាធរមានសមត្ថកិច្ចក៏បានអប់រំណែនាំឱ្យទៅផ្ទះវិញ ។ ប៉ុន្តែសម្រាប់ បុរសម្នាក់ដែលជាថៅកែហាង ត្រូវសមត្ថកិច្ចនាំខ្លួន ទៅកាន់ស្នងការដ្ឋាននគរបាលរាជធានីដើម្បីចាត់ការតាមច្បាប់ ដោយមិនមានការលើកលែងឡើយ ។
ពាក់ព័ន្ធនឹងហាងផឹកស៊ីនេះដែរ កាលពីរសៀលថ្ងៃទី០៣ ខែសីហានេះ លោក ប៉ាង លីដា អភិបាលរងខណ្ឌ និងលោក យិន គា នាយករដ្ឋបាលខណ្ឌ បានដឹកនាំកម្លាំងចម្រុះគណៈបញ្ជាការខណ្ឌចុះបិទទីតាំង KTV ចំនួន៣ទីតាំង សរសេរស្លាកជាភោជនីយដ្ឋានហើយខាងក្នុង KTV ដែលនៅតែគឃ្លើនលួចបើកដំណើរការអាជីវកម្មល្មើសនឹងបម្រាមរបស់រាជរដ្ឋាភិបាលក្នុងការប្រយុទ្ធទប់ស្កាត់ការរីករាលដាលជំងឺកូវីដ១៩ ។
ទីតាំង KTV ទាំង៣ កន្លែងនេះស្ថិតនៅតាមបណ្ដោយផ្លូវ២០០៤ ក្នុងភូមិត្រពាំងល្វា២ សង្កាត់កាកាបទី១ ខណ្ឌពោធិ៍សែនជ័យ រួមមាន ៖ ១ ភោជនីយដ្ឋាន ពិភពតារ៉ារះ ២ភោជនីយដ្ឋាន រស្មី ពន្លឺពេជ្រ ៣ភោជនីយដ្ឋានបុប្ផារាជធានី ។
ក្នុងប្រតិបត្តិការចុះបិទទីតាំង KTV ទាំងបីកន្លែងនេះដែរ អាជ្ញាធរខណ្ឌពោធិ៍សែនជ័យបានដកហូតសម្ភារៈមួយចំនួន ព្រមទាំងរុះរើស្លាកយីហោ ជញ្ជាំងបិទបាំង ដែលល្មើសនឹងបទបញ្ជារបស់រាជរដ្ឋាភិបាល ប៉ុន្តែមិនបានឃាត់ខ្លួនម្ចាស់ទីតាំង ឬភ្ញៀវនោះទេ ៕
ចែករំលែកព័តមាននេះ