កំពត៖ នគរបាលស្រុកកំពង់ត្រាច កាលពីព្រឹកថ្ងៃទី២៨ ខែកក្កដា ឆ្នាំ២០២១ បានដាក់ការសង្ស័យថា ម៉ូតូមួយគ្រឿង ដែលក្រុមចោរ កាប់ប្លន់ពីជនរងគ្រោះ កាលពីប៉ុន្មានថ្ងៃមុន…
កំពត៖ នគរបាលស្រុកកំពង់ត្រាច កាលពីព្រឹកថ្ងៃទី២៨ ខែកក្កដា ឆ្នាំ២០២១ បានដាក់ការសង្ស័យថា ម៉ូតូមួយគ្រឿង ដែលក្រុមចោរ កាប់ប្លន់ពីជនរងគ្រោះ កាលពីប៉ុន្មានថ្ងៃមុន ហើយយកមកទម្លាក់ចោល ក្នុងប្រឡាយទឹក ជិតឡឥដ្ឋ ស្ថិតក្នុងភូមិដើមពោធិ ឃុំអង្គសូរភី ស្រុកកំពង់ត្រាច ខេត្តកំពត។ ប៉ុន្តែ ការចុះក្នុងប្រឡាយទឹកដាក់ខ្សែអូស ក្នុងប្រឡាយ រហូតជិតមួយគីឡូម៉ែត្រនោះ មិនឃើញម៉ូតូទេ។
ម៉ូតូនោះ ជារបស់បុរសម្នាក់ ឈ្មោះ អេន សុម៉ាល់ ជាកម្មករទឹកសុទ្ធ នៅភ្នំកំពង់ត្រាច ស្រុកកំពង់ត្រាច ខេត្តកំពត។ ម៉ូតូនោះ ត្រូវចោរសំឡុតយក កាលពីវេលាម៉ោង ១១យប់ថ្ងៃទី២២ ខែកក្កដា ឆ្នាំ២០២១។
ឈ្មោះ អេន សុម៉ាល់ បានជិះម៉ូតូសង់ 125 មួយគ្រឿង ផលិតឆ្នាំ២០២១ ដោយជិះម៉ូតូតែម្នាក់ឯង គឺចេញពីកន្លែងធ្វើការ នៅកំពង់ត្រាច តាមបណ្ដោយផ្លូវជាតិលេខ៣១ មកផ្ទះនៅភូមិតាតេន ឃុំសំរោងក្រោម ស្រុកបន្ទាយមាស ខេត្តកំពត។
ម្ចាស់ម៉ូតូ បានឲ្យដឹងថា ពេលមកដល់ចំណុចស្ពានឡឥដ្ឋ ដែលមានប្រឡាយទឹក ស្រាប់តែមានជនមិនស្គាល់មុខ បានជិះមូតូដេញតាម។ រហូតលុះដល់ចំណុចមុខវត្តរំពើន ឃុំស្ដេចគង់ខាងលិច ស្រុកបន្ទាយមាស ក្រុមមិនស្គាល់មុខនោះ បានកាក់ម៉ូតូជនរងគ្រោះ ជាប់ ហើយកាប់យកៗ កំហែងដោយហឹង្សាតែម្ដង គឺជនសង្ស័យ ស្ទាក់ប្លន់ ដោយកាប់ជនរងគ្រោះ ត្រូវចំនួន ២កាំបិត ចំដៃ និងខ្នង បណ្ដាលអោយជនរងគ្រោះ ដួលដេកតែម្នាក់ឯង។ បន្ទាប់មក ពួកក្រុមជនទាំងនោះ បានយកម៉ូតូជនរងគ្រោះ ជិះត្រឡប់ក្រោយវិញ គឺមកកំពង់ត្រាច បាត់ដំណឹងរហូត។
នៅព្រឹកថ្ងៃទី២៣ ខែកក្កដា លោក ឈឹម ឈាង ប្រធានការិយាល័យនគរបាលព្រហ្មទណ្ឌកំរិតធ្ងន់ បានចុះមកស្រាវជ្រាវប្លន់ម៉ូតូនេះ។ ប៉ន្តែការស៊ើបអង្កេតរបស់សមត្ថកិច្ច មិនទាន់បានទទួលជោគជ័យនៅឡើយទេ។ នគរបាលសន្និដ្ឋានថា ករណីនេះ ជារឿងគំនុំ ច្រើនជាងករណីកំហែងដោយហឹង្សា ឬប្លន់ម៉ូតូ៕ កែវ ឆាត
ចែករំលែកព័តមាននេះ