ខេត្តសៀមរាប ៖ អគារស្នាក់ការរបស់មន្ត្រីអន្តោប្រវេសន៍ច្រកទ្វារអាកាសយានដ្ឋានអន្តរជាតិសៀមរាបចំនួន៦ខ្នង ត្រូវបានបើកសម្ពោធកាត់ខ្សែបូជានិមិត្តរូបដាក់ឱ្យប្រើប្រាស់ជាផ្លូវការ
ខេត្តសៀមរាប ៖ អគារស្នាក់ការរបស់មន្ត្រីអន្តោប្រវេសន៍ច្រកទ្វារអាកាសយានដ្ឋានអន្តរជាតិសៀមរាបចំនួន៦ខ្នង ត្រូវបានបើកសម្ពោធកាត់ខ្សែបូជានិមិត្តរូបដាក់ឱ្យប្រើប្រាស់ជាផ្លូវការ ក្រោមអធិបតីភាពដ៏ខ្ពង់ខ្ពស់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការប្រគល់យានយន្ត កុំព្យូទ័រ និងថវិកា ២០លានរៀល ជូនដល់ស្នងការដ្ឋាននគរបាលចំនួន៩ខេត្ត កាលពីព្រឹកថ្ងៃទី២១ ខែធ្នូ ឆ្នាំ២០១៥ នៅអាកាសយានដ្ឋានអន្តរជាតិសៀមរាប ។
ក្នុងកិច្ចស្វាគមន៍របស់លោកនាយឧត្តមសេនីយ៍ សុខ ផល អគ្គនាយកអន្តោប្រវេសន៍ធ្វើសេចក្តីរាយការណ៍អំពីការសាងសង់អគារថ្មី និងការជួសជុលអគារចាស់ ក្នុងទិសដៅពង្រីកទីតាំង ពង្រឹងការអនុវត្តនីតិវិធី ហើយសមទ្ធិផលថ្មី ដែលមានអគារចំនួន៦ខ្នងនេះត្រូវបានសាងសង់អស់ថវិកាសរុប៣១៥ពាន់៧០០ដុល្លា ដែលជាអំណោយរបស់ សម្តេចក្រឡាហោម ដើម្បីផ្តល់ទីតាំងបំពេញការងារស្នាក់នៅឱ្យបានសមរម្យដល់បងប្អូនមន្ត្រីអន្តោប្រវេសន៍ដែលកំពុងឈរជើងនៅតាមច្រកទ្វារព្រំដែនអន្តរជាតិ ។
មានប្រសាសន៍សំណេះសំណាលនោះ សម្តេចក្រឡាហោម ស ខេង បានគូសបញ្ជាក់ថា សមិទ្ធផលថ្មីនេះនឹងជួយដោះស្រាយរាល់កង្វះខាតកន្លែងសម្រាប់ធ្វើការងារ និងបន្ទុកការចំណាយទៅលើការជួលទីកន្លែងស្នាក់នៅ និងហូបចុករបស់មន្ត្រីអន្តោប្រវេសន៍នៃច្រកអាកាសយានដ្ឋានអន្តរជាតិសៀមរាប ដែលជាច្រកចេញ-ចូលដ៏ សំខាន់ និងអាចស្រូបទាញភ្ញៀវទេសចរជាតិ-អន្តរជាតិ ចូលមកទស្សនាកម្សាន្តនៅខេត្តប្រវត្តិសាស្ត្រមួយនេះ ។
សម្តេចក្រឡាហោម ស ខេង បានបន្តថា ពីមួយឆ្នាំទៅមួយឆ្នាំ កំណើនភ្ញៀវទេសចរមានការកើនឡើង ហើយនឹងបន្តកើនឡើងបន្ថែមទៀតនៅខេត្តសៀមរាប ។ ទាំងនេះក៏សបញ្ជាក់ផងដែរពីភាពដឹកនាំរបស់ប្រមុខរាជរដ្ឋាភិបាល ដោយផ្អែកលើកត្តានៃសក្តានុពលទេសចរណ៍ ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ ព្រមទាំងកាលានុវត្តភាពជាច្រើនរបស់កម្ពុជានាពេលបច្ចុប្បន្នផងដែរ ៕
ចែករំលែកព័តមាននេះ