រាជធានីភ្នំពេញ ៖ នៅចំពោះមុខថ្នាក់ដឹកនាំកងកំលាំងនគរបាលជាតិ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់កងកម្លាំងនគរបាលជាតិទាំងអស់ ត្រូវខិតខំពង្រឹងសន្តិសុខ ស្ថិរភាពនយោបាយ…
រាជធានីភ្នំពេញ ៖ នៅចំពោះមុខថ្នាក់ដឹកនាំកងកំលាំងនគរបាលជាតិ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់កងកម្លាំងនគរបាលជាតិទាំងអស់ ត្រូវខិតខំពង្រឹងសន្តិសុខ ស្ថិរភាពនយោបាយ និងសុខដុមរមនាកម្មសង្គមឱ្យបានរឹងមាំ ដោយត្រូវចាត់វិធានការតឹងរឹងប្រឆាំងដាច់ខាត នូវរាល់ឧបាយកលបំបែកបំបាក់សាមគ្គីផ្ទៃក្នុង សកម្មភាពវិទ្ធង្ស នាបង្ក
ចលាចល ជាពិសេស បដិវត្តពណ៌ ។
ការណែនាំរបស់សម្តេចបវរធិបតីធ្វើឡើង ក្នុងពិធីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា១៦ ឧសភា ១៩៤៥-១៦ ឧសភា ២០២៥ នៅបណ្ឌិត្យសភានគរបាលកម្ពុជា ស្រុកកៀនស្វាយ ខេត្តកណ្តាល នាព្រឹកថ្ងៃទី១៦ ខែឧសភា ឆ្នាំ២០២៥ ។
ថ្លែងក្នុងឱកាសនោះ សម្តេចធិបតី ហ៊ុន ម៉ាណែត បានឱ្យកងកម្លាំងនគរបាលជាតិ ត្រូវបង្កើនកិច្ចសហការ ឱ្យកាន់តែជិតស្និទ្ធិជាមួយកងយោធពលខេមរភូមិន្ទ ការពារឱ្យបានគង់វង្សនូវសន្តិភាព ដែលជាមរតកនៃនយោបាយឈ្នះ-ឈ្នះ ការការពារអធិបតេយ្យជាតិ បូរណភាពទឹកដី កសាងឱ្យបានតំបន់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍ ប្រឆាំងទប់ស្កាត់ អនុភាពអមិត្ត ប្រើប្រាស់ទឹកដីម្ខាង ដើម្បីប្រឆាំងទឹកដីម្ខាងទៀត ។
ក្នុងនោះ សម្តេចធិបតីបានឱ្យកងកម្លាំងនគរបាលជាតិ ត្រូវខិតខំពង្រឹងសន្តិសុខ ស្ថិរភាពនយោបាយ និងសុខដុមរមនាកម្មសង្គមឱ្យបានរឹងមាំ ដោយត្រូវចាត់វិធានការតឹងរឹង ប្រឆាំងដាច់ខាត នូវរាល់ឧបាយកលបំបែកបំបាក់សាមគ្គីផ្ទៃក្នុង សកម្មភាពវិទ្ធង្សនាបង្កចលាចល ជាពិសេស បដិវត្តពណ៌ ព្រមទាំងខិតខំទប់ស្កាត់បង្ការបណ្តាញភេវរកម្ម ព្រមទាំងឧក្រិដ្ឋកម្មឆ្លងដែនគ្រប់ទម្រង់នៅក្នុងសម័យឌីជីថល ដែលត្រូវចិត្តទុកដាក់ពង្រឹងកិច្ចសហប្រតិបត្តិការអន្តរជាតិ ជាដៃគូសំខាន់ៗ ដើម្បីធានាបាននូវការឆ្លើយតប ប្រកបដោយប្រសិទ្ធភាពនូវក្នុងការរក្សាបានសុខសន្តិភាព សន្តិសុខជាតិ និងសន្តិសុខសង្គមកម្ពុជា ។
សម្តេចបវរធិបតីនាយករដ្ឋមន្ត្រីបានគូសបញ្ជាក់ថា៖ «ក្នុងន័យនេះ ការការពារសិទ្ធិមនុស្ស គឺសិទ្ធិមូលដ្ឋានរបស់មនុស្ស គឺសិទ្ធិនៅក្នុងការរស់នៅដោយសុខសន្តិភាព ស្ថិរភាព និងសេចក្តីក្សេមក្សាន្ត ដោយមិនព្រួយបារម្ភពីបញ្ហាអសន្តិសុខ គឺភាពច្របូកច្របល់នៅក្នុងសង្គម សិទ្ធិនៅក្នុងការបញ្ចេញមតិ សិទ្ធិនៅក្នុងការប្រតិបត្តិសាសនា សិទ្ធិនៅក្នុងការធ្វើសកម្មភាពនយោបាយផ្សេងៗ ត្រូវធានាឱ្យបាននូវក្របខណ្ឌមួយ ដែលច្បាប់អនុញ្ញាត ត្រូវធានានូវសុច្ចរិតភាព ត្រូវធានានូវតម្លាភាព និងការទទួលខុសត្រូវ ជាពិសេសទៅលើប្រធានបទសំខាន់ៗ ដែលធ្វើឱ្យប្រជាពលរដ្ឋរបស់យើង មានការព្រួបារម្ភ រឿងបូរណភាពទឹកដី រឿងប្រឆាំងជាតិសាសន៍នានា ការបារម្ភ ការធ្វើឱ្យបែកបាក់ជាតិ នេះហើយគឺជាបញ្ហា ដែលធ្វើឱ្យប្រទេសយើងធ្លាក់ចុះ ពីមហាអំណាច ។
សង្គ្រាមក្រៅប្រទេសជាផ្នែកមួយ ប៉ុន្តែមូលហេតុធំគឺការបាត់ទំនុកចិត្តរវាងប្រជាជន និងប្រជាជន ជាពិសេស គឺការបង្កើតនូវបញ្ហា ព័ត៌មានក្លែងក្លាយ ការឈានចាប់យក នូវព័ត៌មានផ្សេងៗ ដែលមិនពិតប្រាកដ ដើម្បីយកមកដុត ធ្វើឱ្យមានការប្រេះស្រាំពីទំនុកចិត្ត រវាងប្រជាជន និងប្រជាជន ប្រជាជននិងរដ្ឋាភិបាលស្របច្បាប់ ដែលទទួលសិទ្ធិពីការបោះឆ្នោត ពីប្រជាជនច្រើនលើសលប់ អនុឡោមតាមរដ្ឋធម្មនុញ្ញរបស់យើង ដើម្បីបំពេញភារកិច្ចក្នុងរយៈពេល៥ឆ្នាំ បម្រើជាតិនិងមានតុភូមិ» ។
បន្ថែមលើនេះ សម្តេចនាធិបតីយករដ្ឋមន្ត្រីបានគូសបញ្ជាក់ថា អ្វីដែលសំខាន់ គឺត្រូវរក្សានូវស្ថានភាព ស្ថិរភាព បរិស្ថានដែលអាចធ្វើឱ្យពង្រឹងនូវចំណុចវិជ្ជមាន និងកាត់បន្ថយនូវចំណុចអវិជ្ជមានតាមច្បាប់ ហើយនិងការពារដាច់ខាត នូវសុខសន្តិភាព ស្ថិរភាព និងសន្តិសុខជូនប្រជាពលរដ្ឋ គឺជាអ្វីដែលត្រូវតែអនុវត្តឱ្យបានដាច់ខាត ទោះក្នុងតម្លៃណាក៏ដោយ៕
ចែករំលែកព័តមាននេះ