រាជធានីភ្នំពេញ៖ ទោះបីជាស្ថានភាពកូវីដ១៩នៅក្នុងប្រទេសកម្ពុជាបានរារាំងដល់ដំណើរការសេដ្ឋកិច្ចពាណិជ្ជកម្មយ៉ាងនេះក្ដី តែកិច្ចព្រមព្រៀងពាណិជ្ជកម្មសេរីចំនួន៣ដែលកម្ពុជាបានចុះហត្ថលេខារួចហើយ រំពឹងថានឹងចូលជាធរមាននៅក្នុងឆ្នាំ២០២១នេះ ។ នេះបើតាមលោកស៊ាង ថៃ អ្នកនាំពាក្យក្រសួងពាណិជ្ជកម្មថ្លែងប្រាប់តាមប្រព័ន្ធតេលេក្រាមកាលពីពេលថ្មីៗនេះ ។
លោកស៊ាង ថៃបានឱ្យដឹងថាកិច្ចព្រមព្រៀងដែលកម្ពុជាសង្ឃឹមនឹងចូលធរមាននៅក្នុងឆ្នាំ២០២១នេះ មាន ១កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ហៅកាត់ថា RCEP ដោយកិច្ចព្រមព្រៀងនេះបានឆ្លងគណៈកម្មការជំនាញនៃរដ្ឋសភារួចហើយ រង់ចាំកិច្ចប្រជុំពេញអង្គរដ្ឋសភា និងបន្តទៅព្រឹទ្ធសភា ។ កិច្ចព្រមព្រៀងពាណិជ្ជកម្មសេរីកម្ពុជាចិន ក៏បានបញ្ជូនទៅរដ្ឋសភារួចហើយដែរ ដោយកំពុងរង់ចាំការកោះអញ្ជើញទៅបំភ្លឺនៅគណៈកម្មការជំនាញរួចបន្តទៅកិច្ចប្រជុំសភាពេញអង្គនិងទៅព្រឹទ្ធសភា ។ ចំណែកកិច្ចព្រមព្រៀងពាណិជ្ជកម្មមួយទៀតគឺកិច្ចព្រមព្រៀងពាណិជ្ជកម្មសេរីកម្ពុជា កូរ៉េ ក៏បានបញ្ចប់ការចរចាទាំងស្រុងហើយដែរ ។ សម្ដេចតេជោ បានប្រគល់សិទ្ធិប្រទានជូនរដ្ឋមន្ត្រីពាណិជ្ជកម្មចុះហត្ថលេខាជាមួយភាគីកូរ៉េ ។ ភាគីទាំងពីរកំពុងរកពេលវេលាសមស្រប ដើម្បីចុះហត្ថលេខា ។ ពេលចុះហត្ថលេខារួច នឹងត្រូវបំពេញនីតិវិធីដូចកិច្ចព្រមព្រៀងខាងលើដែរ ដើម្បីអាចចូលជាធរមានបាន ។
ឯកឧត្តមប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មកម្ពុជាបានមានប្រសាសន៍ថាកិច្ចព្រមព្រៀងពាណិជ្ជកម្មសេរីទាំងទ្វេភាគីនិងពហុភាគី គឺបានផ្ដល់ប្រយោជន៍ដល់កម្ពុជាច្រើនណាស់ ដូចជាកម្ពុជាអាចបង្កើនការនាំចេញបន្ថែមទៀតទៅកាន់ទីផ្សារប្រទេសជាដៃគូ ជាក់ស្ដែងកិច្ចព្រមព្រៀងពាណិជ្ជកម្មសេរីកម្ពុជាចិន នឹងជួយកម្ពុជាបង្កើនការនាំចេញទៅកាន់ទីផ្សារប្រទេសចិនបន្ថែមទៀតហើយក៏អាចទាក់ទាញវិនិយោគិនចិនចូលមកកបណ្ដាក់ទុនវិនិយោគនៅកម្ពុជាបន្ថែមទៀតផងដែរ ។
ឯកឧត្តមបន្តថា នៅក្នុងឆ្នាំ២០២១នេះ យើងរំពឹងថាកិច្ចព្រមព្រៀងពាណិជ្ជកម្មសេរីចំនួន៣នឹងចូលជាធរមាន នៅក្នុងឆ្នាំ២០២១នេះ ហើយរំពឹងថានៅចុងឆ្នាំឬដើមឆ្នាំ២០២២ កិច្ចព្រមព្រៀងពាណិជ្ជកម្មសេរីទាំងនេះនឹងចាប់ផ្ដើមដាក់ដំណើរការ ។
លោកវង្សី វិស្សុត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុបានមានប្រសាសន៍ថាចិនបានក្លាយជាទីផ្សារធំមួយសម្រាប់កម្ពុជា នៅក្នុងបរិការណ៍កូវីដ១៩នេះ ដោយបានបន្ថែមការនាំចូលទំនិញពីកម្ពុជាជាពិសេសផលិតផលកសិកម្ម ហើយថ្មីៗនេះចិនក៏បានបន្ថែមការនាំចូលផលិតផលសម្លៀកបំពាក់និងស្បែកជើងបន្ថែមទៀតពីកម្ពុជា ដែលធ្វើឱ្យកម្ពុជាបានធ្វើពិពិធកម្មទីផ្សារនាំរបស់ខ្លួន ។កិច្ចព្រមព្រៀងពាណិជ្ជកម្មសេរីរវាងកម្ពុជានិងចិនក៏នឹងធ្វើកម្ពុជាមានសមត្ថភាពក្នុងការនាំចេញទៅកាន់ទីផ្សារប្រទេសចិន ហើយនឹងទាក់ទាញវិនិយោគិនចិនមកបណ្ដាក់ទុនវិនិយោគនៅកម្ពុជាផងដែរ ដែលធ្វើចិនក្លាយជាផ្នែកមួយសំខាន់ក្នុងការជំរុញកំណើនសេដ្ឋកិច្ចរបស់ប្រទេសកម្ពុជា ។
យោងតាមមន្ត្រីជាន់ខ្ពស់របស់ក្រសួងពាណិជ្ជកម្មក៏បានថ្លែងថា ក្រៅពីកិច្ចព្រមព្រៀងពាណិជ្ជកម្មសេរីទាំងបីកម្ពុជាក៏មានផែនការក្នុងការបង្កើតកិច្ចព្រមព្រៀងពាណិជ្ជកម្មសេរីជាមួយបណ្ដាប្រទេសមានទីផ្សារធំៗនៅលើពិភពលោកផងដែរ ដើម្បីពង្រីកទីផ្សារនាំរបស់របស់ខ្លួនបន្ថែមទៀត ទាក់ទាញការវិនិយោគពីប្រទេសធំនៅលើពិភពលោកចូលមកបណ្ដាក់ទុនវិនិយោគនៅកម្ពុជា ៕
ចែករំលែកព័តមាននេះ