ខេត្តតាកែវ ៖ ប្រជាពលរដ្ឋក៏ដូចជាមន្ត្រីរាជការ រស់នៅក្នុងក្រុងដូនកែវកណ្តាលបេះដូងខេត្តតាកែវ រយៈពេលជិត១ខែមក មានក្រុមហ៊ុនមួយកំពុងតែសម្រុកដឹកដីចាក់លុបដីបឹង ដែលអ្នកមានលុយម្នាក់ ដោយមិនបានគ្របនឹងធ្វើអោយផ្លូវក្រាលកៅស៊ូក្នុងក្រុងបានក្លាយទៅដីឥដ្ឋរអិលទៅវិញ មិនតែប៉ុណ្ណោះឡានដឹកដីទាំងអស់នោះ បានធ្វើអោយខូចផ្លូវជាច្រើនកន្លែងថែមទៀតផង ។
ប្រជាពលរដ្ឋក៏ដូចជា មន្ត្រីដដែលបានបន្តទៀតថា ក្រុមហ៊ុនដែលមានសិទ្ធពេញលេញយកការកាយដីបឹងផ្ទះតាម៉ុកនោះ មានឈ្មោះឆេង ចន្ថា មានឡានដឹកដីជាច្រើនគ្រឿង បានដឹកដីបឹងជាប់ផ្ទះតាម៉ុក មកចាក់លុបដីបឹងអោយអ្នកមានលុយម្នាក់ នៅក្នុងភូមិស្នោសង្កាត់រកាក្នុង ក្រុងដូនកែវជាង១ខែមកហើយ មិនទាន់ពេញនៅឡើយទេ។
ប្រភពដដែលបានបញ្ជាក់ថា ឡានពួកក្រុមដឹកដីនេះ មិនត្រឹមតែដឹកដីធ្វើអោយធ្លាក់រាយប៉ាយក្រាលលើផ្លូវកៅស៊ូនោះទេ ថែមទាំងបំផ្លាញអោយខូចផ្លូវក្រុងលេខ៨ ប្រមាណជាង១០០០ម៉ែត្រថែមទៀតផង ។ ហើយចំពោះក្រុមហ៊ុនឡានដឹកដីរបស់ ឈ្មោះ ឆេង ចន្ថា ធ្វើការងារនៅសាលាខេត្ត គឺពួកគេមិនខ្លាចអាជ្ញាធរក្រុងឡើយដោយពួកគេអាងអាជ្ញាធរខេត្តទើបក្រុមនេះធ្វើអ្វីៗស្រេចតែចិត្តបែបនេះ។
លោក កង អាណាន់ អភិបាលក្រុងដូនកែវ បានប្រាប់កោះសន្តិភាពយើងតាមទូរស័ព្ទថា ក្រុមហ៊ុនឡានដឹកដីនេះជារបស់ឈ្មោះឆេង ចន្ថា ធ្វើការងារនៅសាលាខេត្ត ហើយលោកបានធ្វើការណែនាំអោយគោរពតាមការណែនាំរបស់រដ្ឋបាលក្រុង ដោយដឹកដីត្រូវគ្របពីលើ មិនត្រូវដឹកដីអោយធ្លាក់ពេញផ្លូវនោះឡើយ ព្រោះរដ្ឋបាលក្រុងបានណែនាំម្តងរួចមកហើយ ។
បើសិនក្រុមឡានដឹកដីនេះនៅតែផ្គើនលោកនឹងចាប់ផាកពិន័យតាមច្បាប់ ៕
ចែករំលែកព័តមាននេះ