តាំងពីបរមបុរាណមក អ្នកជំនួញខ្មែកាត់ចិនតែងជឿជាក់លើអប្បិយជំនឿនាំលាភនាំសំណាងនាំទ្រព្យសម្បត្តិនៃរុក្ខជាតិដែលដាំក្នុងផ្ទះ ដែលជំនឿនេះនៅតែបន្តរហូតមកដល់សម័យទំនើបនេះ ហើយមានសភាពខ្លាំងក្លាជាងសម័យមុនទៀតផង ដោយពួកគេជឿថា ពពួករុក្ខជាតិនាំលាភសំណាងមួយចំនួនវាមិនត្រឹមតែជួយលើកកម្ពស់ស្មារតី និងរាសីទ្រព្យសម្បត្តិប៉ុណ្ណោះទេ តែវាក៏ជួយជំរុញសុខភាពរបស់អ្នកដាំផងដែរ ដោយសារតែសមត្ថភាពស្រូបយកខ្យល់កខ្វក់នៅជុំវិញផ្ទះរបស់ពួកវា ។
ប្រទាលត្រជាក់ត្រូវបានមជ្ឈមដ្ឋានខ្មែរកាត់ចិនដែលជឿងប់ងល់លើអប្បិយជំនឿនោះយល់ឃើញថា ជារុក្ខជាតិនាំលាភ នាំទ្រព្យសម្បត្តិចូលផ្ទះ។ អប្បិយជំនឿនេះត្រូវបានប្រណិប័តន៍ជាយូរមកហើយក្នុងសង្គមកូនខ្មែរកាត់ចិន ហើយពួកគេជឿថា ប្រសិនបើប្រទាលត្រជាក់នេះដុះបែកគុម្ភនៅពេលណា នោះមាសប្រាក់កែវកងនឹងរឹតតែហូរចូលផ្ទះរបស់ពួកគេកាន់តែសម្បូរហូរហៀរ ។
ប្រទាលត្រជាក់វាជារុក្ខជាតិជួយជំរុញស្មារតីខ្មែរកាត់ចិនឱ្យខិតខំប្រឹងប្រែងរកស៊ីសព្វកិច្ចការមិនមានថ្ងៃសម្រាកឡើយព្រោះតែមាសប្រាក់សម្បូរហូរចូល ហើយជាពិសេសនោះ វាជារុក្ខជាតិដែលងាយស្រួលដាំដោយមិនបាច់ថែទាំក៏ដុះលូតលាស់បានល្អ ហើយអាចដាំវាក្នុងផើងទុកក្នុងម្លប់ ក្នុងផ្ទះក៏រឹតតែពិសេស ៕ សាន សារិន
ចែករំលែកព័តមាននេះ