ខេត្តបាត់ដំបង ៖ គ្មានសញ្ញាថមថយទេចំពោះការឆ្លងរាលដាលនៃជំងឺ«កូវីដ១៩»ពីមួយថ្ងៃទៅមួយថ្ងៃ សម្រាប់ពលរដ្ឋនៅក្នុងខេត្តបាត់ដំបង ។ នេះបើយោងលើតួលេខនៅក្នុងរបាយការណ៍ប្រចាំថ្ងៃរបស់រដ្ឋបាលខេត្ត ដែលបានផ្សព្វផ្សាយតាមបណ្ដាញសង្គម ។
បើតាមការកត់សម្គាល់លើរបាយការណ៍ គេសង្កេតឃើញចំនួនអ្នកឆ្លង និងអ្នកស្លា.ប់ហាក់មានសន្ទុះខ្លាំងក្នុងរយៈពេលមួយខែកក្កដាចុងក្រោយនេះ ។ របាយការណ៍ប្រចាំថ្ងៃរបស់រដ្ឋបាលខេត្ត ស្ដីពីការឆ្លងរាលដាលនៃជំងឺកូវីដ១៩ ដែលកោះសន្តិភាពទទូលបាន សម្រាប់រយៈពេលមួយខែកក្កដា ចុងក្រោយនេះ ដោយគិតចាប់ពីថ្ងៃទី០១ ដល់ថ្ងៃទី៣១ កក្កដា ២០២១ គេឃើញមានការកើនឡើងយ៉ាងខ្លាំងនូវចំនួនអ្នកឆ្លង និងចំនួនអ្នកស្លាប់ ដែលមានគម្លាតគ្នាឆ្ងាយខុសពីចំនួនអ្នកឆ្លង និងអ្នកស្លា.ប់ កាលពីអំឡុងខែមុនៗ ។
ហើយអ្នកឆ្លងមេរោគនេះ ភាគច្រើននៅក្នុងសហគមន៍ បន្ទាប់មកគឺពលករ ដែលបានវិលត្រឡប់មកពីប្រទេសថៃ ។ ចំនួនតួលេខដែលបានបូកសរុបក្រៅផ្លូវការ ផ្ទៀងផ្ទាត់តាមរបាយការណ៍ដែលរដ្ឋបាលខេត្ត បានចេញសេចក្ដីប្រកាសព័ត៌មានប្រចាំថ្ងៃ សម្រាប់ខែកក្កដា ចុងក្រោយនេះ គឺ មានអ្នកឆ្លងជំងឺ«កូវីដ ១៩» ដល់ទៅចំនួន២,៤៣០នាក់ ។ រីឯអ្នកស្លា.ប់មានដល់ទៅចំនួន៣៧នាក់ និង បានជាសះស្បើយចំនួន៩៤០នាក់ ខណៈមានអ្នកជំងឺចំនួន១,៤៥៣នាក់ កំពុងសម្រាកព្យបាលនៅឡើយ ។ បើពិនិត្យលើរបាយការណ៍សម្រាប់ខែកក្កដា កន្លងទៅនេះ គឺ ចន្លោះថ្ងៃតិចណាស់ ដែលមិនមានអ្នកជំងឺស្លា.ប់។
ថ្ងៃខ្លះអ្នកជំងឺបានស្លា.ប់បន្តបន្ទាប់ពី០៣នាក់ទៅ០៤នាក់ក្នុងមួយថ្ងៃ ដែលចំនួននេះបានធ្វើឲ្យថ្នាក់ដឹកនាំ ក៏ដូចប្រជាពលរដ្ឋនៅក្នុងខេត្ត មានក្ដីបារម្ភបំផុត។ ដោយសារតែក្ដីបារម្ភអំពីការកើនឡើង នៃការឆ្លងរាលដាលនូវជំងឺដ៏កាចសាហាវនេះ និងយោងលើការចាំបាច់របស់រដ្ឋបាលខេត្ត ទើបអភិបាលខេត្ត លោកងួន រតនៈ បានចេញសេចក្ដីសម្រេច កាលពីថ្ងៃទី៣១ កក្កដា ២០២១ ស្ដីពី «ការអនុវត្តវិធានការរដ្ឋបាលជាបណ្ដោះអាសន្ន ដើម្បីទប់ស្កាត់ការឆ្លងរាលដាល នៃជំងឺកូវីដ១៩ នៅក្នុងភូមិសាស្ត្រ ខេត្តបាត់ដំបង»។
សេចក្ដីសម្រេចនេះ បានបិទខ្ទប់ផ្សារទាំងតូច ទាំងធំ ជាបណ្ដោះអាសន្នក្នុងរយៈពេល១៤ថ្ងៃ ដោយសំដៅលើទីផ្សារទាំងឡាយណា ដែលស្ថិតក្នុងតំបន់ប្រឈមនឹងហានិភ័យខ្ពស់ជាមួយនឹងកូវីដ១៩។ បណ្ដាទីតាំងផ្សារដែលត្រូវបិទខ្ទប់ទាំង២៧កន្លែងនេះ មាននៅក្នុងក្រុងបាត់ដំបង០៨កន្លែង នៅស្រុកថ្មគោល០២កន្លែង នៅស្រុកសង្កែ ០៦កន្លែង នៅស្រុកមោងប្ញស្សី ៩កន្លែង និង នៅស្រុកកំរៀង ០២កន្លែង ។ អភិបាលខេត្តបាត់ដំបង លោក ងួន រតនៈ បានប្រកាសនៅក្នុងសេចក្ដីសម្រេចថា ទីតាំងផ្សារចំនួន២៧កន្លែង នៅក្នុងភូមិសាស្ត្រ ខេត្តបាត់ដំបង ត្រូវបានបិទខ្ទប់ជាបណ្ដោះអាសន្ន សម្រាប់រយៈពេល១៤ថ្ងៃ គិតចាប់ពីថ្ងៃទី០១ សីហា ដល់ថ្ងៃទី១៤ សូហា ២០២១។
គោលបំណងនៃការបិទខ្ទប់នេះ ដើម្បីទប់ស្កាត់ការឆ្លងរាលដាលក្នុងសហគមន៏ នៃមេរោគកូវីដ១៩ ជាពិសេស មេរោគបម្លែងថ្មីដែលតា (Delta)។ សូមបញ្ជាក់ថា ចាប់ផ្ដើមពីមានការឆ្លងរាលដាលជំងឺកូវីដ១៩មក សម្រាប់ខេត្តបាត់ដំបង គិតត្រិមថ្ងៃទី៣១ កក្កដា ២០២១ មានឆ្លងនូវជំងឺដ៏កាចសាហាវនេះ សរុបចំនួន៣,៣៧៦នាក់ហើយ ព្យាបាលជាសះស្បើយចំនួន២,០២៩នាក់ ស្លាប់ចំនួន៤៣នាក់ ខណៈអ្នកជំងឺចំនួន១៣០៤នាក់ កំពុងសម្រាកព្យាបាលនៅតាមមន្ទីរពេទ្យបង្អែក និង នៅតាមមណ្ឌលព្យាបាលនានា នៅក្នុងខេត្ត។
បើប្រៀបធៀបចំនួនអ្នកឆ្លងកូវីដ១៩ សរុបទាំងអស់ និងសម្រាប់តែក្នុងខែកក្កដា គឺខុសគ្នាឆ្ងាយណាស់។ បានន័យថា សន្ទុះនៃការឆ្លងរាលដាលនូវជំងឺកូវីដ១៩ នៅក្នុងខេត្តបាត់ដំបង មានការកើនឡើងកាន់តែខ្លាំង គួរឲ្យព្រួយបារម្ភបំផុត ៕
ចែករំលែកព័តមាននេះ