កូរ៉េខាងត្បូង រកឃើញ ២ករណីដំបូង អ្នកឆ្លងវីរុសកូវីដបំប្លែងថ្មី Delta Plus
ទីក្រុងសេអ៊ូល ៖ អាជ្ញាធរសុខាភិបាល គ្រប់គ្រង និងបង្ការជំងឺឆ្លង កូរ៉េខាងត្បូង (KDCA) បានប្រកាសនៅថ្ងៃអង្គារ ទី០៣ សីហានេះថា…
ទីក្រុងសេអ៊ូល ៖ អាជ្ញាធរសុខាភិបាល គ្រប់គ្រង និងបង្ការជំងឺឆ្លង កូរ៉េខាងត្បូង (KDCA) បានប្រកាសនៅថ្ងៃអង្គារ ទី០៣ សីហានេះថា…
ទីក្រុងសេអ៊ូល ៖ អាជ្ញាធរសុខាភិបាល គ្រប់គ្រង និងបង្ការជំងឺឆ្លង កូរ៉េខាងត្បូង (KDCA) បានប្រកាសនៅថ្ងៃអង្គារ ទី០៣ សីហានេះថា ប្រទេសកូរ៉េខាងត្បូង បានរកឃើញ ០២ករណីជាលើកដំបូង ចំពោះវីរុសកូវីដ-១៩ បំប្លែងខ្លួនប្រភេទថ្មី Delta Plus នេះបើតាមទីភ្នាក់ងារសារព័ត៌មាន Reuters ។
វីរុសកូវីដបំប្លែងថ្មី Delta Plus ដែលមានប្រភពដំបូង នៅក្នុងប្រទេសឥណ្ឌា បើតាមរបាយការណ៍ ប្រភេទ Delta Plus មានតិចតួចណាស់ រហូតមកដល់ពេលនេះ គេធ្លាប់រកឃើញវត្តមាន នៅប្រទេសអង់គ្លេស ព័រទុយហ្កាល់ និងឥណ្ឌា ។
អាជ្ញាធរសុខាភិបាលកូរ៉េខាងត្បូង បានប្រាប់អ្នកសារព័ត៌មានថា “ករណីដំបូង ត្រូវបានរកឃើញលើបុរសកូរ៉េខាងត្បូងម្នាក់ ដែលមានអាយុ ៤០ឆ្នាំ បើតាមការស្រាវជ្រាវ អ្នកជំងឺ មិនមានប្រវតិ្តធ្វើដំណើរទេ នាពេលថ្មីៗនេះ” ។
លទ្ធផលតេស្តលើមនុស្សដែលមានទំនាក់ទំនងជាមួយបុរសខាងលើ បានបង្ហាញថា សមាជិកគ្រួសារម្នាក់ របស់គាត់ មានវិជ្ជមាន ប៉ុន្តែអាជ្ញាធរសុខាភិបាលកូរ៉េខាងត្បូង មិនបានបញ្ជាក់ថា អ្នកជំងឺបានឆ្លងវីរុសកូវីដបំប្លែងថ្មី Delta Plus ឫកូវីដ-១៩ នោះទេ ។
អាជ្ញាធរសុខាភិបាល បាននិយាយបន្តថា “ករណីទី ២ ត្រូវបានរកឃើញ នៅលើអ្នកទេសចរជនជាតិបរទេសម្នាក់ ចូលមកកូរ៉េខាងត្បូង” ។
គិតត្រឹមថ្ងៃចន្ទ ទី០២ សីហា ម្សិលមិញនេះ ប្រទេសកូរ៉េខាងត្បូង រកឃើញករណីឆ្លងសរុបកើនឡើងដល់ ២០២.២០៣ករណី ដោយមានអ្នកស្លាប់សរុបចំនួន ២.១០៤នាក់ និងអ្នកជាសះស្បើយសរុប ១៧៧.៩០៩នាក់ ។
ប្រទេសកូរ៉េខាងត្បូង ត្រឹមថ្ងៃអង្គារនេះ បានចាក់វ៉ាក់សាំងឲ្យប្រជាជនរបស់ខ្លួន ប្រមាណ ២០លាននាក់ ឬ៣៩% នៃប្រជាជនគោលដៅ ។ ប្រទេសនេះ មានគោលបំណងផ្តល់វ៉ាក់សាំង យ៉ាងហោចណាស់ ៣៦លាននាក់ ត្រឹមខែកញ្ញា ខាងមុខនេះ ៕
ចែករំលែកព័តមាននេះ