បន្ទាយមានជ័យ៖ លោក អ៊ុំ រាត្រី អភិបាលខេត្តបន្ទាយមានជ័យ និងលោក​ ប៉ាន់ខែម ប៊ុនថន នាយរងខុទ្ទកាល័យសម្តេចតេជោ ហ៊ុន សែន និងលោកឧត្តមសេនីយ៍ទោ សេង ធារិន មេបញ្ជាការរង និងនាយសេនាធិការយោធភូមិភាគទី៥ ដឹកនាំក្រុមការងារ​ ចុះពិនិត្យស្ថានភាពជំនន់ទឹកភ្លៀង ដែលជន់លិចផ្លូវ និងផ្ទះ​សម្បែងប្រជាពលរដ្ឋ នៅថ្ងៃទី១៦ ខែកក្កដា ឆ្នាំ២០២១ នៅភូមិបឹងជម្រុក ឃុំទួលពង្រ ស្រុកម៉ាឡៃ។

លោក អ៊ុំ រាត្រី បានអោយដឹងថា ភ្លៀងធ្លាក់រយៈពេល ២ថ្ងៃជាប់គ្នា នៅតំបន់ព្រំដែន ហើយទឹកហូរធ្លាក់ពីភ្នំយាយសំ បណ្តាលឲ្យ​លិចព្រៃសហគមន៍រនាមដូនសំ ហើយជន់លិចផ្លូវ ២ខ្សែ និងផ្ទះសម្បែងប្រជាពលរដ្ឋ នៅខាងលើផ្លូវ​ចូលតំបន់ភិវឌ្ឍន៍បឹងជម្រុក កាលពីយប់ថ្ងៃទី១៥ ខែកក្កដា ឆ្នាំ២០២១ រហូតពេលនេះ។

លោកបញ្ជាក់ថា ក្រោយទទួលព័ត៌មាន លោកបានដឹកនាំក្រុមការងារ ចុះទៅពិនិត្យមើលស្ថានភាពជំនន់ទឹកភ្លៀង ដែលកំពុងជន់លិចព្រៃរនាមដូនសំ និងផ្ទះនៅខាងលើផ្លូវ និងផ្លូវ ២ខ្សែ ដែលទឹកហូរកាត់។ ក្នុងនោះ លោក​ ប៉ាន់ខែម ប៊ុនថន នាយរងខុទ្ទកាល័យសម្តេចតេជោ ហ៊ុន សែន និងអាជ្ញាធរ​សម្រេច​កាយដាក់ប្រព័ន្ធលូ ចំនួន ២កន្លែង ដើម្បីរំដោះទឹក ហើយតំបន់នេះ តាមព័ត៌មាន លិចរាល់ឆ្នាំនៅពេលមានភ្លៀងធ្លាក់ខ្លាំង ដែលទឹកហូរធ្លាក់ពីភ្នំយាយសំ តែលិចរយៈពេលខ្លី ក៏ស្រកទៅវិញ៕ ប៊ុន ធឿន