ភ្នំពេញ៖ បុរសចំណាស់ម្នាក់ បានចតម៉ូតូ នៅមុខផ្ទះមួយភ្លែត ស្រាប់តែលេចមុខជនសង្ស័យម្នាក់ បានលួចកាច់កម៉ូតូ តែមិនបានសម្រេច ព្រោះគាត់ដឹងខ្លួនទាន់ និងស្រែកឆោឡោ ផ្អើលដល់កម្លាំងអន្តរាគមន៍ខណ្ឌដូនពេញ ជួយប្រដេញ តាមឃាត់បានភ្លាមៗ កាលពីវេលាម៉ោង ៨ និង ៣០នាទីយប់ថ្ងៃទី២៦ ខែកក្កដា ឆ្នាំ២០២១ នៅផ្ទះមួយកន្លែង មានទីតាំងនៅតាមបណ្ដោយផ្លូវ២០៨ កែងផ្លូវលេខ៥១ សង្កាត់បឹងរាំង ខណ្ឌដូនពេញ។
ប្រភពពីម្ចាស់ម៉ូតូរងគ្រោះ បានប្រាប់ឲ្យដឹងថា មុនកើតហេតុ គឺគាត់បានឈប់ម៉ូតូមួយគ្រឿងម៉ាក ហុងដា គុប នៅមុខផ្ទះ តាមបណ្ដោយផ្លូវ២០៨ កែងនឹងផ្លូវលេខ៥១។ ពេលគាត់ដើរចូលផ្ទះមួយភ្លែត ស្រាប់តែលេចមុខជនសង្ស័យម្នាក់ បានមកលួចបណ្តើរម៉ូតូគាត់ចេញពីមុខផ្ទះ និងកាច់បំបែកគ្រាប់សោរម៉ូតូគាត់ ប៉ុនប៉ងលួច ហើយភ្លាមៗនោះ រូបគាត់ដឹងខ្លួនទាន់ ក៏ស្រែកឆោឡោ ផ្អើលដល់ប្រជាពលរដ្ឋ ធ្វើអោយជនសង្ស័យភ័យស្លន់ស្លោ រត់មកដល់ផ្លូវលេខ២០០ ក៏ត្រូវកម្លាំងល្បាតខណ្ឌដូនពេញ ប្រទះឃើញ ក៏ឃាត់ខ្លួនតែម្តង។
ជនសង្ស័យ ដែលសមត្ថកិច្ចឃាត់ខ្លួនបាន មានឈ្មោះ ស៊ឹម ទី ហៅ អាស្វាយ អាយុ ៣៧ឆ្នាំ មុខរបរ និង ស្នាក់នៅ មិនពិតប្រាកដ។ បន្ទាប់ពីឃាត់ខ្លួន ជនសង្ស័យខាងលើ ត្រូវបានសមត្ថកិច្ច បញ្ជូនខ្លួនទៅកាន់ប៉ុស្តិ៍នគរបាលបឹងរាំង ដើម្បីសាកសួរនាំ និងចាត់ការបន្តតាមនីតិវិធី៕
ចែករំលែកព័តមាននេះ