- ភ្នំពេញ
ភ្នំពេញ៖ ក្នុងពេលកូវីដឆ្លងរាលត្បាតទូទាំងប្រទេស រហូតដល់ពេលនេះ តាមវត្ត វិហារសាសនាគ្រឹស្ត និងអ៊ិស្លាមសាសនា ជាដើម ក៏បានឆ្លងកូវីដដែរ។ ក្នុងនោះ យ៉ាងហោចណាស់…
ភ្នំពេញ៖ ក្នុងពេលកូវីដឆ្លងរាលត្បាតទូទាំងប្រទេស រហូតដល់ពេលនេះ តាមវត្ត វិហារសាសនាគ្រឹស្ត និងអ៊ិស្លាមសាសនា ជាដើម ក៏បានឆ្លងកូវីដដែរ។ ក្នុងនោះ យ៉ាងហោចណាស់ មានព្រះសង្ឃ នៅក្នុងវត្ត នៅភ្នំពេញជាង ២០០អង្គ បានឆ្លងជំងឺកូវីដ១៩ និងមានព្រះសង្ឃ ១អង្គ បានសុគត។
របាយការណ៍របស់មន្ទីរធម្មការ និងសាសនា រាជធានីភ្នំពេញ បង្ហាញថា ក្នុងព្រឹត្តិការណ៍ឆ្លងសហគមន៍ ២០កុម្ភៈ នៅក្នុងរាជធានីភ្នំពេញ រហូតមកដល់ពេលនេះ បានធ្វើឱ្យព្រះសង្ឃ ក្នុងវិស័យព្រះពុទ្ធសាសនា ចំនួន ២១២អង្គ បានឆ្លងជំងឺកូវីដ១៩ អ៊ិស្លាមសាសនា ចំនួន ២៩៩នាក់ គ្រីស្ទសាសនាចំនួន ១០០នាក់ និងសាសនាមហាយាន ចំនួន ១២នាក់ បានឆ្លងជំងឺកូវីដ១៩។ ក្នុងនោះ មានព្រះសង្ឃ ១អង្គ បានសុគត ដោយសារតែជំងឺកូវីដ១៩។
នៅភ្នំពេញ មកដល់ថ្ងៃទី២៨កក្កដានេះ មានវត្តព្រះពុទ្ធសាសនា ចំនួន ១២វត្ត បានឆ្លងកូវីដ ដោយមានព្រះសង្ឃ ចំនួន ២១២អង្គ។ ក្នុងនោះ មានព្រះសង្ឃ ១៣៧អង្គ បានជាសះស្បើយ និងព្រះសង្ឃ ៧៥អង្គ កំពុងសម្រាកព្យាបាលជំងឺកូវីដ។ វត្តចំនួន ៨ កំពុងបិទខ្ទប់ និងធ្វើចត្តាឡីស័ក នៅក្នុងភូមិសាស្ត្ររាជធានីភ្នំពេញ។
ព្រះសង្ឃ ដែលបានឆ្លងជំងឺកូវីដ-១៩ និងវត្ត ដែលកំពុងធ្វើចត្តាឡីស័ក និងវត្តបានបញ្ចប់ការធ្វើចត្តាឡីស័ក នៅក្នុងរាជធានីភ្នំពេញ រួមមាន៖ ទី១-វត្តសារាវ័ន្តតេជោ ព្រះសង្ឃបានឆ្លងជំងឺកូវីដ១៩ មានចំនួន ៥០អង្គ ជាសះស្បើយ ៤៩អង្គ សុគត ១អង្គ។ វត្តនេះ បានបញ្ចប់ការធ្វើចត្តាឡីស័កហើយ។ ទី២- វត្តបទុមវតី ព្រះសង្ឃបានឆ្លងជំងឺកូវីដ១៩ មានចំនួន ១៤អង្គ ជាសះស្បើយ ១អង្គ សម្រាកព្យាបាល១៣អង្គ កំពុងធ្វើចត្តាឡីស័ក។ ទី៣- វត្តកោះមេត្តាពោធិវង្ស ព្រះសង្ឃបានឆ្លងជំងឺកូវីដ១៩ មានចំនួន ៧អង្គ ជាសះស្បើយ ៧អង្គ បានបញ្ចប់ការធ្វើចត្តាឡីស័កហើយ។ ទី៤- វត្តចង្ក្រានតាព្រហ្មស្ទឹងមានជ័យ ព្រះសង្ឃ បានឆ្លងជំងឺកូវីដ១៩មានចំនួន ៣៧អង្គ ជាសះស្បើយ ៣៧អង្គ បានបញ្ចប់ការធ្វើចត្តាឡីស័កហើយ។ ទី៥-វត្តដំបូកខ្ពស់ ព្រះសង្ឃបានឆ្លងជំងឺកូវីដ១៩ មានចំនួន ៣អង្គ កំពុងសម្រាកព្យាបាល ៣អង្គ និងកំពុងធ្វើចត្តាឡីស័ក។ ទី៦- វគ្គមហាមន្ត្រី ព្រះសង្ឃបានឆ្លងជំងឺកូវីដ១៩ មានចំនួន ៤៨អង្គ ជាសះស្បើយ ៤១អង្គ កំពុងសម្រាកព្យាបាល ៧អង្គ កំពុងធ្វើចត្តាឡីស័ក។ ទី៧- វត្តសាក់សំពៅ ព្រះសង្ឃបានឆ្លងជំងឺកូវីដ១៩ មានចំនួន ២អង្គ ជាសះស្បើយ ២អង្គ បានបញ្ចប់ការធ្វើចត្តាឡីស័កហើយ។ ទី៨- វគ្គតេជោឧកញ៉ាវាំង ព្រះសង្ឃបានឆ្លងជំងឺកូវីដ១៩ មានចំនួន ២អង្គ កំពុងសម្រាកព្យាបាល និងកំពុងធ្វើចត្តាឡីស័ក។ ទី៩- វត្តវារិន្ទព្រែកលៀប ព្រះសង្ឃបានឆ្លងជំងឺកូវីដ១៩ មានចំនួន ២១អង្គ កំពុងសម្រាកព្យាបាល កំពុងធ្វើចត្តាឡីស័ក។ ទី១០- វត្តទួលទំពូង ព្រះសង្ឃបានឆ្លងជំងឺកូវីដ១៩ មានចំនួន២០អង្គ កំពុងសម្រាកព្យាបាល និងកំពុងធ្វើចត្តាឡីស័ក។ ទី១១- វត្តអរុណវតី ព្រះសង្ឃបានឆ្លងជំងឺកូវីដ១៩ មានចំនួន ៤អង្គ កំពុងសម្រាកព្យាបាល និងកំពុងធ្វើចត្តាឡីស័ក។ ទី១២- វត្តជុំព្រះសង្ឃ បានឆ្លងជំងឺកូវីដ១៩ មានចំនួន ៤អង្គ កំពុងសម្រាកព្យាបាលជំងឺ និងកំពុងធ្វើចត្តាឡីស័ក។
ចំពោះអ៊ីស្លាមសាសនា គ្រីស្ទសាសនា និងសាសនាផ្សេងៗ ដែលឆ្លងជំងឺកូវីដ-១៩ ក្នុងព្រឹត្តិការណ៍២០កុម្ភៈ នៅក្នុងរាជធានីភ្នំពេញ រួមមាន៖ ទី១-អ៊ិស្លាមសាសនា អ្នកវិជ្ជមានកូវីដ១៩ ចំនួន ២៩៩នាក់ ជាសះស្បើយចំនួន ២៦១នាក់ កំពុងធ្វើចត្តាឡីស័កចំនួន ៣៨នាក់ និងស្លាប់ ៦នាក់។ ទី២- គ្រីស្ទសាសនា អ្នកវិជ្ជមានកូវីដ១៩ ចំនួន ១០០នាក់ ជាសះស្បើយ ចំនួន ៩៨នាក់ កំពុងធ្វើចត្តាឡីស័ក ចំនួន ២នាក់។ ទី៣- សាសនាមហាយាន មានអ្នកវិជ្ជមានកូវីដ១៩ ចំនួន ១២នាក់ ជាសះស្បើយចំនួន ១២នាក់។
ដោយឡែក ក្រសួងធម្មការ និងសាសនា បានប្រកាសថា គិតត្រឹមឆមាសទី១ ដើមឆ្នាំ២០២១ នៅទូទាំងប្រទេស មានព្រះសង្ឃ ប្រមាណ ២៣៩អង្គ បានឆ្លងជំងឺកូវីដ១៩។ ក្នុងនោះ រាជធានីភ្នំពេញ និងខេត្តត្បូងឃ្មុំ ឈានមុខគេ ដោយមានព្រះសង្ឃឆ្លងច្រើនជាងគេ ហើយក៏មានព្រះសង្ឃ ២អង្គ បានសុគតដោយសារជំងឺកូវីដ១៩។
របាយការណ៍បញ្ជាក់ថា ក្នុងឆមាសទី១ ក្នុងដើមឆ្នាំ២០២១នេះ នៅរាជធានីភ្នំពេញ មានព្រះសង្ឃចំនួន ១៣៤អង្គ បានឆ្លងកូវីដ១៩ និងសុគត ១អង្គ។ ខេត្តកណ្តាល ឆ្លង ១អង្គ។ ខេត្តកំពត ឆ្លងចំនួន ១០អង្គ។ ខេត្តត្បូងឃ្មុំ មានករណីឆ្លង ចំនួន ៨៨អង្គ ខេត្តព្រៃវែង មានចំនួន ៤អង្គ និងសុគត ១អង្គ។ ខេត្តស្វាយរៀង មានករណីឆ្លងចំនួន ១អង្គ។ ខេត្តកំពង់ចាម មានករណីឆ្លង ១អង្គ។
ពាក់ព័ន្ធបញ្ហាជំងឺកូវីដ១៩នេះ កន្លងមក ក្រសួងធម្មការ និងសាសនា បានចេញសេចក្តីណែនាំជាច្រើនមកហើយ និងបានដាក់ចេញនូវសារាចរណែនាំ សង្ឃប្រកាសនានា អោយអនុវត្តន៍រួចហើយ ដើម្បីការពារ និងទប់ស្កាត់ការឆ្លងរាលដាលកូវីដ១៩ ក្នុងវត្តអារាម និងក្នុងវិហារសាសនានានា។
ក្នុងនោះ ក្រសួងធម្មការ និងសាសនា ក៏តែងតែជំរុញអោយមន្ត្រីធម្មការ សហការជាមួយអាជ្ញាធរដែនដី និងវត្តអារាម ឬក៏វិហារសាសនានានា ដើម្បីអនុវត្តកិច្ចការងារ ដែលត្រូវធ្វើនៅចំពោះមុខ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ជាពិសេសមិនឲ្យមានការជួបជុំប្រារព្ធពិធីសាសនា ទាំងនៅក្នុងវត្ត នៅវិហារសាសនា និងនៅតាមផ្ទះ ដែលមានការប្រមូលមនុស្សច្រើនឡើយ។
យ៉ាងណាក៏ដោយ ក្នុងពេលព្រះសង្ឃ ដែលបានប៉ះពាល់ និងកំពុងធ្វើចត្តាឡីស័ក ដោយត្រូវបិទខ្ទប់វត្តអារាមនោះ គឺអាជ្ញាមូលដ្ឋាន បានអនុវត្តន៍តាមសេចក្តីណែនាំរបស់ក្រសួងសុខាភិបាល និងបានជួយឧត្ថម្ភ និងប្រគេនព្រះសង្ឃនូវគ្រឿងឧបភោគបរិភោគផ្សេងៗ។ ចង្ហាន់ ត្រូវបានសន្សំសំចៃ ហើយបែងចែកប្រគេនព្រះអង្គ ឆាន់នៅតាមកុដ្ឋិ ដែលព្រះសង្ឃគង់នៅ ក្នុងវត្តនិមួយៗ ដោយមិនមានការឆាន់ចង្ហាន់រួម ដែលមានការប្រមូលផ្តុំដូចមុនទៀតនោះទេ។
តាមបទពិសោធន៍នៃការឆ្លងកូវីដ១៩ ចូលក្នុងវត្តនាពេលកន្លងមក យ៉ាងហោចណាស់ មានហេតុផល ៤យ៉ាង រួមមាន៖ ១-ឆ្លងតាមព្រះសង្ឃ និមន្តចេញបិណ្ឌបាត្រ ក្រៅវត្ត ២-ឆ្លងតាមសិស្សនិស្សិត ឬអ្នកនៅវត្ត ដែលបានទៅធ្វើការ ហើយនៅកន្លែងធ្វើការនោះ ឆ្លងកូវីដ ៣-ពុទ្ធបរិស័ទ យកចង្ហន់ទៅប្រគេនព្រះសង្ឃក្នុងវត្ត ក្រោយមក រកឃើញពុទ្ធបរិស័ទនោះ កើតកូវីដ ហើយក៏ឆ្លងដល់ព្រះសង្ឃ និងហេតុផលទី៤ គឺតាអាច្ចារ្យ ឬអ្នករស់នៅក្នុងវត្ត បានចេញទៅក្រៅវត្ត ទៅហាងកាហ្វេ នៅជិតៗវត្ត ហើយក្រោយមក ទីកន្លែងទាំងនោះ ក៏ផ្ទុះការឆ្លងកូវីដ។ រីឯអ្នកនៅវត្ត ទៅកន្លែងកើតកូវីដទាំងនោះ ក៏រកឃើញឆ្លងកូវីដផងដែរ។
ទាំង ៤ចណុចនេះ ជាហេតុផលនៃការឆ្លងកូវីដ ចូលក្នុងវត្ត ពិសេសវត្តនៅរាជធានីភ្នំពេញ ក្នុងពេលកន្លងមក។ កន្លងមក ចាប់តាំងពីផ្ទុះនូវការឆ្លងកូវីដខ្លាំង មានវត្តខ្លះ បានបិទទ្វារខ្លួនឯង ដោយសារតែបារម្ភខ្លាចឆ្លងកូវីដ។ ប៉ុន្តែដោយសារតែហេតុផលប៉ុន្មានចំណុចខាងលើនេះហើយ ក៏បណ្តាលឲ្យព្រះសង្ឃ និងអ្នកនៅក្នុងវត្តច្រើននាក់ផ្សេងទៀត បានឆ្លងកូវីដ។
នៅក្នុងរដូវចូលព្រះវស្សារយៈពេល ៣ខែនាពេលនេះ ជាពេលវេលាសមគួរ ដែលព្រះសង្ឃ ត្រូវស្ថិតនៅតែក្នុងវត្ត ហាក់ដូចជា ព្រះសង្ឃ ធ្វើចត្តាឡីស័កដូច្នោះដែរ។ ក៏ប៉ុន្តែអ្វីដែលជាបញ្ហាតាមវត្តជាច្រើន ក្នុងពេលកូវីដឆ្លងរាតត្បាតនេះ គឺចង្ហាន់សម្រាប់ព្រះសង្ឃ ខណៈដែលប្រជាពុទ្ធបរិស័ទ ដែលមានសទ្ធាធ្វើបុណ្យទាន ក៏ហាក់ដូចជា ថយចុះ ដោយសារតែបញ្ហាកូវីដនេះតែម្តង។ ដូច្នេះអាជ្ញាធរសមត្ថកិច្ច តាមរាជធានីខេត្ត ក្រុងស្រុកខណ្ឌ ក៏សូមទំនុកបម្រុងចង្ហាន់ប្រគេនព្រះសង្ឃ ស្របតាមសេចក្តីណែនាំរបស់ប្រមុខរាជរដ្ឋាភិបាល ក្នុងពេលកន្លងមក។ រីឯប្រជាពុទ្ធបរិស័ទនានា ក៏នៅតែអាចធ្វើបុណ្យបាន ដោយព្រះសង្ឃ បើកទទួលចង្ហាន់ នៅក្លោងទ្វាររៀងរាល់ព្រឹក ទោះបីជាវត្តជាប់ធ្វើចត្តាឡីស័ក ក៏ដោយ។
កន្លងមក វិធានសុខាភិបាល និងអនាម័យ ក៏ត្រូវបានអនុវត្តយ៉ាងម៉ឺងម៉ាត់នៅតាមវត្តអារាម។ ប៉ុន្តែដើម្បីចៀសវាងនូវការឆ្លងកូវីដ តាមវត្តអារាមតទៅទៀត ក៏គួរតែទប់ស្កាត់នូវចំណុចទាំង ៤ខាងលើ គឺព្រះសង្ឃ និមន្តចេញបិណ្ឌបាត្រ ឬក៏ទៅកន្លែង ដែលមានហានិភ័យ អ្នករស់នៅក្នុងវត្ត ក៏មិនត្រូវចេញក្រៅវត្ត បើមិនចាំបាច់ រីឯប្រជាពុទ្ធបរិស័ទ ទៅប្រគេនចង្ហាន់ ក៏ត្រូវរក្សាគម្លាតសុវត្ថិភាព ពោលគឺអាចប្រគេននៅត្រឹមក្លោងទ្វារ ហើយឃ្លាតពីព្រះសង្ឃ តាអាច្ចារ្យ យាយជី ដោយត្រូវពាក់ម៉ាស និងប្រើអាល់កុលលាងដៃឲ្យញឹកញាប់ ជាដើម៕
ចែករំលែកព័តមាននេះ