ថៃចាក់វ៉ាក់សាំងលាយគ្នា ដូសទី១ Sinovac និងដូសទី២ AstraZeneca ទោះមានការព្រមានពី WHO
ថៃ ៖ ប្រទេសថៃកាលពីថ្ងៃ១៣ ខែកក្កដា បានការពារអំពីការអនុវត្តការលាយវ៉ាក់សាំងប្រឆាំងកូវីដ១៩ ចំនួនពីរប្រភេទផ្សេងគ្នា
ថៃ ៖ ប្រទេសថៃកាលពីថ្ងៃ១៣ ខែកក្កដា បានការពារអំពីការអនុវត្តលាយវ៉ាក់សាំងប្រឆាំងកូវីដ១៩ ចំនួនពីរប្រភេទផ្សេងគ្នារបស់ខ្លួន ដើម្បីទប់ស្កាត់ការឆ្លងរីករាលដាលកាន់តែខ្លាំងឡើងៗក្នុងប្រទេស។ បើទោះបីជាអ្នកវិទ្យាសាស្ត្រកំពូលរបស់អង្គការសុខភាពពិភពលោក (WHO) បានព្រមានថា ការអនុវត្តនេះ មានគ្រោះថ្នាក់ខ្លាំងយ៉ាងណាក៏ដោយ។ នេះបើយោងតាមការចេញផ្សាយពីសារព័ត៌មាន CNA
បច្ចុប្បន្នថៃកំពុងពុះពារទប់ទល់នឹងការផ្ទុះឡើងចុងក្រោយបង្អស់របស់ខ្លួន ដែលរងការវាយលុកពីវីរុសបំប្លែងថ្មីប្រភេទ «Delta» ដោយករណីឆ្លង និងស្លា.ប់បានកើនឡើងយ៉ាងខ្លាំង ដែលជះឥទ្ធិពលធ្ងន់ធ្ងរដល់ប្រព័ន្ធសុខភាពជាតិ។
អាជ្ញាធរបាននិយាយថា ពួកគេនឹងលាយគ្នានូវវ៉ាក់សាំង Sinovac សម្រាប់ការចាក់ដូសទី១ និងវ៉ាក់សាំង AstraZeneca សម្រាប់ការចាក់ដូសទី២។ ដើម្បីព្យាយាមទទួលបានប្រសិទ្ធិភាពកាន់តែខ្លាំង និងលឿនជាងមុនក្នុងរយៈពេល៦សប្តាហ៍ ជំនួសឱ្យរយៈពេល១២សប្តាហ៍។
លោក Yong Poovorawan ប្រធានក្រុមជីវវិទូថៃបានមានប្រសាសន៍ថា កត្តានេះអាចធ្វើទៅបានតាមរយៈការបញ្ចូលវ៉ាក់សាំងប្រភេទ (Inactivated Virus) Sinovac ជាមួយនឹងវ៉ាក់សាំងប្រភេទ (Viral Vector) AstraZeneca ។ លោកបានបន្ថែមទៀតថា «យើងមិនអាចរង់ចាំរយៈពេល១២សប្តាហ៍ ចំពោះការឆ្លើយតបពីប្រសិទ្ធភាពនៃវ៉ាក់សាំងនោះទេ។ ខណៈការផ្ទុះឡើងនៃវីរុសកូវីដ១៩ កំពុងតែរាលដាលយ៉ាងឆាប់រហ័សបែបនេះ»។
គិតរហូតមកដល់ថ្ងៃទី១៤ ខែកក្កដា នេះ ចំនួនអ្នកឆ្លងកូវីដ១៩សរុបនៅក្នុងប្រទេសបានកើនឡើងដល់៣៦៣,០២៩ករណី និងមានអ្នកស្លា.ប់សរុបចំនួន២,៩៣៤នាក់។ ខណៈដែលចំនួន ២៦០,៥៨៤ករណី បានជាសះស្បើយ៕
ចែករំលែកព័តមាននេះ