វត្តចំនួន៤ហើយ ដែលកំពុងតែផ្ទុះរីករាលដាលនៃជំងឺកូវីដ១៩ ទៅលើព្រះសង្ឃនៅតាមវត្តអារាមនោះ ហើយបញ្ហានេះបានកើតជាការព្រួយបារម្ភកាន់តែខ្លាំងថែមទៀត អំពីការរីករាលដាលនៃជំងឺកូវីដ១៩ ទៅលើព្រះសង្ឃនៅតាមវត្តអារាម
ខេត្តតាកែវ ៖ គិតត្រឹមថ្ងៃទី១៩ ខែកក្កដា ឆ្នាំ២០២១ រហូតមកដល់ថ្ងៃទី២៣ ខែកក្កដា ឆ្នាំ២០២១នេះមានវត្តចំនួន៤ហើយ ដែលកំពុងតែផ្ទុះរីករាលដាលនៃជំងឺកូវីដ១៩ ទៅលើព្រះសង្ឃនៅតាមវត្តអារាមនោះ ហើយបញ្ហានេះបានកើតជាការព្រួយបារម្ភកាន់តែខ្លាំងថែមទៀត អំពីការរីករាលដាលនៃជំងឺកូវីដ១៩ ទៅលើព្រះសង្ឃនៅតាមវត្តអារាម។
លោក កេត ម៉ៅ អភិបាលស្រុកសំរោង ដែលបានចុះផ្ទាល់ជាមួយក្រុមគ្រូពេទ្យ ដើម្បីធ្វើតេស្តយកសំណាកពីព្រះសង្ឃដែលមានជាប់ពាក់ព័ន្ធជាមួយព្រះសង្ឃដែលកើតជំងឺកូវីដ១៩ នៅតាមវត្តនោះបានប្រាប់កោះសន្តិភាពនៅព្រឹកថ្ងៃទី២៣ ខែកក្កដា ឆ្នាំ២០២១នេះថា នៅស្រុកសំរោងនេះ បានផ្ទុះរីករាលដាលជំងឺកូវីដ១៩ ទៅលើព្រះសង្ឃចំនួន៣វត្តហើយ ។
លោកអភិបាលស្រុកសំរោង បានបន្តទៀតថា ទី១- វត្តប្រាសាទនាងខ្មៅ ស្ថិតនៅឃុំរវៀង បានផ្ទុះជំងឺកូវីដ១៩ នៅថ្ងៃទី២០ កក្កដា ២០២១ ហើយក្រុមគ្រូពេទ្យបានធ្វើតេស្តយកសំណាករហ័សលើព្រះសង្ឃដែលជាសាមណេរសិស្សចំនួន២៥០អង្គ ហើយរកឃើញមានវិជ្ជមានលើព្រះសង្ឃចំនួន២៩អង្គ ។ ហើយនៅថ្ងៃទី២២ កក្កដា ក្រុមគ្រូពេទ្យបានធ្វើតេស្តយកសំណាករកឃើញមានវិជ្ជមានជំងឺកូវីដ១៩ លើព្រះសង្ឃ១០អង្គបន្ថែមទៀត អញ្ចឹងជំងឺកូវីដ១៩ ដែលបានផ្ទុះឡើងនៅលើព្រះសង្ឃក្នុងវត្តប្រាសាទនាងខ្មៅនេះ គឺសរុបចំនួន៣៩អង្គហើយៗ ។
លោកអភិបាលស្រុកបន្តថា ទី២- នៅថ្ងៃទី២២ ខែកក្កដា ឆ្នាំ២០២១ លោកបានសហការជាមួយក្រុមគ្រូពេទ្យបានធ្វើតេស្តយកសំណាកនៅវត្តអង្គប្រឹយ៍ ស្ថិតក្នុងឃុំលំចង់លើ ទៅលើព្រះសង្ឃចំនួន១១៩អង្គ រកឃើញមានវិជ្ជមានជំងឺកូវីដ១៩ ចំនួន៣៤អង្គ, យាយជីម្នាក់ និងកូនសិស្សលោកចំនួន២នាក់ទៀត សរុប៣៧អង្គ/នាក់បន្ថែមទៀត អញ្ចឹងសរុបទាំង២វត្តនេះ គឺមានព្រះសង្ឃដែលវិជ្ជមានជំងឺកូវីដ១៩នេះ មានចំនួន៧៦អង្គហើយ ។ ហើយលោកក៏បានណែនាំដល់ព្រះសង្ឃ ក៏ដូចជាគណៈកម្មាធិការវត្ត ត្រូវតែអនុវត្តតាមការណែនាំរបស់ក្រសួងសុខាភិបាល ជាពិសេសអនុវត្តផែនការការពារ «៣កុំ ៣ការពារ» របស់សម្តេច អោយបានច្បាស់លាស់ផងដែរ។
លោក កេត ម៉ៅ អភិបាលស្រុកសំរោង បានអោយដឹងទៀតថា ទន្ទឹមនឹងយើងធ្វើការពិនិត្យយកសំណាកលើព្រះសង្ឃចំនួន២វត្តរួចមក ក៏នៅមានវត្ត១បន្តទៀតបានផ្ទុះជំងឺកូវីដ១៩ នៅលើព្រះសង្ឃផងដែរ គឺវត្តក្បាលសំរោង ស្ថិតក្នុងឃុំទ្រា ស្រុកសំរោង ដោយក្រុមគ្រូពេទ្យបានធ្វើតេស្តយកសំណាកទៅលើព្រះសង្ឃចំនួន៣២អង្គ ជាលទ្ធផលមានវិជ្ជមានជំងឺកូវីដ១៩ ចំនួន១០អង្គ អញ្ចឹងសរុបព្រះសង្ឃដែលមានវិជ្ជមានជំងឺកូវីដ១៩ ទាំង៣វត្ត ក្នុងស្រុកសំរោងយើងនេះ គឺមានចំនួន៨៦អង្គ/នាក់ហើយ។
លោកអភិបាលស្រុកក៏បានបញ្ជាក់បន្ថែមទៀតថា វត្តទាំង៣ខាងលើនេះ ត្រូវបានបិទខ្ទប់ទាំងស្រុង ហើយព្រះសង្ឃដែលមានវិជ្ជមានជំងឺកូវីដ១៩ និងព្រះសង្ឃដែលជាប់ពាក់ព័ន្ធទាំងអស់ គឺដាក់អោយព្យាបាល និងធ្វើចត្តាឡីស័កក្នុងវត្ត ដោយមានគ្រូពេទ្យនៅប្រចាំការព្យាបាល។
គួរបញ្ជាក់ថា ការផ្ទុះរីករាលដាលនៃជំងឺកូវីដ១៩នេះ ក៏បានផ្ទុះឡើងនៅវត្តសីហរតនះរាម ស្ថិតក្នុងក្រុងដូនកែវផងដែរ កាលពីល្ងាចថ្ងៃទី១៩ ខែកក្កដា ឆ្នាំ២០២១ ដោយបានធ្វើតេស្តយកសំណាកនៅលើព្រះសង្ឃចំនួន១០០អង្គ ហើយក៏បានរកឃើញវិជ្ជមានជំងឺកូវីដ១៩ ចំនួន២០អង្គទៅហើយ ។
គួរបញ្ជាក់ទៀតថា ចំពោះការផ្ទុះរីករាលដាលនៃជំងឺកូវីដ១៩ខាងលើនេះ គឺព្រះសង្ឃស្ទើរទាំងអស់ជាសាមណេរសិស្សមានការទំនាក់ទំនងគ្នាទៅមក ដោយឆាន់ជាមួយគ្នា រៀនជាមួយគ្នា ។ សរុបមកព្រះសង្ឃទាំង៤វត្តខាងលើ ដែលមានវិជ្ជមាននៃជំងឺកូវីដ១៩នោះ បានឡើងដល់ចំនួន១០៦អង្គ/នាក់ហើយ ហើយក្រុមគ្រូពេទ្យក៏បានសហការជាមួយអាជ្ញាធរស្រុក-ក្រុង ដើម្បីធ្វើតេស្តនៅលើព្រះសង្ឃដែលមានការពាក់ព័ន្ធបន្តធ្វើរាល់ថ្ងៃផងដែរ ។
ចែករំលែកព័តមាននេះ