រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាណាចក្រកម្ពុជាមានប្រសាសន៍ថា ទាក់ទិននឹងរឿងបញ្ហាការបំផ្លាញប្រាង្គប្រាសាទរបស់យើងកាលពីថ្ងៃទី៣ សីហា ឆ្នាំ ២០០៩ ពេលនោះមានការប្រយុទ្ធគ្នានៅវាលឥន្ទ្រីតំបន់ភ្នំទ្រព្យក៏ប៉ុន្ដែបែរជាកាំភ្លើងធំរបស់កងទ័ពឈ្លានពានបានបាញ់ចូលទៅក្នុងតំបន់ប្រាសាទទៅវិញ… គេបានបំផ្លាញគេធ្វើអ្វីតាមចិត្ដចង់ព្រោះគេជាចោរឈ្លានពាន ។ សូមបញ្ជាក់ថា មិនមែនបានសេចក្ដីថាចំណុចនេះបង្ហាញអំពីចំណុចខ្សោយថាកម្ពុជាមិនហ៊ានតបជាមួយកំលាំងឈ្លានពាននោះទេ ។តំលៃណាក៏ដោយក៏ត្រូវការពារឱ្យបានគ្មាន៤,៦គីឡូម៉ែត្រត្រង់ហ្នឹងទេមានតែរដ្ឋាភិបាលចោរដែលប្រកាសអា៤,៦ ។ សុំនិយាយកន្លែងនេះឱ្យច្បាស់ ។សម្ដេចតេជោនាយករដ្ឋមន្ដ្រីហ៊ុន សែន មានប្រសាសន៍បែបនេះនាព្រឹកថ្ងៃទី៣ មីនា នៅសាលសន្និសីទចតុមុខក្នុងឱកាសសម្ដេច និងលោកជំទាវអញ្ជើញជាអធិបតីភាពក្នុងពិធីអបអរសាទរទិវាវប្បធម៌ជាតិ៣មីនាលើកទី១២ និងបិទមហោស្រពសិល្បៈល្ខោន នាដកម្មខ្មែរទូទាំងប្រទេស គឺសំដៅរំលេចនូវតំលៃឯកនៃប្រាសាទព្រះវិហារជាទីសក្ការៈ ជាអត្ដសញាណវប្បធម៌ជាតិខ្មែរត្រូវទទួលនូវការប៉ុនប៉ងលេបត្របាក់យ៉ាងងងើលឥតអៀនខ្មាសពីពួកឈ្លានពានប្រទេសជិតខាង។
សម្ដេចតេជោនាយករដ្ឋមន្ដ្រីបញ្ជាក់ថា ប្រាសាទព្រះវិហារវាមិនមែនរបស់ពួកគេទេគេជាចោរគេជាអ្នកឈ្លានពានក្លែងបន្លំ… ដូច្នេះហើយបានជាពួកគេមិនខ្លាចក្នុងការបាញ់ប្រហារមកលើប្រាសាទរបស់យើង។ ចំពោះយើងវិញសព្វថ្ងៃសូម្បីតែយើងនៅទីនោះដូចជាដើមឈើអ្វីៗផ្សេងទៀតគឺត្រូវបានការពារមាំទាំអភិរក្សខ្លាំងណាស់ព្រោះ វាជាសម្បត្ដិរបស់យើង ។ កម្ពុជាបានព្រាងលិខិតរួចស្រេចហើយសំរាប់ទៅក្រុមប្រឹក្សាសន្ដិសុខអង្គការសហប្រជាជាតិបើមានការចាំបាច់ ។ ជួនកាលមិនចាំបាច់វែងឆ្ងាយផងឥឡូវគណៈកម្មការបេតិកភណ្ឌពិភពលោកនឹងសើរើដែលជារឿងវប្បធម៌សុទ្ធសាធអំពីបញ្ហាហ្នឹងទៀត ។សម្ដេចតេជោនាយករដ្ឋមន្ដ្រីបានមាន ប្រសាសន៍ថា បើសិនជាដល់ចិត្ដហើយរុញលិខិតដែលព្រាងហើយទៅក្រុមប្រឹក្សាសន្ដិសុខអង្គការសហប្រជាជាតិ ព្រោះយើងមានលិខិតច្រើនហើយក្រោយពីការឈ្លានពាន។ គឺគ្រាន់តែផ្អាកដើម្បីការចរចាទ្វេភាគីតែប៉ុណ្ណោះ តែការចរចាទ្វេភាគីមិនទាន់បញ្ជាក់ នៅឡើយទេនៅទុកកងទ័ព១០នាក់នៅនឹងវត្ដកែវសិក្ខាគិរីស្វារៈ ។យើងចង់ឱ្យសភាពការណ៍ទាំងអស់វិលទៅរកមុនថ្ងៃទី១៥ ខែកក្កដា ឆ្នាំ២០០៨ បើ មិនដូច្នេះទេបញ្ហានេះវាមិនបញ្ចប់ត្រឹមនេះ ទេ ហើយក៏មិនបញ្ចប់ត្រឹមការចរចាទ្វេភាគីដែលមិនបានការនោះដែរ ។ ដូច្នេះចំណុចនេះខ្ញុំគ្រាន់តែលើកឡើងអំពីថា របស់យើងពិតណាស់យើងខ្លាចខូចខាតណាស់យើងថែទាំណាស់ ។ ប៉ុន្ដែពួកគេឈ្លានពានមិនមែនរបស់គេ គេហ៊ានបាញ់ចូលធ្វើឱ្យមានស្លាកស្នាមនៅក្នុងព្រឹត្ដិការណ៍ដែលឈ្លានពានកាលពីឆ្នាំ២០០៩កន្លងផុតទៅ ។ចំណែកយើងវិញយើងខ្លាចខូចខាតណាស់ សូម្បីតែជីកលេណដ្ឋានការពារខ្លួនក៏យើងមានការប្រុងប្រយ័ត្នណាស់មិនហ៊ានប៉ះពាល់ទេប៉ុន្ដែពួកគេមិនខ្លាចបំផ្លាញទៅវិញ ។
សម្ដេចតេជោនាយករដ្ឋមន្ដ្រីបានរំលឹកពីអតីតកាលថា បើយោងតាមអ្នកស្រាវជ្រាវប្រវត្ដិសាស្ដ្រឆ្នាំ១៩៦២ ការដកចេញរបស់ពួកឈ្លានពានពីប្រាសាទព្រះវិហារបានឱ្យដឹងថា ការបែកបាក់មួយចំនួនរបស់ប្រាង្គប្រាសាទមិនមែនជាការបាក់បែកដោយធម្មជាតិទេគឺបាក់បែកដោយការបំផ្លាញរបស់ពួកឈ្លានពានមុនពេលដកចេញ ។ មកដល់ឥឡូវនេះគេក៏មិនខ្លាចនឹងបាញ់ចូលនោះទេ ។ទាក់ទិននឹងបញ្ហានេះសម្ដេចតេជោនាយករដ្ឋមន្ដ្រីគូសបញ្ជាក់ថា មិនមែនដោយសារយើងមិនហ៊ានតបតនៅតំបន់ព្រះវិហារទេ ហើយចាប់ចំណុចខ្សោយយើងធ្វើការវាយលុកមកលើយើងនោះទេ ។ នេះអាចបញ្ជាក់និងបញ្ជូនសារផងដែរ ដូចជារឿងព្រេងមួយគឺស្ដ្រីពីរនាក់ដណ្ដើមកូនគ្នាម្ដាយ ពិតប្រាកដអត់ហ៊ានទាញកូនរបស់ខ្លួនខ្លាំងទេឯម្ដាយក្លែងក្លាយហ៊ានទាញខ្លាំងទោះជារហែកដាច់ដោចក៏មិនខ្លាចដែរ ។ ដូចជាអាអ្នកក្លែងក្លាយគឺវាត្រូវតែហ៊ានបាញ់ឯម្ចាស់ពិតអត់ហ៊ានបាញ់ទេ ។ សម្ដេចតេជោនាយករដ្ឋមន្ដ្រីអះអាងថាពិតជាគ្មានការសង្ស័យទេថាការលើកឡើងពីតំលៃបេតិកភណ្ឌពិភពលោកនេះគឺចង់បញ្ជាក់ថា អត្ថប្រយោជន៍នៃការដាក់បញ្ចូលជាសម្បត្ដិបេតិកភណ្ឌពិភពលោកនៃប្រាសាទព្រះវិហារបាននាំមកនូវការយកចិត្ដទុកដាក់ពីសំណាក់មនុស្សជាតិទូទៅទាំងនៅក្នុងតំបន់និងលើសាកលលោក ក្នុងការលើកស្ទួយការថែរក្សាការពារ និងការអភិវឌ្ឍន៍រមណីយដ្ឋាន សម្បត្ដិវប្បធម៌នេះ សំដៅរួមដំណើរស្ដារ និងលើកកំពស់ជីវភាពរស់នៅរបស់ប្រជាជនកម្ពុជាឱ្យមានភាពប្រសើរឡើង ។
ចែករំលែកព័តមាននេះ