រាជធានីភ្នំពេញ ៖ ក្រុមអាជីករលក់ដូរក្នុង និងក្រៅផ្សារច្បារអំពៅ ១៧នាក់ត្រវបានរកឃើញមានវិជ្ជមានជម្ងឺកូវីដ១៩ ក្នុងរយៈពេល២ថ្ងៃ គិតចាប់ពីថ្ងៃទី១៣ ខែកក្កដា ឆ្នាំ២០២១ កន្លងមក…
រាជធានីភ្នំពេញ ៖ ក្រុមអាជីករលក់ដូរក្នុង និងក្រៅផ្សារច្បារអំពៅ ១៧នាក់ត្រវបានរកឃើញមានវិជ្ជមានជម្ងឺកូវីដ១៩ ក្នុងរយៈពេល២ថ្ងៃ គិតចាប់ពីថ្ងៃទី១៣ ខែកក្កដា ឆ្នាំ២០២១ កន្លងមក បន្ទាប់ពីដំបូងឡើយបានពិនិត្យឃើញមានវិជ្ជមានលើក្រុមសន្តិសុខផ្សារចំនួន៣នាក់ កាលពីថ្ងៃទី១២ ខែឆ្នាំដដែល ។
គិតត្រឹមវេលាព្រឹកថ្ងៃទី១៥ ខែកក្កដា ឆ្នាំ២០២១នេះ ក្រុមអាជីវករបាននាំគ្នាបន្តទៅយកសំណាកជាបន្តបន្ទាប់ នៅក្នុងបរិវេនសាលាបឋមសិក្សាច្បារអំពៅ ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅ ។ ហើយថ្ងៃនេះ គឺជាការចុះយកសំណាកលើកទី៣ ហើយសម្រាប់ក្រុមអាជីវករផ្សារច្បារអំពៅ ។
លោកគ្រី ហ៊ុច អនុប្រធានគណៈកម្មការគ្រប់គ្រងផ្សារច្បារអំពៅបានប្រាប់កោះសន្តិភាពតាមរយៈទូរស័ព្ទអោយដឹងថា ៖ ដំបូងឡើយក្រុមគណៈកម្មការគ្រប់គ្រងផ្សារទាំងអស់បានធ្វើតេស្តរកមេរោគកូវីដ១៩ទាំងអស់គ្នា ក្រោយមកលទ្ធិផលបញ្ជាក់ថា ក្រុមសន្តិសុខផ្សារ៣នាក់ មានវិជ្ជមាន ។
បន្ទាប់ពីមានវិជ្ជមានហើយនោះគណៈកម្មការគ្រប់គ្រងផ្សារបានធ្វើការអំពាវនាវដល់បងប្អូនអាជីវករលក់ដូរក្នុង និងក្រៅផ្សារទាំងអស់ សូមរុះរាន់ទៅយកសំណាកអោយបានគ្រប់ៗគ្នាជៀសវៀងមានការចម្លងកាន់តែខ្ពស់ ។ បន្ទាប់ពីមានការណែនាំពីគណៈកម្មការគ្រប់គ្រងផ្សាររួចមកក្រុមបងប្អូន អាជីវករលក់ដូរក្នុង និងក្រៅផ្សារ បាននាំគ្នាទៅយកសំណាកជាបន្តបន្ទាប់រយៈពេល២ថ្ងៃ គិតចាប់ពីថ្ងៃទី១៣ ខែកក្កដា ឆ្នាំ២០២១ ដល់ថ្ងៃទី១៤ ខែឆ្នាំដដែលក៏លទ្ធិផល នៃការតេស្តសំណាកបញ្ជាក់ថា មានវិជ្ជមានកូវីដ១៩ចំនួន១៧នាក់ ក្នុងនោះ១៣នាក់ ជាអាជីវករលក់ដូរក្នុងផ្សារ និង៤នាក់លក់ដូរនៅខាងក្រៅផ្សារ ។
លោកគ្រី ហ៊ុច បានបន្តប្រាប់អោយដឹងថា តូចលក់ដូរនៅក្នុងផ្សារទាំងអស់មានសរុប១៤៤៧តូប ហើយនៅខាងក្រៅផ្សារមានជាង៣០០តូប ប៉ុន្តែចាប់គិតតាំងពីមានការបើកអោយដំណើរការផ្សារវិញមក ឃើញថា ការលក់ដូរមិនមានណែនណាន់តាន់តាប់ដូចមុននោះ ពោលទាំងក្នុងទាំងក្រៅ មានត្រឹម៥០ភាគរយ នៃការលក់ប៉ុណ្ណោះ ។ ហើយចំនួន៥០ភាគរយនៃតូបដែលលក់ទាំងក្នុង និងក្រៅនោះ គឺមានចំនួនមនុស្សសរុបប្រមាណជិត៥០០នាក់ ។
ហើយបច្ចុប្បន្ន អាជីវករទាំង៥០០នាក់ កំពុងនាំគ្នាទៅយកសំណាកដើម្បីតេស្តរកមេរោគកូវីដ១៩ ជាបន្តបន្ទាប់ នៅក្នុងសាលាបឋមសិក្សាច្បារអំពៅ ។
លោកអនុប្រធានគណៈកម្មការគ្រប់គ្រងផ្សារបានបញ្ជាក់ជាមួយកោះសន្តិភាពថា ៖ តាំងពីមានការសម្រេចអនុញ្ញាត្តិអោយផ្សារដំណើរអោយបងប្អូនអាជីវករលក់ដូរវិញមក សម្រាប់អាជីវករដែលមានកម្រិតជីវភាពធូរធារ គេមិនមកលក់ឡើយ ដោយទុកតូបចាក់សោរចោល ព្រោះខ្លាចមានការឆ្លងនៃជម្ងឺកូវីដ១៩ ។ ដោយឡែកអាជីវករដែលបន្តមកលក់ គឺភាគច្រើនជាអ្នកមានកម្រិតជីវភាពមធ្យម ឬធម្មតា ហើយពិសេសនោះ គឺអាជីវករខ្លះមានម៉ូយទិញអ៊ីវ៉ាន់ច្រើនក៏សម្រេចមកលក់នឹងគេនឹងឯងតែម្តង ។
លោកបន្តថា ទន្ទឹមនឹងការលក់ដូរនោះ គណៈគ្រប់គ្រងផ្សារបានអនុវត្តយ៉ាងខ្ជាប់ខ្ជួនបំផុតជាមួយនឹងវិធានការសុខាភិបាលមានទាំងការតម្រូវអោយអាជីវករ និងពលរដ្ឋដែលចូលទៅទិញម្ហូបអាហារ និងអ៊ីវ៉ាន់ត្រូវពាក់ម៉ាស់ , ត្រូវបន្តរក្សាគម្លាតសុវត្ថិភាព , បូកជាមួយការដាក់អាកុលសម្រាប់បាញ់ និងម៉ាស៊ីនវាស់កម្តៅជាដើម ហើយអ្វីដែលសំខាន់ជាងនោះ គឺ៣កុំ ៣ការពាររបស់សម្តេចតេជោ ប្រមុខថ្នាក់ដឹកនាំ នៃកម្ពុជាដោយអនុវត្តមិនមានការថ្លោះថ្លោយឡើយ ប៉ុន្តែករណីដែលកកើតមាននោះ គឺជាកតា្តធ្វេសប្រហែសដោយបុគ្គល មិនមានការប្រុងប្រយ័ត្នខ្ពស់ ទើបបង្កអោយមានការកកើតមានឡើង ហើយក៏បន្តចម្លងពីគ្នាទៅគ្នា ។
សូមបញ្ជាក់ ដំណើរការ នៃការតេស្តសំណាកលើក្រុមអាជីវករនៅព្រឹកថ្ងៃទី១៥ ខែកក្កដា ឆ្នាំ២០២១ កំពុងបន្ត ប៉ុន្តែមិនទាន់មានតួលេខ ឬលទ្ធិផលបញ្ជាក់អំពីការរកឃើញអ្នកមានវិជ្ជមានកូវីដ១៩ទៀតនៅឡើយនោះទេ ។
ទន្ទឹមនឹងនោះដែរ គិតត្រឹមព្រឹកថ្ងៃខែដដែលផ្សារមិនមានការបិទឡើ យ គឺនៅបន្តមានការអនុញ្ញាត្តិអោយលក់ដូរទាំងក្នុង និងក្រៅធម្មតា ប៉ុន្តែមិនមានអាជីវករលក់ដូរច្រើន ពិសេសពលរដ្ឋដែលទៅទិញម្ហូបអាហារ និងអ៊ីវ៉ាន់ផ្សេងៗ ក៏មិនមានច្រើនឡើយពោលអាចនិយាយបានថា ត្រឹមកម្រិត២៥ភាគរយនៃ១០០ភាគរយដែលធ្លាប់មានមនុស្សអ៊ូអរកន្លងមក ៕
ចែករំលែកព័តមាននេះ