ប្រទេសចិន ៖ បើតាមមន្ត្រីមកពីក្រសួងពាណិជ្ជកម្មបានថ្លែងថា រដ្ឋាភិបាលចិននឹងណែនាំនូវគោលនយោបាយអនុគ្រោះកាន់តែច្រើន ដើម្បីជួយដល់បណ្តាសហគ្រាសក្នុងស្រុកលើការធ្វើពាណិជ្ជកម្មនៅលើឆាកអន្តរជាតិ ។
លោក Zhou Zhencheng អគ្គនាយករងនៃអគ្គនាយកដ្ឋានកិច្ចសហប្រតិបត្តិការសេដ្ឋកិច្ច និងវិនិយោគខាងក្រៅ ក្រោមចំណុះក្រសួងពាណិជ្ជកម្ម បានលើកឡើងនៅក្នុង
សន្និសីទមួយកាលពីថ្ងៃអាទិត្យថា ៖ « ក្រសួងនឹងចាប់ដៃគូជាមួយបណ្តាក្រសួងពាក់ព័ន្ធក្នុងការជំរុញគោលនយោបាយវិនិយោគ និងកិច្ចសហប្រតិបត្តិការក្រៅប្រទេស ក្នុងចំណោមបណ្តាប្រទេសដែលបានចូលរួមក្នុងក្របខ័ណ្ឌខ្សែក្រវាត់សេដ្ឋកិច្ច និងផ្តួចផ្តើមផ្លូវជំនួញ ដែលលើកទឹកចិត្តដល់ការវិនិយោគលើតម្លៃបន្ថែមខ្ពស់ និងការធ្វើឲ្យប្រសើរឡើងនូវសេវាព័ត៌មាន និងវិធានការគ្រប់គ្រងហានិភ័យសម្រាប់ការធ្វើពាណិជ្ជកម្មនៅបរទេស » ។
លោកបន្តថា ៖ « ខណៈការវិនិយោគនៅក្រៅប្រទេសរបស់ចិនកំពុងតែកើនឡើងលឿន នោះ វានៅតែស្ថិតក្នុងការចាប់ផ្តើមដដែល បើធៀបនឹងបណ្តាប្រទេសអភិវឌ្ឍន៍នានា ថែមទាំងអាចប្រឈមនឹងការប្រកួតប្រជែងជាច្រើនទៀត ដូចជា កង្វះនៃការបញ្ចូលរបៀបថ្មី និងការកើនឡើងនូវហានិភ័យភូមិសាស្ត្រនយោបាយ » ។
យោងតាមទិន្នន័យពីក្រសួងការវិនិយោគនៅក្រៅប្រទេសរបស់ចិនឱ្យដឹងថា ការវិនិយោគកាលពីអំឡុងពេល១០ខែដំបូងនៃឆ្នាំ២០១៥ បានកើនឡើង១៦,៣% ពីមួយឆ្នាំទៅមួយឆ្នាំ ឬសម្រេចបានចំនួន៩២,២ប៊ីលានដុល្លារ ដែលគ្របដណ្តប់ទៅលើក្រុមហ៊ុនចំនួន៥.៥៥៣នៅក្នុងបណ្តាប្រទេស និងតំបន់ចំនួន១៥២ ។
ការវិនិយោគផ្ទាល់នៅក្រៅប្រទេសក្នុងបណ្តាប្រទេសចំនួន៤៩ នៃបណ្តាញក្របខ័ណ្ឌខ្សែក្រវាត់សេដ្ឋកិច្ច និងការផ្តួចផ្តើមជំនួញសរុបមាន១៣,១៧ប៊ីលានដុល្លារ ក្នុងអំឡុងពេលនោះកើនឡើង៣៦,៧% ពីមួយឆ្នាំទៅមួយឆ្នាំ ។
លោក Zhou Zhencheng បានព្យាករទុកថា ៖ « កំណើននៃការវិនិយោគនៅក្រៅប្រទេស នឹងបន្តសម្រេចបានលើសការកើនឡើងនៃការវិនិយោគដោយផ្ទាល់ពីបរទេសក្នុងប្រទេសចិនទៅទៀត » ៕
ចែករំលែកព័តមាននេះ