រាជធានីភ្នំពេញ ៖ ក្នុងពេលវិស័យជាច្រើនបានរងផលប៉ះពាល់ដោយសារតែកូវីដ ១៩ តែសម្រាប់វិស័យចិញ្ចឹមសត្វនៅក្នុងប្រទេសកម្ពុជា បែរជាទទួលបានផលល្អប្រសើរ និងកាក់កបទៅវិញ ហើយកសិករជាច្រើនក៏បានពង្រីកការចិញ្ចឹមសត្វបន្ថែមទៀតដើម្បីបង្កើនប្រាក់ចំណូល ។
បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានឱ្យដឹងថា នៅក្នុងបរិបទកូវីដ ១៩ នេះ ប្រជាពលរដ្ឋកម្ពុជាជាច្រើនបានបាត់បង់ការងារ ហើយក៏ត្រលប់ទៅស្រុកវិញ ដើម្បីបង្កបង្កើនផលកសិកម្ម ក្នុងនោះការចិញ្ចឹមសត្វក៏ជាជម្រើសមួយសម្រាប់ពលរដ្ឋក្នុងវិបត្តិកូវីដ ១៩ ដែរ ដូច្នេះហើយធ្វើឱ្យកំណើននៃការចិញ្ចឹមសត្វនៅក្នុងប្រទេសកម្ពុជាមានការកើនឡើងខ្ពស់ ជាមួយនឹងតម្លៃក៏រក្សាស្ថិរភាពល្អប្រសើរដែរ ។
លោកបន្តថា កាលពីមួយរយៈការចិញ្ចឹមសត្វបានលើសពីតម្រូវការ ក្រោយជួបព្រឹត្តិការណ៍សហគមន៍ ២០ កុម្ភៈ ភ្លាមៗ ប៉ុន្តែក្រោយមកតម្រូវការក៏ឃើញ ថា កើនឡើងវិញនៅពេលបិទខ្ទប់ និងរហូតមកដល់ពេលនេះ ក៏នៅតែមានតម្រូវការ ជាក់ស្ដែងទីផ្សារជ្រូកនៅក្នុងប្រទេសកម្ពុជាឃើញថា កសិករ និងក្រុមហ៊ុនចិញ្ចឹមជ្រូកក្នុងអាចផ្គត់ផ្គង់បាន ៨៥ ភាគរយ ទៅហើយនៅក្នុងវិបត្តិនេះ និងមានការនាំចូលពីខាងក្រៅ តិចតួចបំផុតមកបំពេញតម្រូវការ ។ លោកថា ៖ «មិនយូរទេ កសិករ និងក្រុមហ៊ុនចិញ្ចឹមជ្រូកនឹងអាចផ្គត់ផ្គង់បានទាំងស្រុងនៅលើទីផ្សារកម្ពុជា បើសិនជារដ្ឋាភិបាលទប់ស្កាត់ការហូរចូលជ្រូកខុសច្បាប់ពីប្រទេសជិតដែលអាចយកមកចម្លងជ្រូកក្នុងស្រុក ខណៈប្រទេសជិតខាងកំពុងតែផ្ទុះជំងឺប៉េស្តជ្រូកអាហ្វ្រិកផងដែរ» ។
លោក ពៅ បន្តទៀតថា បច្ចុប្បន្ននេះ បើសិនជាកម្ពុជាមិននាំចូលជ្រូកក៏សឹងតែអាចផ្គង់ផ្គង់គ្រប់ ឬមិនខ្វះសាច់ហូបដែរ ខណៈត្រីក៏សម្បូរសាច់មាន់ សាច់ទាក៏សម្បូរ ដូច្នេះយើងអាចយកផ្សេងមកជំនួសជ្រូកក៏បានដែរ តែដើម្បីឱ្យបង្គ្រប់ទៅតាមតម្រូវការយើងក៏បាននាំចូលពីប្រទេសជិតខាងតិចតួចបំផុត ។
លោកបន្ថែមថា តម្លៃសាច់សត្វនាពេលនេះ គឺមានភាពល្អ អាចទទួលយកបានទាំងអ្នកបរិភោគ និងអ្នកចិញ្ចឹម ដូច្នេះហើយទើបធ្វើឱ្យអ្នកចិញ្ចឹមបន្តចិញ្ចឹមសត្វដោយក្ដីរំពឹង និងអាចផ្គត់ផ្គង់ដល់ជីវភាពគ្រួសារបានស្រួលនៅក្នុងវិបត្តិកូវីដ ១៩ នេះ ។
ប្រមុខរាជរដ្ឋាភិបាលកម្ពុជាកាលពីពេលកន្លងទៅនេះ បានអំពាវនាវដល់ប្រជាពលរដ្ឋកម្ពុជាដែលបាត់បង់ការងារ និងទើបត្រលប់មកពីប្រទេសថៃវិញ សូមឱ្យចាប់យកវិស័យកសិកម្មក្នុងស្រុក ដើម្បីផ្គត់ផ្គង់ដល់ទីផ្សារក្នុងស្រុក ពីព្រោះក្នុងបរិបទកូវីដ ១៩ នេះ អ្វីៗអាចបាត់បង់តម្រូវការ ប៉ុន្តែរបស់ហូបចុកមិនថមថយទេ គឺតម្រូវការនៅតែមាន មិនថាតែនៅកម្ពុជា ឬប្រទេសណានោះឡើយ ដូច្នេះនៅពេលដែលយើងមានស្បៀងយើងអាចផ្គត់ផ្គង់ក្នុងស្រុកផងហើយនឹងអាចនាំចេញទៅកាន់ទីផ្សារអន្តរជាតិបានផងដែរ ។
យោងតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ កន្លងទៅក៏បានបញ្ជាក់ថា ការនាំចូលកសិផលពីខាងក្រៅប្រទេសនាពេលនេះ គឺដើម្បីបំពេញតម្រូវការប៉ុណ្ណោះ ដូចជាការនាំចូលត្រី ការនាំចូលសត្វជ្រូក និងមាន់ទាជាដើម ។ បច្ចុប្បន្នកម្ពុជាក៏បាននាំចេញផលិតផលកសិកម្មជាច្រើនទៅកាន់ទីផ្សារអន្តរជាតិផងដែរ ក្នុងវិបត្តិកូវីដ ១៩ នេះ ៕
ចែករំលែកព័តមាននេះ