ហេតុអ្វីត្រូវសន្សំប្រាក់ ? តើវានឹងមានអត្ថប្រយោជន៍បែបណាចំពោះជីវិតអ្នក ? តើវានឹងជួយអ្វីខ្លះនៅពេលអ្នកជួបវិបត្តិនានា ជាពេលបច្ចុប្បន្ន ? ។ តាមការស្រាវជ្រាវពីអ្នកជំនាញបានឱ្យដឹងថា មនុស្សខ្លះមានការសោកស្តាយនៅពេលដែលពួកគេមានអាយុកាន់តែចាស់ ក៏ព្រោះថា កាលដែលពួកគេមានអាយុនៅក្មេង ពួកគេមិនបានចាប់អារម្មណ៍រឿងសន្សំប្រាក់នោះទេ នេះជាហេតុនៅពេលដែលពួកគេចាស់ទៅ មិនមានប្រាក់ចាយគ្រប់គ្រាន់ ។ ដូចអ្នកដឹងស្រាប់ហើយ នៅពេលអ្នកអាយុកាន់តែចាស់ កាន់តែគ្មានការងារ ដូចនេះអ្នកជំនាញបានណែនាំវិធីសាស្ត្រនានា ថាតើអាយុប៉ុន្មានអ្នកគួរចាប់ផ្តើមសន្សំប្រាក់ទៅ ។ អ្នកគួរតែសន្សំប្រាក់ទៅតាមដំណាក់កាល នៃអាយុរបស់អ្នក ចាប់ពីអាយុ ២០ ឆ្នាំ ៣០, ៤០, ៥០ និង ៦០ ឆ្នាំ ។ ខាងក្រោមនេះជាដំណាក់កាលនីមួយៗ នៃការប្រើប្រាស់លុយ និងសន្សំប្រាក់ ទៅតាមអាយុរបស់អ្នក ៖
១. លុយនៅវ័យជំទង់ (អាយុ ១៧ ដល់ ១៩ ឆ្នាំ) ៖ អ្នកជំនាញបាននិយាយថា វ័យនេះអ្នកមិនទាន់បានគិតទៅលើការទិញផ្ទះ និងប្រាក់សម្រាប់ចូលនិវត្តន៍នោះទេ ។ វ័យនេះ គឺជាវ័យមិនបានគិតដល់អ្វីវែងឆ្ងាយ និងមិនទាន់មានទំនួលខុសត្រូវនោះទេ ហើយក៏មិនទាន់អាចរកប្រាក់បានច្រើនដែរ ។ ប៉ុន្តែប្រសិនបើអ្នករស់នៅជាមួយឪពុកម្តាយ អ្នកក៏អាចសន្សំប្រាក់បានដែរ អ្នកអាចចាប់ផ្តើមពីការសន្សំតិចតូច តាមលទ្ធភាពរបស់អ្នក វាមិនមានភាពខុសទាស់អ្វីនោះទេ ប្រសិនបើអ្នកមានទំលាប់ល្អនៃការសន្សំ បើទោះបីអ្នកមិនទាន់ដឹងថាប្រើប្រាស់លុយនេះដើម្បីអ្វី។ វ័យនេះផងដែរ ច្រើនតែចាយមិនសូវចេះគិត និងចាយលុយអស់លឿនណាស់ ចូរអ្នកប្រុងប្រយ័ត្ន ក្នុងការចាយវាយ ។
២. លុយនៃដើមឆ្នាំដំបូង នៃអាយុ ២០ ឆ្នាំ របស់អ្នក (អាយុ ២០ ទៅ ២៤ ឆ្នាំ) ៖ វ័យនេះគ្រោះថ្នាក់ធំផុត គឺការប្រើប្រាស់របស់របរខ្លាចចាញ់គេ ។ អ្នកខ្លះទិញអ្វីៗជាច្រើន ដើម្បីឱ្យត្រូវនឹងមិត្តភក្តិរបស់គេ ញុំាអាហារថ្លៃៗ ទិញស្បែកជើង ទិញសំលៀកបំពាក់ប្រ៊េនជាដើម ។ អ្នកអាចធ្វើបានប្រសិនបើរៀនកាត់ចិត្តពីរបស់ទាំងអស់នោះ ហើយព្យាយាមទទួលស្គាល់នូវអ្វីដែលខ្លួនមាន ។ អ្នកខ្លះគិតថា ចាំអាយុ ៣០ ចាំចាប់ផ្តើមសន្សំ រីឯអ្នកខ្លះទៀតមិនមានទំលាប់សន្សំតែម្តង ។ ចន្លោះអាយុនេះអ្នកអាចចាយ និងសន្សំ បើមិនដូច្នេះ សូម្បីតែប្រាក់ខែដំបូងរបស់អ្នកក៏មិនសល់ដែរ ។ អ្វីដែលសំខាន់អ្នកគួរចាប់ដាក់ប្រាក់សន្សំក្នុងគណនីសន្សំពីវ័យនេះទៅ ។
៣. លុយនៅអាយុ ២៥ ទៅ ៣២ ឆ្នាំ ៖ មនុស្សក្នុងវ័យនេះ តែងតែចាប់ផ្តើមគិតអំពីគ្រួសារ ផ្ទះ ឡាន ឬកូនចៅ (អាស្រ័យលើមនុស្សម្នាក់ៗ អ្នកខ្លះមិនទាន់បានគិតអ្វីទាំងអស់) ហើយក៏ជាវ័យដែលគួរតែធ្វើការឱ្យបានច្រើន ដើម្បីមានប្រាក់ចំណូលច្រើនផងដែរ ។ វ័យនេះផងដែរ គឺជាវ័យដែលគិតទៅលើការរៀបអាពាហ៍ពិពាហ៍ ដូចនេះអ្នកជំនាញណែនាំឱ្យសន្សំលុយបានកាន់តែច្រើនរឹតតែល្អ ពីព្រោះប្រសិនបើអ្នកចង់រៀបការនោះ បន្ទាប់អ្នកប្រាកដជាចង់បានផ្ទះ និងកូនៗហើយ បើទោះបីបច្ចុប្បន្នមានការបង់រំលស់ក្តី ប៉ុន្តែអ្នកមិនអាចពឹងលើ ការបង់រំលស់សុទ្ធនោះទេ ។ អ្នកជំនាញណែនាំឱ្យអ្នកសន្សំ យ៉ាងហោចណាស់ឱ្យបាន ២០ ភាគរយនៃប្រាក់ចំណូលរបស់អ្នក ប្រសិនបើតម្រូវការរបស់អ្នកមានច្រើន ដូចជាត្រូវបង់ផ្ទះ បង់ឡាន និងបង់សាលាកូនរៀន ។
៤. លុយនៅកម្រិតកំពូល នៃអាជីពរបស់អ្នក (ពីអាយុ ៣៣ ដល់ ៤៥ ឆ្នាំ) ៖ វ័យនេះ អ្នកមានប្រាក់ខែច្រើន ឬប្រាក់ចំណូលច្រើន ពីព្រោះវ័យអ្នកប្រាកដជាមានបទពិសោធន៍ច្រើន ដូចនេះប្រាក់ខែក៏មិនអាចតិចដូចកាលនៅអាយុ ២០ ផ្លាយនោះទេ ។ វ័យនេះផងដែរ គឺជាវ័យដែលចាប់ផ្តើមគិតអំពីសុខភាព គិតពីលុយ បំណុល និងការចូលនិវត្តន៍របស់ខ្លួន ។ ក្នុងវ័យនេះ អ្នកជំនាញបានណែនាំឱ្យអ្នកគួរតែចាប់ផ្តើមអាជីវកម្មខ្លួនឯង ការវិនិយោគទៅលើអ្វី ឬបើកក្រុមហ៊ុនខ្លួនឯង ហើយអ្នកគួរតែនៅបន្តធ្វើការងារក្រៅម៉ោងរបស់អ្នក ។ វ័យនេះអ្នកគួរមានការអភិវឌ្ឍន៍ខ្លួន ហើយអ្នកត្រូវដឹងថាផ្លូវជីវិតតែងតែមានភាពប្រែប្រួល និងផ្លាស់ប្តូរ ដូចនេះអ្នកត្រូវរៀនអ្វីឱ្យទាន់សម័យកាល ។
៥. លុយនៅពាក់កណ្តាលអាយុ ៤៦ ទៅ ៥៥ ឆ្នាំរបស់អ្នក ៖ មនុស្សភាគច្រើននៅវ័យនេះ គិតអំពីបំណុលដែលនៅសេសសល់ និងគិតទៅលើជំនួញរបស់ពួកគេក្នុងការទទួលបានជោគជ័យ ។ រឿងកូនចៅមិនសូវគិតទេព្រោះកូនៗមានលទ្ធភាពរកប្រាក់បានហើយ ។ វ័យនេះផងដែរ អ្នកគួរគិតគូទៅលើពេលវេលាចូលនិវត្តន៍ឱ្យបានច្រើន មានន័យថា អ្នកត្រូវសន្សំប្រាក់ឱ្យបានកាន់តែច្រើនតាមតែអាចធ្វើបាន ប្រសិនបើអ្នកមានគម្រោងចង់ចូលនិវត្តន៍នៅអាយុ ៦០ ឆ្នាំ ឬមុន ។
៦. លុយឆ្ពោះទៅការចូលនិវត្តន៍ និងលើសពីនេះ (ពីអាយុ ៥៥ ដល់ ៧០+ឆ្នាំ) ៖ វ័យនេះអ្នកធ្វើយ៉ាងណាគិតអំពីសុខភាព ។ មនុស្សភាគច្រើននៅវ័យនេះច្រើនតែគិតពីទ្រព្យសម្បត្តិទុកឱ្យកូនចៅ នេះជាការគិតដែលគ្រោះថ្នាក់បំផុត អ្នកមិនត្រូវគិតទៅលើលុយ ។ ឈប់បារម្ភខ្លាំងណាស់ចំពោះកូនចៅ ហើយកុំលក់ផ្ទះល្វែងរបស់អ្នកដើម្បីយកប្រាក់ឱ្យពួកគេ បន្ទាប់មកផ្លាស់ទីលំនៅ ទៅនៅជាមួយពួកគេ ។ ចូរអ្នកចងចាំថា អ្នកបានធ្វើការងាររកប្រាក់ដើម្បីចិញ្ចឹមពួកគេ អស់ពីសមត្ថភាពហើយ ដូចនេះពេលវេលាដែលនៅសល់គឺអ្នកត្រូវមើលថែរខ្លួនឯង ។ សម្រាប់ជាប្រយោជន៍នៃការលួងលោមផ្ទាល់ខ្លួនសូមឱ្យឆន្ទៈរបស់អ្នកមានលក្ខណៈជាផ្លូវការ ។ ហើយបន្តធ្វើអ្វីគ្រប់យ៉ាង ដែលអ្នកចង់ធ្វើខណៈពេល ដែលអ្នកនៅតែអាចធ្វើបាន។ អ្នកត្រូវធ្វើអ្វីៗគ្រប់យ៉ាង ដែលអ្នកចង់ធ្វើ ប្រសិនបើអ្នកនៅសមត្ថភាពធ្វើវា ៕ ប្រភព ៖ fifthperson
ចែករំលែកព័តមាននេះ